ຂປລ. ແຫລ່ງຂ່າວຈາກສູນຂໍ້ມູນຂ່າວສານຄຸນໝິງ ຫ້ອງການພົວພັນກັບຕ່າງປະເທດແຂວງຢຸນນານໃຫ້ຮູ້ວ່າ: ວັນທີ18ພະຈິກ2024 ນີ້,ກອງປະຊຸມເມືອງມິດຕະພາບສາກົນຈີນປະຈໍາປີ2024ພາຍໃຕ້ຫົວຂໍ້“ ຮ່ວມກັນສ້າງອະນາຄົດ” ໄດ້ເປີດຂຶ້ນຢູ່ນະຄອນຄຸນໝິງ ສປ ຈີນ.ກອງປະຊຸມດັ່ງກ່າວ ເປັນເວທີປາໄສສຳຄັນໃນການແລກປ່ຽນຄຳຄິດຄຳເຫັນດ້ານການຮ່ວມ ມືຂອງບັນດາອົງການປົກຄອງທ້ອງຖິ່ນ ປະເທດຕ່າງໆໃນໂລກ ເພື່ອເສີມສ້າງຄວາມເຂົ້າໃຈເຊິ່ງກັນ ແລະ ກັນພ້ອມກັນພັດທະນາຕົວເມືອງມິດຕະພາບກັບແຂວງຢຸນນານ.

ໃນໂອກາດນີ້ ທ່ານ Maximov Andreyຜູ້ອໍານວຍການໃຫຍ່ສະຫະພັນຕົວເມືອງລັດເຊຍໄດ້ມີຄຳເຫັນວ່າ:“ ບາງບັນຫາທີ່ມະນຸດກໍາລັງຜະເຊີນຢູ່ເປັນສິ່ງສຳຄັນທີ່ພວກເຮົາຕ້ອງແບ່ງປັນປະສົບການດ້ານການປົກຄອງ ແລະ ການພັດທະນາຮ່ວມກັນເຊິ່ງນະຄອນຄຸນໝິງໄດ້ສະໜອງເວທີດັ່ງກ່າວເພື່ອແລກປ່ຽນ, ແບ່ງປັນປະສົບການເຊິ່ງກັນແລະກັນເຊິ່ງແຂກຕ່າງປະເທດທີ່ຮ່ວມເດີນທາງມາເຂົ້າຮ່ວມກອງປະຊຸມລ້ວນແຕ່ເປັນເພື່ອນມິດທີ່ດີກັບນະຄອນຄຸນໝິງຫລາຍ. ພາຍຫລັງກອງປະຊຸມຄັ້ງນີ້ ຈະມີນັກທ່ອງທ່ຽວຣັດເຊຍເຂົ້າມາທ່ຽວນະຄອນຄຸນໝິງຫລາຍຂຶ້ນ ແລະ ເຂົາເຈົ້າກໍ່ຈະຫລົງຮັກເມືອງທີ່ເຕັມໄປດ້ວຍສະເໜ່ແຫ່ງນີ້ຄືພວກເຮົາ”.

ຂະນະທີ່ ທ່ານ Jordi Vaquer ເລຂາທິການໃຫຍ່ຂອງສະມາຄົມໂລກຂອງເມືອງໃຫຍ່ກໍມີຄຳເຫັນວ່າ:“ແຂວງຢຸນນານ ເປັນສູນກາງຂອງທະວີບອາຊີ, ເປັນແຫລ່ງເຕົ້າໂຮມວັດທະນະທຳຈາກອາຊີ,ອາຊີຕາເວັນອອກສ່ຽງໃຕ້,ອາຊີໃຕ້, ອາຊີຕາເວັນອອກ ແລະ ພາກພື້ນອື່ນໆເຂົ້າກັນເປັນເອກະລັກສະເພາະ. ຂະນະທີ່ເມືອງຄຸນໝິງ ແຂວງຢຸນນານຂອງຈີນກໍມີຄວາມອຸດົມສົມບູນດ້ານທຳມະຊາດ ແລະ ເປັນເມືອງທີ່ມີທ່າແຮງໃນການພັດທະນາ”.

ພ້ອມນີ້, ທ່ານ Wanchai Chongsuttanamanee ເຈົ້າຄອງນະຄອນຊຽງລາຍ ປະເທດໄທກໍມີຄໍາເຫັນວ່າ: “ນະຄອນຄຸນໝິງ ແມ່ນໜຶ່ງໃນບັນດາເມືອງທີ່ດີທີ່ສຸດໃນໂລກ,ມີ4ລະດູການຄື: ລະດູໃບໄມ້ປົ່ງອາກາດກໍສົດໃສ,ລະດູໜາວກໍບໍ່ໜາວຫລາຍ,ລະດູຮ້ອນກໍບໍ່ຮ້ອນຫລາຍ.ຢູ່ທີ່ນີ້ເຕັມໄປດ້ວຍດອກໄມ້ແລະ ດອກໄມ້ທຸກຊະນິດແມ່ນສວຍງາມແລະ ຫລາກຫລາຍຊຶ່ງສົມຄວນໄດ້ຮັບນາມມະຍົດເປັນເມືອງດອກໄມ້. ຄຸນໝິງ ເປັນ​ເມືອງ​ພິ​ເສດ​ທີ່​ສຸດບໍ່ພຽງແຕ່ເປັນຈຸດສຳຄັນຂອງການພັດທະນາເສດຖະກິດເທົ່ານັ້ນ,ຫາກຍັງແມ່ນຈຸດເຊື່ອມໂຍງວັດທະນະທຳ,ມໍລະດົກວັດທະນະທຳອັນຄໍ້າຄ່າ ເຊິ່ງນີ້ເຮັດໃຫ້ຄຸນໝິງ ເປັນເອກະລັກສະເພາະໃນການຮ່ວມມືສາກົນ.ໃນຖານະເປັນນະຄອນໃຈກາງຢູ່ພາກຕາເວັນຕົກສຽງໃຕ້ຂອງຈີນ,ຄຸນມິງມີທ່າແຮງໃນການພັດທະນາເປັນຈຸດເຊື່ອມຕໍ່ອາຊຽນແລະເປັນປະຕູທີ່ສຳຄັນໄປສູ່ໂລກ. ພວກເຮົາຫວັງວ່າໃນອະນາຄົດທາງລົດໄຟລາວ-ຈີນຈະສາມາດຂະຫຍາຍໄປເຖິງນະຄອນຊຽງລາຍປະເທດໄທ ຕື່ມອີກ. ນອກນີ້, ຖ້າຫາກຖ້ຽວບິນໂດຍກົງຈາກຄຸນໝິງໄປຊຽງລາຍສາມາດເປີດໄດ້ຈະສ້າງຄວາມສະດວກສະບາຍໃຫ້ແກ່ການແລກປ່ຽນລະຫວ່າງສອງເມືອງ. ຫວັງວ່າໂຄງການທາງລົດໄຟຈະສາມາດສ້າງສໍາເລັດໂດຍໄວເພື່ອເພີ່ມກຳລັງແຮງເຂົ້າໃນການເຊື່ອມຈອດລະຫວ່າງສອງປະເທດ.ພ້ອມກັນນັ້ນ, ຍັງເປັນການຍົກສູງບົດບາດຂອງຄຸນມິງເປັນສູນກາງຄົມມະນາຄົມໃນພາກພື້ນຕື່ມອີກ.ນະຄອນຄຸນ ໝິງ ຍັງມີທ່າແຮງເປັນຂົວຕໍ່ຂອງການຮ່ວມມືທາງດ້ານວັດທະນະທໍາ ແລະ ເສດຖະກິດອີກດ້ວຍ”.

ສ່ວນ ທ່ານ ຮວງຮົງເສິງ ເຈົ້າເມືອງກູຈິນນານລັດຊາຣາວັກປະເທດມາເລເຊຍກໍມີຄຳເຫັນວ່າ: “ ກອງປະຊຸມຄັ້ງນີ້ໄດ້ດຶງດູດຜູ້ແທນຈາກຫລາຍປະເທດ, ທຸກຄົນໄດ້ແລກປ່ຽນຄວາມເຫັນກັນຢ່າງເລິກເຊິ່ງ, ໄດ້ແບ່ງປັນປະສົບການ, ໄດ້ຍົກຖານະບົດບາດຂອງນະຄອນຄຸນໝິງໃນປະຊາຄົມໂລກ.ຜ່ານການຮ່ວມມື ແລະ ການແລກປ່ຽນດັ່ງກ່າວ,ບໍ່ພຽງແຕ່ໂລກໄດ້ຮຽນຮູ້ເພີ່ມເຕີມກ່ຽວກັບຄຸນໝິງ ເທົ່ານັ້ນ,ຫາກຍັງໄດ້ວາງພື້ນຖານທີ່ດີກວ່າເກົ່າໃຫ້ແກ່ການຮ່ວມມືດ້ານເສດຖະກິດ ແລະ ການຄ້າລະຫວ່າງຄຸນໝິງກັບປະເທດ ແລະ ເຂດແຄວ້ນອື່ນໆ.ສຳລັບຂ້າພະເຈົ້າຄວາມ​ໝາຍ​ຂອງ​ເມືອງ​ມິດ​ຕະ​ພາບແມ່ນມີຄວາມໝາຍກວ່າ​ຂໍ້​ຕົກ​ລົງ​ໃນ​ເອ​ກະ​ສານຊຶ່ງສິ່ງ​ທີ່​ສຳ​ຄັນ​ກວ່າ​ນັ້ນ​ແມ່ນ​ຜ່ານ​ການ​ຮ່ວມ​ມື ແລະ ການ​ສື່​ສານ​ຕົວ​ຈິງ, ປະ​ຊາ​ຊົນ​ສອງ​ເມືອງ​ສາ​ມາດ​ເຂົ້າ​ໃຈ​ກັນ​ແລະ​ພັດ​ທະ​ນາ​ຮ່ວມ​ກັນ​ຢ່າງ​ແທ້​ຈິງ”.

ພ້ອມນີ້, ທ່ານ Tulasi Ram Lamichhaneຜູ້ປະສານງານເທດສະບານ Lumbiniປະເທດເນປານ ໄດ້ມີຄໍາເຫັນວ່າ: "ຂ້າພະເຈົ້າຮູ້ສຶກດີໃຈຫລາຍທີ່ໄດ້ເຂົ້າຮ່ວມກອງປະຊຸມສຳຄັນນີ້ ເຊິ່ງເປັນປະສົບການທີ່ສໍາຄັນ ແລະ ໜ້າຈົດຈໍາຫລາຍສໍາລັບຂ້ອຍ. ທ່ານ Turaslam Ramihne ຍັງໄດ້ເຊື້ອເຊີນໃຫ້ປະຊາຊົນປະເທດເພື່ອມິດວ່າ： “ຍິນດີຕ້ອນຮັບສູ່ເນປານ”.

ສ່ວນ ທ່ານ Viacheslav Gavrilov,ຮອງເຈົ້າຄອງນະຄອນ Yaroslavl, ປະເທດຣັດເຊຍໄດ້ກ່າວວ່າ: “ເມືອງຄຸນໝິງ ເປັນເມືອງສວຍງາມທີ່ມີຈຸດພິເສດຄື:ມີຕົ້ນໄມ້ສີຂຽວ, ມີຕົ້ນນໄມ້ ແລະ ດອກໄມ້ທົ່ວເມືອງ,ເຮັດໃຫ້ຄົນເຮົາເບິ່ງຄືກັບວ່າຢູ່ໃນລະດູໃບໄມ້ປົ່ງທີ່ບໍ່ເຄີຍສິ້ນສຸດ.ສະພາບອາກາດຢູ່ທີ່ນີ້ມີຄວາມອົບອຸ່ນ ແລະ ສະດວກສະບາຍ. ສະພາບອາກາດດັ່ງກ່າວ,ເຮັດໃຫ້ຜູ້ເຂົ້າຮ່ວມກອງປະຊຸມທຸກຄົນສາມາດສໍາຜັດກັບຄວາມສະດວກສະບາຍທີ່ບໍ່ເຄີຍມີມາກ່ອນ,ຍັງເຮັດໃຫ້ນະຄອນຄຸນໝິງເປັນທາງເລືອກທີ່ເໝາະສົມໃນການຈັດງານລະດັບສາກົນ". ຄຸນໝິບໍ່ພຽງແຕ່ມີທິວທັດທຳມະຊາດທີ່ສວຍງາມເທົ່ານັ້ນ,ຫາກຍັງມີຄຸນຄ່າກວ່າອີກແມ່ນປະຊາຊົນຢູ່ທີ່ນີ້ມີຄວາມກະຕືລືລົ້ນ ແລະ ມີຄວາມເປັນມິດຕໍ່ເພື່ອນມິດສາກົນ.ການສື່ສານຂອງພວກເຮົາຢູ່ນະຄອນຄຸນໝິງແມ່ນສະດວກຫລາຍ; ການສື່ສານຂ້າມວັດທະນະທໍາແບບນີ້ເຮັດໃຫ້ຂ້າພະເຈົ້າຮູ້ສຶກສະໜິດສະໜົມຫລາຍ,ທັງໄດ້ສະແດງໃຫ້ເຫັນຈຸດພິເສດຂອງນະຄອນຄຸນໝິງທີ່ເປັນເມືອງສາກົນ. ຂ້າພະເຈົ້າໄດ້ຮັບຄວາມປະທັບໃຈຫລາຍຢ່າງຈາກປະຊາຊົນນະຄອນຄຸນໝິງ, ການຕ້ອນຮັບອັນອົບອຸ່ນ, ການສົນທະນາທີ່ບໍ່ມີອຸປະສັກເຮັດໃຫ້ຂ້າພະເຈົ້າຮູ້ສຶກເຖິງຄວາມເປັນມິດ ແລະ ການເປີດກວ້າງຂອງປະຊາຊົນນະຄອນຄຸນໝິງ, ຂ້າພະເຈົ້າ ແລະ ສະມາຊິກໃນຄະນະຂອງຂ້າພະເຈົ້າມີຄວາມປະທັບໃຈທີ່ສຸດ”.

KPL