*ຕາມຄາດຄະເນສະພາບລວມ ຂອງພົນລະເມືອງລາວ ມີທ່າ ອ່ຽງຂະຫຍາຍຕົວເພີ່ມຂຶ້ນ, ຈາກ ປັດຈຸບັນມີຈໍານວນພົນລະເມືອງ ມີພຽງ 7,4 ລ້ານຄົນ ແລະ ຈະເພີ່ມ ຂຶ້ນເປັນ 7,6 ລ້ານຄົນ ໃນ ປີ 2025 ແລະ 8,1 ລ້ານຄົນ ໃນປີ 2030.

ອີງຕາມສູນສະຖິຕິແຫ່ງຊາດ, ກະຊວງແຜນການ ແລະ ການລົງທຶນ ຮ່ວມກັບອົງການສະຫະປະຊາຊາດ ກອງທຶນສຳລັບປະຊາກອນ ປະຈຳ ສປປ ລາວ (UNFPA) ໄດ້ຈັດກອງປະຊຸມຄູ່ຮ່ວມພັດທະນາ ແລະ ຂະແໜງການທີ່ກ່ຽວຂ້ອງ ເພື່ອ ປຶກສາຫາລື ແລະ ເພີີ່ມການຮ່ວມມືເພື່ອການກະກຽມ ການສຳຫລວດພົນລະເມືອງ ແລະ ທີ່ຢູ່ອາໄສ ຄັ້ງທີ V ຂອງ ສປປ ລາວ ຈັດຂຶ້ນໃນຕົ້ນເດືອນນີ້. 

ທ່ານ ນາງ ພອນສະຫລີ ສຸກສະຫວັດ ຫົວໜ້າສູນສະຖິຕິແຫ່ງຊາດ ກະຊວງແຜນການ ແລະ ການລົງທຶນ  ໄດ້ກ່າວວ່າ: ຈຸດປະສົງຕົ້ນຕໍຂອງ ກອງປະຊຸມຄັ້ງນີ້ແມ່ນເພື່ອຮັບຟັງ ລາຍງານຄວາມຄືບໜ້າໃນການກະ ກຽມການສໍາຫລວດພົນລະເມືອງ ແລະ ທີ່ຢູ່ອາ ໄສທົ່ວປະເທດ ຄັ້ງທີ V ປີ 2025 ແລະ ນໍາສະເໜີ ກ່ຽວກັບວິທີການຈັດຕັ້ງປະຕິບັດ ແລະ ການນໍາໃຊ້ເຄື່ອງມືເຕັກໂນ ໂລຊີເຂົ້າໃນການສໍາຫລວດຄັ້ງນີ້, ປຶກສາຫາລືກັບບັນດາຄູ່ຮ່ວມພັດ ທະນາກ່ຽວກັບຄວາມເປັນໄປໄດ້ ໃນການປະກອບສ່ວນທາງດ້ານ ງົບປະມານ ແລະ ວິຊາການ ຊຶ່ງມາ ຮອດປັດຈຸບັນ ສປປ ລາວ ຍັງມີ ຄວາມຕ້ອງການໃນດ້ານທຶນຮອນ ເພື່ອປະກອບສ່ວນເຂົ້າໃນການ ຈັດຕັ້ງປະຕິບັດການສໍາຫລວດ ໃຫ້ສໍາເລັດຕາມວັດຖຸປະສົງ ແລະ ລະດັບຄາດໝາຍທີ່ກຳນົດໄວ້.

ໃນໄລຍະເຄິ່ງປີ 2024 ທີ່ຜ່ານ ມາ UNFPA ໄດ້ໃຫ້ການສະໜັບ ສະໜູນສູນສະຖິຕິແຫ່ງຊາດ ຊຶ່ງມີຄວາມຄືບໜ້າຫລາຍດ້ານທີ່ ພົ້ນເດັ່ນ ໂດຍສະເພາະການສ້າງຍຸດທະສາດ ການຮ່ວມມືກັບຄູ່ຮ່ວມພັດທະນາ ລວມມີອົງການຮ່ວມມື ແລະ ພັດທະນາສະວິດ (SDC) ອົງການການພັດທະນາລຸກຊຳບວກ. ການຮ່ວມມືກັບຄູ່ຮ່ວມຍຸດທະສາດໃໝ່ເຫລົ່ານີ້ ໄດ້ສົ່ງເສີມການຮ່ວມມື ທີ່ມີຢູ່ແລ້ວກັບອົງການ USAID ແລະ DFAT ຂອງປະເທດອົດສະຕາລີ ທີ່ໄດ້ໃຫ້ການສະໜັບສະໜູນທາງດ້ານ ງົບປະມານທີ່ສຳຄັນສຳ ລັບການກະກຽມ ແລະ ການດຳເນີນການສຳຫລວດພົນລະເມືອງ ແລະ ທີ່ຢູ່ອາໄສ. ນອກຈາກນີ້, ຍັງມີການຊ່ວຍເຫລືອຂອງອົງ ການຊ່ວຍເຫລືອຂອງສາທາລະນະ ລັດປະຊາຊົນຈີນ (ChinaAID) ຍັງໄດ້ຫ້ ການຮ່ວມມື ແລະ ສະໜັບສະໜູນການສຳຫລວດພົນລະເມືອງດ້ວຍການຮ່ວມມື ແລະ ໃຫ້ການສະໜັບສະໜູນ ໂດຍກົງແກ່ສູນສະຖິຕິແຫ່ງຊາດ.

ເມື່ອເວົ້າເຖິງພົນລະເມືອງ ສປປ ລາວ ຈະມີການຂະຫຍາຍຕົວຈາກ 7,4 ລ້ານຄົນໃນປັດຈຸບັນເປັນ 7,6 ລ້ານຄົນ ໃນປີ 2025 ແລະ 8,1 ລ້ານຄົນໃນປີ 2030 ຊຶ່ງຂໍ້ມູນ ດັ່ງກ່າວນີ້ຕ້ອງໄດ້ຮັບການຢືນ ຢັນຕື່ມຈາກການສໍາຫລວດຄັ້ງນີ້. ເປົ້າໝາຍ ຂອງການສໍາຫລວດພົນລະເມືອງ ແລະ ທີ່ຢູ່ອາໄສທົ່ວປະເທດ ຄັ້ງທີ V ປີ 2025 ແມ່ນຈົດນັບທຸກຄົນທີ່ດຳລົງຊີວິດຢູ່ ສປປ ລາວ ແລະ ມີໜ້າຢູ່ເປັນປະຈຳ 6 ເດືອນຂຶ້ນໄປ (De Jure) ແລະ ເກັບກຳຂໍ້ມູນທາງ ດ້ານເສດຖະກິດ-ສັງຄົມຂອງບຸກຄົນ ແລະ ຄົວເຮືອນໃຫ້ຄົບຖ້ວນ, ຖືກຕ້ອງ ແລະ ຊັດເຈນ ຊຶ່ງຜ່ານການສໍາ ຫລວດໃນ 4 ຄັ້ງ: ຄັ້ງທີ 1 ແມ່ນ ໄດ້ຈັດຕັ້ງປະຕິບັດ ໃນປີ 1985, ຄັ້ງທີ II ໃນປີ 1995, ຄັ້ງທີ III ໃນປີ 2005 ແລະ ຄັ້ງທີ IV ປີ 2015 ເປັນການສໍາຫລວດທີ່ ກວມ ເອົາເນື້ອໃນຂ້ອນຂ້າງຫລາຍ ເພື່ອສາມາດສະໜອງຂໍ້ມູນທີ່ສໍາຄັນກ່ຽວ ກັບການຂະຫຍາຍຕົວຂອງພົນລະເມືອງ, ຄຸນລັກສະນະຂອງພົນລະ ເມືອງ, ໂຄງປະກອບທາງດ້ານເພດ, ໝວດອາຍຸ, ສະພາບການເກີດ, ການເສຍຊີວິດ, ການຍົກຍ້າຍ, ຄຸນລັກ ສະນະຂອງທີ່ ຢູ່ອາໄສ, ການປະກອບອາຊີບ ແລະ ການເຂົ້າເຖິງການບໍລິການຕ່າງໆ ຂອງປະຊາຊົນບັນດາເຜົ່າໃນຂອບເຂດທົ່ວປະເທດ ເຖິງວ່າອັດຕາການ ເພີ່ມຂອງພົນລະເມືອງມີທ່າອ່ຽງ ຫລຸດລົງແຕ່ພົນລະເມືອງກໍຍັງ ມີການເພີ່ມຂຶ້ນແບບຄົງທີ່.

ການສໍາຫລວດພົນລະເມືອງ ແລະ ທີ່ຢູ່ອາໄສຄັ້ງນີ້ ແມ່ນຈະເປັນ ແຫລ່ງຂໍ້ມູນທີ່ສໍາຄັນໃນການຕີລາ ຄາສະພາບການດໍາລົງຊີວິດທາງ ດ້ານສັງຄົມ ແລະ ເສດຖະກິດສ່ວນ ໜຶ່ງໃນ 10 ປີທີ່ຜ່ານມາ ເພື່ອ ຮັບໃຊ້ໃຫ້ແກ່ການຕິດຕາມ ແລະ ປະເມີນ ການຈັດຕັ້ງປະຕິບັດແຜນ ພັດທະນາເສດຖະກິດ-ສັງຄົມແຫ່ງ ຊາດ ຄັ້ງທີ IX ແລະ ການກະກຽມ ສ້າງແຜນພັດທະນາເສດຖະກິດ-ສັງຄົມແຫ່ງຊາດ ຄັ້ງທີ X ທັງ ເປັນການສ້າງບົດລາຍງານແຫ່ງ ຊາດແບບສະໝັກໃຈ (VNR) ຂອງລັດຖະບານ, ລວມ ທັງການຕິດ ຕາມເປົ້າໝາຍການພັດທະນາ ແບບຍືນຍົງ ແລະ ວິໄສທັດຮອດປີ 2030, ສະນັ້ນ, ອີງໃສ່ຄວາມຈໍາ ເປັນດັ່ງກ່າວ ເຫັນວ່າຄວາມຕ້ອງ ການງົບປະມານທັງໝົດສໍາລັບ ການສໍາຫລວດ ແມ່ນ 450 ຕື້ກີບ ຫລື ປະມານ 23,7 ລ້ານໂດລາ. ຕໍ່ ກັບຄວາມຕ້ອງການດັ່ງກ່າວ ລັດຖະບານເຫັນໄດ້ຄວາມສໍາຄັນຕັດສິນ ໃຈ ເພີ່ມງົບປະມານເບື້ອງລັດຂຶ້ນ ຈາກ 5,4 ລ້ານໂດລາ ເປັນ 8,2 ລ້ານໂດລາ ກວມປະມານ 45% ຂອງງົບປະມານທີ່ສາມາດລະດົມໄດ້ ທັງໝົດໃນປັດຈຸບັນ.

KPL