ຂປລ. ອົງຄະນະພັກ ຫ້ອງວ່າການສຳນັກງານນາຍົກລັດຖະມົນຕີ (ຫສນຍ) ຈັດເຜີຍແຜ່ເອກະສານ ວັນສຳຄັນ ຂອງພັກ-ຂອງຊາດ ໃນວັນທີ 29 ພະຈິກ 2024 ຜ່ານມາ ໂດຍການເປັນປະທານ ແລະ ເຜີຍແຜ່ໂດຍ ສະຫາຍ ບົວຄົງ ນາມມະວົງ ກຳມະການສູນກາງພັກ, ເລຂາຄະນະບໍລິຫານງານພັກ, ລັດຖະມົນຕີ, ຫົວໜ້າຫ້ອງວ່າການສໍານັກງານນາຍົກລັດຖະມົນຕີ, ມີບັນດາສະຫາຍ ຄະນະບໍລິຫານງານພັກ, ບັນດາສະຫາຍຄະນະໜ່ວຍພັກຮາກຖານ ພ້ອມດ້ວຍສະມາຊິກພັກ, ພະນັກງານ-ລັດຖະກອນ ພາຍໃນ ຫສນຍ ເຂົ້າຮ່ວມ.

ຈຸດປະສົງ ເພື່ອເຜີຍແຜ່ເຊື່ອມຊຶມບັນດາເນື້ອໃນ ຂອງເອກະສານວັນສຳຄັນ ຂອງພັກ-ຂອງຊາດ ໃຫ້ສະມາຊິກພັກ, ພະນັກງານ-ລັດຖະກອນ ທົ່ວອົງຄະນະພັກ ຫສນຍ ໄດ້ຮັບຮູ້, ເຂົ້າໃຈ, ກຳແໜ້ນ ແລະ ເປັນເອກະພາບ ຕໍ່ບັນດາເນື້ອໃນຈິດໃຈ ຂອງເອກະສານທີ່ນຳມາເຜີຍແຜ່ໃນຄັ້ງນີ້, ທັງສາມາດນຳ ໄປຈັດຕັ້ງຜັນຂະຫຍາຍ ສູ່ວຽກງານຕົວຈິງທີ່ຕົນເອງຮັບຜິດຊອບ ໃຫ້ແທດເໝາະ ແລະ ເກີດດອກອອກຜົນເປັນກ້າວໆ ແນໃສ່ເຮັດໃຫ້ສະມາຊິກພັກ, ພະນັກງານ-ລັດຖະກອນ ສືບຕໍ່ມີຄວາມໜັກແໜ້ນ ທາງດ້ານການເມືອງ-ແນວຄິດ, ມີຄຸນສົມບັດສິນທຳປະຕິວັດ, ມີຄວາມສາມັກຄີເປັນປຶກແຜ່ນ, ມີຄວາມຮັບຜິດຊອບສູງ ຕໍ່ວຽກງານທີ່ຖືກມອບໝາຍ, ຖອດຖອນເອົາບັນດາບົດຮຽນ ແລະ ປະສົບການອັນດີເລີດ ທີ່ບັນດາຜູ້ນຳ ແລະ ນັກຮົບປະຕິວັດ ທີ່ໄດ້ປະຕິບັດ ແລະ ສ້າງໄວ້ ໃນໄລຍະຜ່ານມາ ໄປໝູນໃຊ້ເຂົ້າໃນການດຳລົງຊີວິດ ແລະ ຈັດຕັ້ງປະຕິບັດເຂົ້າໃນຂົງເຂດວຽກງານຕົວຈິງ ໃນເງື່ອນໄຂໃໝ່ໃຫ້ເກີດປະໂຫຍດຕໍ່ປະເທດຊາດ ແລະ ປະຊາຊົນ.

ເອກະສານທີ່ນຳມາເຜີຍແຜ່ໃນຄັ້ງນີ້ ປະກອບມີ: ເອກະສານວັນຊາດ ທີ 2 ທັນວາ ຄົບຮອບ 49 ປີ (2 ທັນວາ 1975-2 ທັນວາ 2024); ເອກະສານ ວັນຄ້າຍວັນເກີດປະທານ ໄກສອນ ພົມວິຫານ ຄົບຮອບ 104 ປີ (13 ທັນວາ 1920-13 ທັນວາ 2024); ຄໍາສັ່ງແນະນໍາ ຂອງຄະນະເລຂາທິ ການສູນກາງພັກ ສະບັບເລກທີ 182/ຄລສພ, ລົງວັນທີ 12 ກໍລະກົດ 2024 ວ່າດ້ວຍການຜັນຂະ ຫຍາຍມະຕິ ຂອງກົມການເມືອງສູນກາງພັກ ກ່ຽວກັບການກະກຽມ ແລະ ສະເຫລີມສະຫລອງ 3 ວັນປະຫວັດສາດ; ມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 9 ສະໄໝທີ XI ເຊິ່ງບັນດາເນື້ອໃນເອກະສານເຫລົ່ານັ້ນ ໃຫ້ກຽດເຜີຍແຜ່ຂອງ ສະຫາຍ ບົວຄົງ ນາມມະວົງ ກຳມະການສູນກາງພັກ, ເລຂາຄະນະບໍລິຫານງານພັກ ຫສນຍ, ລັດຖະມົນຕີ, ຫົວໜ້າ ຫສນຍ ຊຶ່ງສະຫາຍ ໄດ້ຍົກໃຫ້ເຫັນມູນເຊື້ອອັນດີງາມ ແລະ ຄວາມສາມາດນຳພາຂອງພັກປະຊາຊົນ ປະຕິວັດລາວ ໃນການຕໍ່ສູ້ກູ້ຊາດ ຈົນສາມາດປົດປ່ອຍປະເທດຊາດຢ່າງສົມບູນ ແລະ ສະຖາປະນາສ້າງຕັ້ງເປັນ ສາທາລະນະລັດ ປະຊາທິປະໄຕ ປະຊາຊົນລາວ ຢ່າງສະຫງ່າຜ່າເຜີຍ ໃນວັນທີ 2 ທັນວາ 1975, ລວມທັງ ສະພາບການປົກປັກຮັກສາ ແລະ ສ້າງສາພັດທະນາປະເທດຊາດ ຕະຫລອດໄລຍະ 49 ປີຜ່ານມາ. ພ້ອມກັນນັ້ນ, ຍັງໄດ້ຍົກໃຫ້ເຫັນປະຫວັດ, ຜົນງານອັນຍິ່ງໃຫຍ່, ຄຸນງາມຄວາມດີ, ຄຸນສົມບັດສິນທໍາປະຕິວັດ, ຄວາມເປັນແບບຢ່າງນຳໜ້າ ຂອງປະທານ ໄກສອນ ພົມວິຫານ ຜູ້ນຳທີ່ແສນເຄົາລົບຮັກ ຂອງປະຊາຊົນບັນດາເຜົ່າ. ພາຍຫລັງຜູ້ເຂົ້າຮ່ວມກອງປະຊຸມ ໄດ້ຮັບຟັງການເຜີຍແຜ່ບັນດາເອກະສານສໍາເລັດແລ້ວ. ໃນໂອກາດນີ້, ສະຫາຍ ນາງ ສຸລິກັນ ພົມມະຈັນ ຮັກສາການຫົວໜ້າກົມຈັດຕັ້ງ ແລະ ພະນັກງານ ຍັງໄດ້ຂຶ້ນຜ່ານຂໍ້ຕົກລົງ ວ່າດ້ວຍການແບ່ງຄວາມຮັບຜິດຊອບ ຂອງຄະນະຫ້ອງວ່າການ ສຳນັກງານນາຍົກລັດຖະມົນຕີ ໃຫ້ຜູ້ເຂົ້າຮ່ວມ ໄດ້ຮັບຊາບຕື່ມອີກ.

ໃນຕອນທ້າຍ, ສະຫາຍ ປະທານກອງປະຊຸມ ໄດ້ໃຫ້ກຽດໂອ້ລົມ ແລະ ມີຄຳເຫັນເນັ້ນໜັກ ໃຫ້ບັນດາສະຫາຍ ສະມາຊິກພັກ-ພະນັກງານທົ່ວ ຫສນຍ ເອົາໃຈໃສ່ໃນຕໍ່ໜ້າຕື່ມບາງດ້ານ ເປັນຕົ້ນ ຈົ່ງພ້ອມກັນນຳເອົາເນື້ອໃນຈິດໃຈ ຂອງບັນດາເອກະສານ ທີ່ນຳມາເຜີຍແຜ່ເຊື່ອມຊຶມໃນຄັ້ງນີ້ ໄປຄົ້ນຄວ້າ ແລະ ຈັດຕັ້ງຜັນຂະຫຍາຍ ເຂົ້າສູ່ວຽກງານຕົວຈິງ ໃຫ້ເກີດດອກອອກຜົນ; ສືບຕໍ່ກະກຽມ ແລະ ດຳເນີນກອງປະຊຸມໃຫຍ່ ໃນຂັ້ນຂອງຕົນ ແລະ ກອງປະຊຸມໃຫຍ່ ຄັ້ງທີ VI ຂອງອົງຄະນະພັກ ຫສນຍ; ສືບຕໍ່ເປັນເສນາທິການ ໃນການກະກຽມກອງປະຊຸມຕ່າງໆ ຂອງລັດຖະບານ ໂດຍສະເພາະ ກອງປະຊຸມນາ ຍົກ-ຮອງນາຍົກລັດຖະມົນຕີ; ກອງປະຊຸມລັດຖະບານ ສະໄໝສາມັນ ແລະ ສະໄໝວິສາມັນ; ກອງປະ ຊຸມເປີດກວ້າງຂອງລັດຖະບານ ແລະ ກອງປະຊຸມສຳຄັນອື່ນໆ ຢ່າງເປັນເຈົ້າການ, ຮັບປະກັນປະສິດທິ ພາບ ແລະ ປະສິດທິຜົນ; ສືບຕໍ່ຈັດຕັ້ງປະຕິບັດແຜນການ ພັດທະນາວຽກງານ ຫສນຍ ໃຫ້ມີຜົນສຳເລັດຕາມຄາດໝາຍ ທີ່ກຳນົດໄວ້ ໂດຍສະເພາະ ບັນດາໂຄງການ ທີ່ຕິດພັນກັບການພັດທະນາວຽກງານ ຫສນຍ; ຮີບຮ້ອນກະກຽມສະຖານທີ່ເຮັດວຽກ ໃຫ້ແກ່ການນຳຂັ້ນສູງ ທີ່ປະຈຳ ຢູ່ ສນຍ, ລວມທັງ ການປັບປຸງຫ້ອງຮັບແຂກ, ຫ້ອງເຮັດວຽກຂອງພະນັກງານຈຳນວນໜຶ່ງ ແລະ ອື່ນໆ ພາຍໃນ ຫສນຍ ໃຫ້ສຳເລັດໂດຍໄວ, ພ້ອມດຽວກັນ ກໍໃຫ້ສືບຕໍ່ປະຕິບັດແຜນການ ປັບປຸງຍົກລະດັບຊີວິດການເປັນຢູ່ ຂອງພະນັກງານ-ລັດຖະກອນ ພາຍໃນ ຫສນຍ ໃຫ້ດີຂຶ້ນເປັນກ້າວໆ.

KPL