ຂປລ. ໃນວັນທີ 28 ພະຈິກ 2024 ນີ້, ທ່ານ ທອງສະຫວັນ ພົມວິຫານ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂ່ຳນັບຂອງ ທ່ານ ບາເດີ ອັບດຸນລາ ຊາອີດ ບິນ ຊາເຢດ ອາລມາໂຕຣຊີ ເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສະຫະນະຄອນ ເອເມຣັດ ອາຣັບ ປະຈຳ ສປປ ລາວ (ສໍານັກງານການທູດຕັ້ງຢູ່ ນະຄອນຫລວງ ຮ່າໂນ້ຍ, ສສ ຫວຽດນາມ) ໃນໂອກາດທີ່ທ່ານມາເຂົ້າຮ່ວມ ພິທີສະເຫລີມສະຫລອງວັນຊາດ ແຫ່ງ ສປປ ລາວ ຄົບຮອບ 49 ປີ.

ໃນໂອກາດນີ້, ທ່ານລັດຖະມົນຕີ ທອງສະຫວັນ ພົມວິຫານ ໄດ້ສະແດງຄວາມຍິນດີຕ້ອນຮັບຕໍ່ ທ່ານເອກອັກຄະລັດຖະທູດ ບາເດີ ອັບດຸນລາ ຊາອີດ ບິນ ຊາເຢດ ອາລມາໂຕຣຊີ ພ້ອມດ້ວຍຄະນະ, ພ້ອມທັງໄດ້ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືອັນດີ ລະຫວ່າງ ສປປ ລາວ ແລະ ສະຫະນະຄອນ ເອເມຣັດ ອາຣັບ ພາຍຫລັງທີ່ໄດ້ສ້າງຕັ້ງ ສາຍພົວພັນການທູດນຳກັນ ໃນວັນທີ 15 ຕຸລາ 1996 (ຄົບຮອບ 28 ປີ) ສືບຕໍ່ໄດ້ຮັບການພັດທະນາຂຶ້ນຢ່າງຕໍ່ເນື່ອງ, ສອງຝ່າຍ ມີຄວາມເພິ່ງພໍໃຈຕໍ່ການພົວພັນຮ່ວມມືສອງຝ່າຍ ແລະ ໃຫ້ການສະໜັບສະໜູນ ແລະ ຊ່ວຍເຫລືອເຊິ່ງກັນ ແລະ ກັນ ໃນເວທີພາກພື້ນ ແລະ ສາກົນ, ໄດ້ມີການແລກປ່ຽນ ການຢ້ຽມຢາມເຊິ່ງກັນ ແລະ ກັນ ຂອງຄະນະຜູ້ແທນສອງປະເທດ ເປັນແຕ່ລະໄລຍະ, ລວມທັງໄດ້ມີການແລກປ່ຽນບັນດາສານສະ ແດງຄວາມຊົມເຊີຍ ໃນໂອກາດສຳຄັນຕ່າງໆ ຂອງຜູ້ນຳສອງປະເທດ ຢ່າງເປັນປົກກະຕິ. ພ້ອມນີ້, ທ່ານລັດຖະມົນຕີ ກໍໄດ້ສະເໜີໃຫ້ທ່ານທູດ ສືບຕໍ່ຊຸກຍູ້ການຈັດຕັ້ງປະຕິບັດ ບັນດາໂຄງການຮ່ວມມື ທີ່ສອງຝ່າຍໄດ້ລົງນາມກັນແລ້ວນັ້ນ ໃຫ້ມີປະສິດທິພາບ ແລະ ປະສິດທິຜົນສູງສຸດ, ຢືນຢັນຄືນຄວາມໝາຍໝັ້ນ ຂອງລັດຖະບານລາວ ຍິນດີສືບຕໍ່ເຮັດວຽກຢ່າງໃກ້ຊິດກັບຝ່າຍ ສະຫະນະຄອນ ເອເມຣັດ ອາຣັບ ເພື່ອຊຸກຍູ້ການຮ່ວມມື ໃນຂະແໜງການຕ່າງໆ ທີ່ມີທ່າ ແຮງຮ່ວມກັນ ເປັນຕົ້ນ ແມ່ນຂົງເຂດ ເສດຖະກິດ-ການຄ້າ, ການລົງທຶນ, ບໍ່ແຮ່, ພະລັງງານສະອາດ, ກະສິກຳ, ແຮງງານ, ການໂຮງແຮມ, ການທ່ອງທ່ຽວ ແລະ ການສຶກສາ. ພ້ອມນັ້ນ, ກໍໄດ້ສະເໜີໃຫ້ ທ່ານທູດ ສືບຕໍ່ຊຸກຍູ້ບັນດານັກທຸລະກິດ-ນັກລົງທຶນ ແລະ ນັກທ່ອງທ່ຽວ ຈາກ ສະຫະນະຄອນ ເອເມຣັດ ອາຣັບ ເຂົ້າມາ ສປປ ລາວ ຫລາຍຂຶ້ນ ໂດຍສະເພາະ ໃນປີ 2024 ນີ້ ສປປ ລາວ ແມ່ນຫາກໍສໍາເລັດ ການຈັດກອງປະຊຸມສຸດຍອດອາຊຽນ ຄັ້ງທີ 44-45 ແລະ ກອງປະຊຸມສຸດຍອດກ່ຽວຂ້ອງ ແລະ ປີນີ້ ກໍເປັນປີທ່ອງທ່ຽວລາວ 2024.

ໃນຂະນະດຽວກັນ, ທ່ານທູດ ບາເດີ ອັບດຸນລາ ຊາອີດ ບິນ ຊາເຢດ ອາລມາໂຕຣຊີ ກໍໄດ້ສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນໃນຄັ້ງນີ້, ພ້ອມທັງໄດ້ສະແດງຄວາມຊົມເຊີຍຕໍ່ ທ່ານ ທອງສະຫວັນ ພົມວິຫານ ໃນໂອກາດທີ່ໄດ້ຮັບການແຕ່ງຕັ້ງໃຫ້ດຳລົງຕຳແໜ່ງເປັນ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ຄົນໃໝ່, ຊົມເຊີຍຜົນສໍາເລັດ ການເປັນເຈົ້າພາບຈັດກອງປະຊຸມ ສຸດຍອດອາຊຽນ ຄັ້ງທີ 44-45,  ພ້ອມທັງຢືນຢັນວ່າຈະຊຸກຍູ້ສົ່ງເສີມ ໃຫ້ນັກທຸລະກິດຢູ່ປະເທດ ມາລົງທຶນຢູ່ລາວຫລາຍຂຶ້ນ, ໃນຫລາຍຂະແໜງການ, ໃນຂົງເຂດທ່າບົກ, ໂລຈິສຕິກ, ການຂົນສົ່ງ, ພະລັງງານສີຂຽວ ແລະ ການທ່ອງທ່ຽວ ຂອງ ສປປ ລາວ ທີ່ມີທ່າແຮງ ເພື່ອໃຫ້ປະຊາຊົນໄປມາຫາສູ່ກັນ ແລະ ອາດສຶກສາການເປີດຖ້ຽວບິນໂດຍກົງ, ການເພີ່ມໄລຍະເວລາການຍົກເວັ້ນວີຊານັກທ່ອງທ່ຽວ ແລະ ອື່ນໆ. ທັງນີ້, ກໍເພື່ອນໍາເອົາຜົນປະໂຫຍດສູງສຸດ ມາສູ່ປະຊາຊົນສອງປະເທດ, ສະແດງຄວາມຂອບໃຈ ຕໍ່ການສະໜັບສະໜູນຊ່ວຍເຫລືອ ຈາກລັດຖະບານ ແຫ່ງ ສປປ ລາວ ໃນໄລຍະຜ່ານມາ ໂດຍສະເພາະ ການສະໜັບສະໜູນເຊິ່ງກັນ ແລະ ກັນ ໃນເວທີພາກພື້ນ ແລະ ສາກົນ ກໍຄື ສປຊ.

ຂ່າວ-ພາບ: ກຕທ

KPL