ຂປລ
ຂປລ. ສະຖານທູດຍີ່ປຸ່ນ ປະຈໍາ ລາວ ໄດ້ລົງນາມໃນຂໍ້ຕົກລົງ ວ່າດ້ວຍການສະໜັບສະໜູນ ທີ່ຈຳເປັນຕໍ່ການບັນເທົາທຸກຈາກໄພພິບັດ ແລະ ຄວາມໝັ້ນຄົງທາງດ້ານສະບຽງອາຫານຂອງ ສປປ ລາວ ເຊິ່ງສະບຽງອາຫານສຸກເສີນ ໂດຍຈະມອບໃຫ້ກະຊວງແຮງງານ ແລະ ສະຫວັດດີການສັງຄົມ
ຂປລ. ສະຖານທູດຍີ່ປຸ່ນ ປະຈໍາ ລາວ ໄດ້ລົງນາມໃນຂໍ້ຕົກລົງ ວ່າດ້ວຍການສະໜັບສະໜູນ ທີ່ຈຳເປັນຕໍ່ການບັນເທົາທຸກຈາກໄພພິບັດ ແລະ ຄວາມໝັ້ນຄົງທາງດ້ານສະບຽງອາຫານຂອງ ສປປ ລາວ ເຊິ່ງສະບຽງອາຫານສຸກເສີນ ໂດຍຈະມອບໃຫ້ກະຊວງແຮງງານ ແລະ ສະຫວັດດີການສັງຄົມ ໂດຍມີອົງການອາຫານໂລກ ແຫ່ງສະຫະປະຊາຊາດ ເປັນຜູ້ປະສານງານ ການກໍານົດເປົ້າໝາຍ ແລະ ການແຈກ ຢາຍ ໃນເວລາສຸກເສີນ ເຊິ່ງອົງການອາຫານໂລກ ມີແຜນຈະຈັດຊື້ເຂົ້າສານຈຳນວນ 440 ໂຕນ ແລະ ປອງປາ 90 ໂຕນ ທີ່ຜະລິດຢູ່ຍີ່ປຸ່ນ ແລະ ສົມທົບກັບທາງການລາວ ເພື່ອແຈກຢາຍສະບຽງອາຫານ ໃຫ້ແກ່ປະຊາຊົນປະມານ 38.000 ຄົນ ທີ່ຖືກຜົນກະທົບຈາກໄພພິບັດ.
ຍີ່ປຸ່ນ ມີສ່ວນສະໜັບສະໜູນ ຄວາມພະຍາຍາມຂອງ ສປປ ລາວ ໃນການກຽມຄວາມພ້ອມ ແລະ ຕອບສະໜອງ ສະຖານະການສຸກເສີນຢູ່ສະເໝີ ລວມເຖິງການຕອບສະໜອງ ຄວາມຕ້ອງການຮີບດ່ວນຂອງຊຸມຊົນ ທີ່ໄດ້ຮັບຜົນກະທົບຈາກໄພພິບັດ. ສໍາລັບເງິນທຶນຈາກໂຄງການຊ່ວຍເຫລືອ ດ້ານສະບຽງອາຫານ ຂອງລັດຖະບານຍີ່ປຸ່ນ ເພື່ອຂໍ້ລິເລີ່ມນີ້ ມີປະມານ 1,3 ລ້ານໂດລາສະຫະລັດ.
ທ່ານ ລີປາວ ຢ່າງ ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ (ຮສສ) ໃຫ້ຮູ້ວ່າ: ການຊ່ວຍເຫລືອເຂົ້າກິນ ແລະ ອາຫານສໍາເລັດຮູບ ໃຫ້ ສປປ ລາວ ໂດຍຜ່ານອົງການອາຫານໂລກ ໃນຄັ້ງນີ້ ແມ່ນມີຄວາມສໍາຄັນຫລາຍ ເຊິ່ງເປັນການສືບຕໍ່ຈາກການຈັດຕັ້ງປະຕິບັດ ໂຄງການຊ່ວຍ ເຫລືອເຂົ້າກິນ ໃຫ້ແກ່ຜູ້ ດ້ອຍໂອກາດ ແລະ ປະສົບໄພພິບັດ ທີ່ບໍ່ສາມາດເຂົ້າເຖິງການຄໍ້າປະກັນ ດ້ານສະດ້ານສະບຽງອາຫານ ໃຫ້ໃນປີ 2023 ຜ່ານມາ ແລະ ການຊ່ວຍເຫລືອດັ່ງກ່າວນີ້, ຈະເປັນການປະ ກອບສ່ວນ ໃຫ້ແກ່ການຈັດຕັ້ງປະຕິບັດ ເປົ້າໝາຍ ທີ 4, ແຜນວຽກຈຸດສຸມ ທີ 3, ການເພີ່ມທະວີການປ້ອງກັນ, ຄວບຄຸມ ແລະ ຟື້ນຟູຫລັງໄພພິບັດ ຕ່າງໆ ໃນປີສຸດທ້າຍ ຂອງແຜນພັດທະນາ ເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ 9 (2021-2025), ທັງເປັນການປະກອບສ່ວນຈັດຕັ້ງປະຕິບັດ ເປົ້າໝາຍຍຸດທະສາດ ການຫລຸດຜ່ອນຄວາມສ່ຽງໄພພິບັດແຫ່ງຊາດ ນັບແຕ່ 2021-2030 ໂດຍສະເພາະແມ່ນ ເປັນການຊ່ວຍເຫລືອໂດຍກົງໃຫ້ແກ່ ປະຊາຊົນ ທີ່ປະສົບໄພພິບັດ ໃນປີຜ່ານມາ ແລະ ປີນີ້ ໃຫ້ສາມາດ ປັບປຸງຊີວິດການເປັນຢູ່ ຂອງປະຊາຊົນ ກັບຄືນສູ່ສະພາບປົກກະຕິ ໂດຍໄວ.
ທ່ານ ຊຸໂຕມຸ ໂກອິຊູມິ ເອກອັກຄະຣາຊະທູດຍີ່ປຸ່ນ ປະຈຳ ສປປ ລາວ ໄດ້ກ່າວວ່າ: ໂຄງການນີ້ ມີຄວາມສຳຄັນຫລາຍ ເພາະຈະໃຫ້ການຊ່ວຍເຫລືອ ໃນກໍລະນີຂາດແຄນສະບຽງອາຫານໃນລະດູແລ້ງ, ທັງເປັນການຊ່ວຍເຫລືອໃນເວລາທີ່ຫຍຸ້ງຍາກລຳບາກ ສໍາລັບຊຸມຊົນທີ່ມີຄວາມສ່ຽງ. ຍີ່ປຸ່ນ, ໃນຖານະເປັນຄູ່ຮ່ວມມືຍຸດທະສາດຂອງລາວ, ໃຫ້ຄຳໝັ້ນສັນຍາ ທີ່ຈະສະໜັບສະໜູນ ການເສີມຂະຫຍາຍຄວາມຢືດຢຸ່ນຂອງລາວ ໂດຍຜ່ານການຮ່ວມມືຫລາຍດ້ານ ກັບຫລາຍອົງການເຊັ່ນ ອົງການອາຫານໂລກເປັນຕົ້ນ. ໂຄງການນີ້ເປັນສ່ວນໜຶ່ງ ຂອງແຜນຍຸດທະສາດຂອງ ອົງການອາຫານໂລກ ເພື່ອເພີ່ມທະວີຄວາມໝັ້ນຄົງ ດ້ານສະບຽງອາຫານ, ຫລຸດຜ່ອນການຂາດສານອາຫານ ແລະ ປັບປຸງຄວາມອາດສາມາດໃນການປັບຕົວ ໃນເຂດທີ່ມີຄວາມສ່ຽງຕໍ່ ການປະສົບໄພພິບັດ. ນອກຈາກການຕອບສະໜອງ ຄວາມຕ້ອງການແບບສຸກເສີນ. ຂໍ້ລິເລີ່ມນີ້, ຍັງຊ່ວຍເສີມສ້າງລະບົບ ການຮັບມືກັບໄພພິບັດ ໃນທ້ອງຖິ່ນໂດຍການຮ່ວມມືກັບກະຊວງແຮງງານ ແລະ ສະຫວັດດີການສັງຄົມ.
ທ່ານ ມາກ-ອານເດຣ ໂປຣສ ຜູ້ຕາງໜ້າ ອົງການອາຫານໂລກ ປະຈຳ ສປປ ລາວ ໄດ້ສະແດງຄວາມຂອບໃຈ ຕໍ່ການສະໜັບສະໜູນ ຂອງລັດຖະບານ ແລະ ປະຊາຊົນຍີ່ປຸ່ນ, ໃນເວລາທີ່ຄວາມທ້າທາຍ ຈາກດິນຟ້າອາກາດ ນັບມື້ນັບຮຸນແຮງຂຶ້ນ ແລະ ເຮັດໃຫ້ປະຊາຊົນລາວ ຫລາຍຮ້ອຍຄອບຄົວ ຕົກຢູ່ໃນສະພາວະ ຄວາມຍາກລຳບາກ, ດັ່ງທີ່ພວກເຮົາໄດ້ເຫັນໃນລະດູຝົນ ທີ່ຜ່ານມານີ້. ການປະກອບສ່ວນຂອງຍີ່ປຸ່ນ ຈະຮັບປະກັນວ່າ ຄອບຄົວເຫລົ່ານີ້ ຈະບໍ່ອຶດຫິວໃນເວລາທີ່ໄພພິບັດເກີດຂຶ້ນ. ຂໍ້ລິເລີ່ມນີ້, ໄດ້ເພີ່ມຄວາມພະຍາຍາມຢ່າງກວ້າງຂວາງ ໃນການເສີມຂະຫຍາຍລະບົບການປົກປ້ອງທາງສັງຄົມ ຂອງ ສປປ ລາວ ແລະ ຍັງສອດຄ່ອງກັບຍຸດທະສາດ ການຄຸ້ມຄອງທາງສັງຄົມແຫ່ງຊາດ ຂອງລັດຖະບານ ແລະ ຍຸດທະສາດແຫ່ງຊາດ ກ່ຽວກັບການຫລຸດຜ່ອນຄວາມສ່ຽງຈາກໄພພິບັດ ອີກດ້ວຍ.
KPL
