ຂປລ. ໃນວາລະດຳເນີນກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ IX ພາກຕອນບ່າຍວັນທີ 3 ທັນວາ 2024 ພາຍໃຕ້ການເປັນປະທານຂອງ ທ່ານ ສູນທອນ ໄຊຍະຈັກ ຮອງປະທານສະພາແຫ່ງຊາດ, ນາງ ອາລີ ວົງໜໍ່ບຸນທຳ ປະທານຄະນະບໍລິຫານງານ ສູນກາງສະຫະພັນແມ່ຍິງລາວ ໄດ້ສະເໜີຮ່າງກົດໝາຍ ກົດໝາຍວ່າດ້ວຍ ສະຫະພັນແມ່ຍິງລາວ ສະບັບປັບປຸງ ເຊິ່ງປະກອບມີ 12 ພາກ, 8 ໝວດ, 58 ມາດຕາ. ໃນນັ້ນ, ປັບປຸງ 47 ມາດຕາ, ສ້າງໃໝ່ 7 ມາດຕາ. ຈາກນັ້ນ, ບັນດາສະມາຊິກສະພາປະຈຳເຂດເລືອກຕັ້ງຕ່າງໆ ກໍພ້ອມກັນສຸມໃສ່ຄົ້ນຄວ້າ, ປະກອບຄຳຄິດຄຳເຫັນໃສ່ຮ່າງ ກົດໝາຍດັ່ງກ່າວ ແນໃສ່ໃຫ້ມີເນື້ອໃນຄົບຖ້ວນ, ສົມບູນ, ຮັດກຸມ ແລະ ສາມາດນຳໄປຈັດຕັ້ງປະຕິບັດ ໃຫ້ສອດຄ່ອງກັບສະພາບຄວາມເປັນຈິງ ໃນປັດຈຸບັນ.

ທ່ານ ນາງ ອາລີ ວົງໜໍ່ບຸນທຳ ໄດ້ກ່າວວ່າ: ສະຫະພັນແມ່ຍິງລາວ ມີພາລະບົດບາດ ເປັນຕົວແທນໃນການພັດທະນາ, ການປົກປ້ອງສິດ ແລະ ຜົນປະໂຫຍດອັນຊອບທຳ ຂອງສະມາຊິກສະຫະພັນແມ່ຍິງ, ແມ່ຍິງບັນດາເຜົ່າ, ສຶກສາອົບຮົມ, ເຕົ້າໂຮມຄວາມສາມັກຄີ, ເສີມຂະຫຍາຍສິດເປັນເຈົ້າຂອງແມ່ຍິງລາວ ແລະ ສົ່ງເສີມຄວາມສະເໝີພາບຍິງ-ຊາຍ, ຮັກສາ ແລະ ສົ່ງເສີມຄຸນລັກສະນະ ທີ່ເປັນມູນເຊື້ອຂອງແມ່ຍິງລາວບັນດາເຜົ່າ, ປຸກລະດົມແມ່ຍິງລາວ ເຂົ້າຮ່ວມໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ. ນອກນີ້, ຍັງໄດ້ກຳນົດກົດລະບຽບ, ຂໍ້ກໍານົດວ່າດ້ວຍການຈັດຕັ້ງ ແລະ ການເຄື່ອນໄຫວ ຂອງສະຫະພັນ ແມ່ຍິງແຕ່ລະຂັ້ນ ແລະ ນິຕິກໍາໃຕ້ກົດໝາຍ ເຊິ່ງບັນດານິຕິກຳດັ່ງກ່າວ, ໄດ້ເປັນເຄື່ອງມືໃນການຄຸ້ມຄອງ-ນຳພາການເຄື່ອນໄຫວຽກງານ ຂອງສະຫະພັນແມ່ຍິງທຸກຂັ້ນ. ແຕ່ອີງໃສ່ການຂະຫຍາຍຕົວທາງດ້ານ ເສດຖະກິດ-ສັງຄົມ ໃນປັດຈຸບັນ, ໄດ້ຮຽກຮ້ອງໃຫ້ອົງການຈັດຕັ້ງລັດ-ອົງການຈັດຕັ້ງມະຫາຊົນ ໂດຍສະເພາະ ການຈັດຕັ້ງສະຫະພັນແມ່ຍິງລາວ ຕ້ອງມີການຄຸ້ມຄອງ-ນຳພາ ການເຄື່ອນໄຫວວຽກງານຂອງຕົນ ດ້ວຍກົດໝາຍ.

ທ່ານ ນາງ ອາລີ ວົງໜໍ່ບຸນທຳ ຍັງໃຫ້ຮູ້ອີກວ່າ: ກົດໝາຍວ່າດ້ວຍສະຫະພັນແມ່ຍິງລາວ ສ້າງຂຶ້ນແຕ່ 2013 ໄດ້ນໍາໃຊ້ມາເປັນເວລາ 10 ກວ່າປີ. ມາເຖິງປັດຈຸບັນ ອີງໃສ່ທ່າອ່ຽງການພັດທະນາເສດຖະ ກິດ-ສັງຄົມ ນັບມື້ຂະຫຍາຍຕົວຢ່າງກວ້າງຂວາງ ສະນັ້ນ, ອົງການຈັດຕັ້ງສະຫະພັນແມ່ຍິງລາວ ແຕ່ລະຂັ້ນມີຄວາມຈຳເປັນ ຈະຕ້ອງໄດ້ປັບປຸງພາລະບົດບາດ, ໜ້າທີ່ຂອງຕົນໃຫ້ສອດຄ່ອງກັບ ຄວາມຮຽກຮ້ອງຕ້ອງການ ຂອງໜ້າທີ່ການເມືອງໃນໄລຍະໃໝ່; ກົດໝາຍສະບັບນີ້, ມີເນື້ອໃນລັກສະນະກວມລວມ, ບໍ່ຮັດກຸມ; ຖ້າທຽບໃສ່ກົດໝາຍວ່າດ້ວຍການສ້າງນິຕິກຳ ເຫັນວ່າໂຄງຮ່າງຂອງກົດໝາຍ ຄວນໄດ້ຮັບການປັບປຸງ. ສະນັ້ນ, ກົດໝາຍ ວ່າດ້ວຍສະຫະພັນແມ່ຍິງລາວ ຈິ່ງມີຄວາມຈຳເປັນຕ້ອງໄດ້ຮັບການປັບປຸງ ໃຫ້ແທດເໝາະກັບສະພາບການຕົວຈິງໃນແຕ່ລະໄລຍະ.

ຂ່າວ: ກິດຕາ

ພາບ: ອ່າຍຄຳ

KPL