ຂປລ. ວັນຊາດ ທີ 2 ທັນວາ ເປັນວັນເອກອ້າງທະນົງໃຈ ຂອງປວງຊົນລາວທັງຊາດ ເຊິ່ງຕະຫລອດໄລຍະ ຜ່ານມາ, ພັກ-ລັດຖະບານ ລວມທັງອະດີດການນໍາ ພັກ-ລັດ ໄດ້ເປັນຄັນທຸງ ນໍາພາປະປະຊາຊົນລາວ ບັນດາເຜົ່າຕໍ່ສູ້ປົດປ່ອຍປະເທດຊາດ, ຍາດເອົາເອກະລາດ ແລະ ໄຊຊະນະອັນຍິ່ງໃຫຍ່ມາໃຫ້ປວງຊົນລາວ ຈົນນມາຮອດປັດຈຸບັນ, ພັກ-ລັດຖະບານ ກໍໄດ້ສືບຕໍ່ປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ຈະເລີນຮຸ່ງເຮືອງ.

ທ່ານ ທັນຕາ ກອງຜາລີ ສະມາຊິກສະພາແຫ່ງຊາດ (ສສຊ) ປະຈຳເຂດເລືອກຕັ້ງ 18 ແຂວງໄຊສົມບູນ, ຮອງປະທານກໍາມາທິການ ແຜນການ-ການເງິນ ແລະ ການກວດສອບ ສະພາແຫ່ງຊາດ ໄດ້ໃຫ້ສໍາພາດ ເມື່ອບໍ່ດົນນີ້ວ່າ: ວັນທີ 2 ທັນວາ ແມ່ນວັນທີ່ມີຄວາມໝາຍ ຄວາມສຳຄັນສຳລັບທົ່ວພັກ, ທົ່ວລັດ ແລະ ທົ່ວປວງຊົນລາວທັງຊາດ, ແມ່ນວັນແຫ່ງໄຊຊະນະອັນຍິ່ງໃຫຍ່ ໃນປະຫວັດສາດແຫ່ງ ການຕໍ່ສູ້ເປັນພັນໆປີ ຂອງຊາດລາວ ທີ່ປະຊາຊົນລາວບັນດາເຜົ່າໄດ້ມີອິດສະຫລະພາບ ແລະ ເປັນເຈົ້າຂອງປະເທດຢ່າງແທ້ຈິງ, ເປັນວັນແຫ່ງການກ້າວສູ້ຍຸກສະໄໝໃໝ່ ແຫ່ງສັນຕິພາບ ເອກະລາດ ປະຊາທິປະໄຕ ເອກະພາບ ວັດທະນະຖາວອນ ແລະ ມີຜົນສຳເລັດໃນການປົກປັກຮັກສາ ແລະ ສ້າງສາພັດທະນາປະເທດຊາດ. ໃນໂອກາດ ວັນຊາດ ທີ 2 ທັນວາ ຄົບຮອບ 49 ປີ (2 ທັນວາ 1975-2 ທັນວາ 2024) ທ່ານໄດ້ຕາງໜ້າໃຫ້ພະນັກງານ, ທະຫານ, ຕໍາຫລວດ ແລະ ປະຊາຊົນ ແຂວງໄຊສົມບູນ ທຸກຖ້ວນໜ້າ ສະແດງຄວາມຮູ້ບຸນຄຸນ ຕໍ່ການນໍາ ພັກ-ລັດ, ອະດີດການນໍາ ພັກ-ລັດ ທີ່ໄດ້ນໍາພາການຕໍ່ສູ້ຈົນສາມາດຍາດໄດ້ ໄຊຊະນະອັນຍິ່ງໃຫຍ່ ມາໃຫ້ປວງຊົນລາວ ທັງຊາດ ແລະ ສືບຕໍ່ປົກປັກຮັກສາ ແລະ ສ້າງສາພັດທະນາປະເທດຊາດ ໃນປັດຈຸບັນ.

ທ່ານ ທັນຕາ ກອງຜາລີ ຍັງໃຫ້ຮູ້ອີກວ່າ: ສໍາລັບ ແຂວງໄຊສົມບູນ ນັບແຕ່ໄດ້ສ້າງຕັ້ງຂຶ້ນມາ ກໍກ້າວເຂົ້າສູ່ປີທີ 12, ພາຍໃຕ້ການນຳພາຂອງພັກ ໂດຍສະເພາະການຊີ້ນຳ ແລະ ນຳພາຂອງອົງຄະນະພັກ ແຂວງໄຊສົມບູນ ໄດ້ເຮັດໃຫ້ແຂວງໄຊສົມສົມບູນ ໄດ້ຮັບການພັດທະນາຫລາຍດ້ານ ເປັນຕົ້ນ ໄດ້ເຮັດໃຫ້ພື້ນຖານໂຄງລ່າງ, ຖະໜົນຫົນທາງໄດ້ຮັບການພັດທະນາ ມີການເຊື່ອມຕໍ່ກັບບັນດາແຂວງທີ່ຕິດຈອດ, ຕາໜ່າງໄຟຟ້າ, ນໍ້າປະປາ ລວມທັງການພັດທະນາຂົງເຂດ ການຜະລິດ-ທຸລະກິດ, ວຽກງານການສຶກສາ, ສາທາລະນະສຸກ, ຖະແຫລງຂ່າວ, ວັດທະນະທໍາ ແລະ ຂົງເຂດອື່ນໆ ກໍໄດ້ຮັບການພັດທະນາດີຂຶ້ນຢ່າງຕໍ່ເນື່ອງ ແລະ ໄດ້ນໍາເອົາຜົນປະໂຫຍດ ມາໃຫ້ປະຊາຊົນ ແລະ ສ້າງເງື່ອນໄຂພື້ນຖານ ໃຫ້ປະຊາຊົນ ແຂວງ ໄຊສົມບູນ ກ້າວຂຶ້ນ ແລະ ຫລຸດພົ້ນອອກຈາກ ຄວາມທຸກຍາກເທື່ອລະກ້າວ.

ໂອກາດນີ້, ທ່ານ ທັນຕາ ກອງຜາລີ ໄດ້ອວຍພອນໄຊ ອັນປະເສີດ ໃຫ້ທ່ານຜູ້ນຳພັກ-ລັດ ຈົ່ງມີສຸຂະພາບ ແຂງແຮງ, ມີພະລະນາໄມສົມບູນ ແລະ ສືບຕໍ່ຊີ້ນຳ-ນໍາພາປະເທດຊາດ ໃຫ້ຈະເລີນກ້າວໜ້າຂຶ້ນຢ່າງບໍ່ຢຸດຢັ້ງ ແລະ ອວຍພອນ ໃຫ້ພະນັກງານ, ທະຫານ, ຕໍາຫລວດ, ຕະຫລອດຮອດປະຊາຊົນລາວ ບັນດາເຜົ່າໃນທົ່ວປະເທດ ຈົ່ງມີສຸຂະພາບແຂງແຮງ, ມີຄວາມຜາສຸກ ແລະ ຜົນສໍາເລັດໃນໜ້າທີ່ ວຽກງານທຸກປະການ.

ຂ່າວ: ສົມຫວັງ

KPL