*ວຽກງານການແກ້ໄຂຄວາມທຸກຍາກ ແລະ ການພັດທະນາຊົນນະບົດເປັນວຽກງານບູລິມະສິດ ຂອງພັກ-ລັດຖະບານ ໃຫ້ຄວາມສໍາຄັນ ແລະ ແກ້ໄຂຢ່າງເປັນລະບົບໃນຫລາຍໆດ້ານ ເປັນຕົ້ນໄພພິບັດທໍາມະຊາດ, ສະຫນອງພື້ນຖານໂຄງ ລ່າງເສດຖະກິດ-ສັງຄົມ, ໂຄງລ່າງໃນເຂດຈຸດສຸມພັດທະນາຊົນນະບົດ ແລະ ແກ້ໄຂຄວາມທຸກຍາກ ເຊັ່ນ: ບຸກເບີກເນື້ອທີ່ທໍາການຜະລິດ, ການສະຫນອງເຕັກນິກ, ແນວພັນ, ຊົນລະປະທານ ຫລື ຝາຍເກັບນໍ້າຂະຫນາດນ້ອຍ, ການສະຫນອງໄຟຟ້າ, ນໍ້າ ສະອາດ, ສຸກສາລາ, ໂຮງຮຽນ ແລະ ອື່ນໆທີ່ມີຄວາມຈໍາເປັນຕໍ່ການດໍາລົງຊີວິດ ທັງນີ້ກໍເພື່ອຍົກລະດັບຊີວິດການເປັນຢູ່ ຂອງປະຊາຊົນບັນດາເຜົ່າຂຶ້ນເທື່ອລະກ້າວ.
        ທ່ານ ເພັດ ພົມພິພັກ ລັດຖະມົນຕີກະຊວງແຜນການ ແລະ ການລົງທຶນ ໄດ້ລາຍງານກ່ຽວກັບການຈັດຕັ້ງປະຕິບັດ ແຜນການລົງທຶນຂອງລັດ ປະຈໍາປີ 2024 ໂດຍສັງເຂບ ແລະ ແຜນການລົງທຶນ ຂອງລັດ ປະຈໍາປີ 2025 ຕໍ່ກອງປະຊຸມ ສະ ໄຫມສາມັນເທື່ອທີ 8 ຂອງສະພາແຫ່ງຊາດ ຊຸດທີ IXວ່າ: ວຽກງານການແກ້ໄຂຄວາມທຸກ ແລະການພັດທະນາຊົນເປັນວຽກງານ ທີ່ລັດຖະບານໄດ້ເອົາໃຈໃສ່ ເຊິ່ງໃນປີ2025 ຈະສືບຕໍ່ແກ້ໄຂໄພພິບັດທໍາມະຊາດ, ພື້ນຖານໂຄງລ່າງເສດຖະກິດ- ສັງຄົມ, ໂຄງລ່າງໃນເຂດຈຸດສຸມພັດທະນາຊົນນະບົດ ແລະແກ້ໄຂຄວາມທຸກຍາກເຊັ່ນ: ບຸກເບີກເນື້ອທີ່ທໍາການຜະລິດ, ການສະຫນອງເຕັກນິກ, ແນວພັນ, ຊົນລະປະທານ ຫລື ຝາຍເກັບນໍ້າຂະຫນາດນ້ອຍ, ການສະຫນອງຕາຂ່າຍໄຟຟ້າ, ນໍ້າສະອາດ, ສຸກ ສາ ລາ,ໂຮງຮຽນ, ຫໍພັກນັກຮຽນກິນນອນຊົນເຜົ່າ ເຂດຫ່າງໄກສອກຫລີກ ແລະຈຸດສຸມຕ່າງໆ,ເສັ້ນທາງດິນແດງເຂົ້າບ້ານ ຫລື ກຸ່ມບ້ານ, ເສັ້ນທາງເຂົ້າສູ່ເຂດການຜະລິດ, ບໍລິການທີ່ຕິດພັນ ກັບການນໍາໃຊ້ລົດໄຟ ລາວ-ຈີນ ແລະ ການຂົນສົ່ງສິນຄ້າໄປ ຕ່າງ ປະເທດ; ໂຄງການປັບປຸງກິດຈະກໍາພື້ນຖານໂຄງລ່າງ ທີ່ຕິດພັນກັບການຊຸກຍູ້ການເກັບລາຍຮັບ ທີ່ສະຫນັບສະຫນູນວຽກງານການທ່ອງທ່ຽວ; ໂຄງການທີ່ຈໍາເປັນທາງດ້ານຍຸດທະສາດປ້ອງກັນຊາດ-ປ້ອງກັນຄວາມສະຫງົບ; ຝຶກອົບຮົມສີມືແຮງງານ ແລະ ການສົ່ງເສີມ ການສ້າງວຽກເຮັດງານທໍາໃຫ້ແຮງງານລາວ, ຝຶກອົບຮົມວຽກງານວິຊາການ, ການຖ່າຍທອດວິທະຍາສາດ-ເຕັກໂນໂລຊີ ແລະການຫັນເປັນທັນສະໄຫມ ດ້ວຍລະບົບດີຈິຕອນ; ການສະຫນອງອຸປະກອນການເເພດ, ອຸປະກອນການ ສຶກສາ, ອຸປະກອນສໍາລັບຊຸກຍູ້ການເກັບລາຍຮັບ ແລະ ອຸປະກອນສໍາລັບການພັດທະນາສີມືແຮງງານ; ການຕິດຕາມກວດກາການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ແລະ ແຜນການລົງທຶນ (ສະເພາະຂະແຫນງການທີ່ລະບຸໄວ້ຕາມກົດ ຫມາຍວ່າດ້ວຍການລົງທຶນລັດ); ການສ້າງຕົວແບບການຜະລິດ, ການສົ່ງເສີມການຜະລິດພາຍໃນຢ່າງແຂງແຮງ ແລະ ການຄໍ້າປະກັນສະບຽງອາຫານ; ການສ້ອມແປງພື້ນຖານໂຄງລ່າງທີ່ເປ່ເພ ແລະ ຊຸດໂຊມ ເພື່ອໃຫ້ສາມາດນໍາໃຊ້ໄດ້ປົກກະຕິ. ໃນນັ້ນ, ສໍາລັບສໍານັກງານ ຫ້ອງການບ່ອນເຮັດວຽກ ແມ່ນຕ້ອງເປັນບ່ອນທີ່ຈໍາເປັນແທ້ໆ ເຊັ່ນ: ສ້ອມແປງລະບົບໄຟຟ້າ, ລະບົບນໍ້າປະປາ, ຫລັງຄາເປ່ເພເສຍຫາຍ ເພື່ອໃຫ້ອາຄານສໍານັກງານສາມາດນໍາໃຊ້ໄດ້.

KPL