ຂປລ.  ວັນທີ 4 ທັນວາ 2024, ທີ່ສໍານັກງານນາຍົກລັດຖະມົນຕີ, ທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີ ໄດ້ໃຫ້ກຽດຕ້ອນຮັບການເຂົ້າຢ້ຽມຂ່ຳນັບຂອງ ທ່ານ ໂຄອິຊຸມິ ຊຶໂຕະມຸ, ເອກອັກຄະຣາຊະທູດ ວິສາມັນຜູ້ມີອຳນາດເຕັມ ແຫ່ງ ຍີ່ປຸ່ນ ປະຈຳ ສປປ ລາວ ໃນໂອກາດທີ່ໄດ້ຮັບການແຕ່ງຕັ້ງ ມາປະຕິບັດໜ້າທີ່ ການທູດ ຢູ່ ສປປ ລາວ.

          ໃນໂອກາດດັ່ງກ່າວ, ທ່ານຮອງນາຍົກລັດຖະມົນຕີ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍຕໍ່ ທ່ານ ໂຄອິຊຶມິ ຊຶໂຕະມຸ ທີ່ໄດ້ຖືກແຕ່ງຕັ້ງ​ໃຫ້​ມາດໍາລົງຕໍາແໜ່ງ ເປັນເອກອັກຄະຣາຊະທູດວິສາມັນ ຜູ້ມີອໍານາດເຕັມ ແຫ່ງ ຍີ່ປຸ່ນ ປະຈໍາ ສປປ ລາວ ເຊິ່ງສະແດງເຖິງຄວາມໄວ້ເນື້ອເຊື່ອໃຈ ຈາກລັດຖະບານ ແລະ ປະຊາຊົນຍີ່ປຸ່ນ ໃຫ້ມາປະຕິບັດໜ້າທີ່ການທູດ ຢູ່ ສປປ ລາວ ເພື່ອສືບຕໍ່ເສີມຂະຫຍາຍ ສາຍພົວພັນມິດຕະພາບ ແລະ ການຮ່ວມມືອັນດີງາມ ທີ່ມີມາແຕ່ດົນນານ ຂອງສອງປະເທດພາຍໃຕ້ ການເປັນຄູ່ຮ່ວມຍຸດທະສາດ ແລະ ຈະກ້າວໄປສູ່ການຍົກລະດັບເປັນ ຄູ່ຮ່ວມຍຸດທະສາດຮອບ ດ້ານໃນໄວໆນີ້; ໄດ້ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືຢ່າງໃກ້ຊິດ ຂອງສອງປະເທດ, ການນໍາຂັ້ນສູງຂອງສອງປະເທດ ໄດ້ສືບຕໍ່ແລກປ່ຽນການຢ້ຽມຢາມ ພົບປະເຊິ່ງກັນ ແລະ ກັນ ຢ່າງເປັນປົກກະຕິ ເຊິ່ງໄລຍະເວລາ ບໍ່ພໍເທົ່າເດືອນຜ່ານມານີ້, ທ່ານ ອິຊິບະ ຊິເງະຣຸ ນາຍົກລັດຖະມົນຕີຍີ່ປຸ່ນ ​ໄດ້ເດີນທາງມາຢ້ຽມຢາມ ສປປ ລາວ ຢ່າງເປັນທາງການ ແລະ ໄດ້ເຂົ້າຮ່ວມ ກອງປະຊຸມສຸດຍອດອາຊຽນ ແລະ ກອງປະຊຸມສຸດຍອດທີ່ກ່ຽວຂ້ອງ ທີ່ ສປປ ລາວ ໄດ້ຮັບກຽດເປັນເຈົ້າພາບ; ສໍາລັບປີ 2025 ທີ່ຈະມາເຖິງນີ້ ຈະເປັນປີທີ່ມີຄວາມໝາຍສໍາຄັນ ໃນໂອກາດຄົບຮອບ 70 ປີ ແຫ່ງການສ້າງຕັ້ງສາຍພົວພັນການທູດ ລາວ-ຍີ່ປຸ່ນ; ຄົບຮອບ 10 ປີ ການເປັນຄູ່ຮ່ວມຍຸດທະສາດ ແລະ ຍັງເປັນປີຄົບຮອບ 60 ປີ ທີ່ຍີ່ປຸ່ນໄດ້ສົ່ງ ອາສາສະໝັກມາປະຈໍາຢູ່ ສປປ ລາວ (ເຊິ່ງຄັ້ງທໍາອິດ ແມ່ນໃນປີ 1965). ໃນໂອກາດອັນສໍາຄັນນີ້, ການນໍາຂັ້ນສູງຂອງ ສປປ ລາວ ຈະເດີນທາງຢ້ຽມຢາມປະເທດຍີ່ປຸ່ນ ເພື່ອສະເຫລີມສະຫລອງ ວັນສຳຄັນດັ່ງກ່າວ ໃຫ້ມີຄວາມໝາຍເລິກເຊິ່ງ ແລະ ຟົດຟື້ນ.

ທ່ານຮອງນາຍົກລັດຖະມົນຕີ ໄດ້ຖື​ໂອກາດ​ນີ້, ສະແດງຄວາມຂອບໃຈມາຍັງ ລັດຖະບານ ແລະ ປະຊາຊົນຍີ່ປຸ່ນ ທີ່ໃຫ້ການຊ່ວຍເຫລືອ ແລະ ສະໜັບສະໜູນ ໃນການພັດທະນາ ເສດຖະກິດ-ສັງຄົມ ຂອງ ສປປ ລາວ ຕະຫລອດໄລຍະຜ່ານມາ ໂດຍສະເພາະ ການພັດທະນາ ຂົງເຂດບຸລິມະສິດຂອງລາວ ເປັນຕົ້ນ  ການພັດທະນາຊັບພະຍາກອນມະນຸດ, ໂຄງລ່າງພື້ນຖານ, ການເກັບກູ້ລະເບີດບໍ່ທັນແຕກ (UXO), ສາທາລະນະສຸກ, ກະສິກໍາ-ປ່າໄມ້ ແລະ ອື່ນໆ ລວມທັງການສົ່ງຊ່ຽວຊານ ແລະ ອາສາສະໝັກ ຜູ້ທີ່ມີຄວາມຮູ້ຄວາມສາມາດ ແລະ ປະສົບການ ມາປະຈໍາຢູ່ບັນດາຂະແໜງການຕ່າງໆຂອງລາວ, ພິ ເສດ ແມ່ນໃຫ້ການຊ່ວຍເຫລືອ ແລະ ສະໜັບສະໜູນ ສປປ ລາວ ໃນການເປັນປະທານກອງປະຊຸມອາຊຽນ ໃນປີ2024ນີ້. ທ່ານຮອງນາຍົກລັດຖະມົນຕີ ຍັງເຊື່ອໝັ້ນວ່າ ການມາປະຕິບັດໜ້າທີ່ຂອງທ່ານເອກອັກຄະລັດຖະທູດ ຈະເປັນການປະກອບສ່ວນສໍາຄັນ ເຂົ້າໃນການເສີມຂະຫຍາຍສາຍພົວພັນມິດ ຕະພາບ ແລະ ການເປັນຄູ່ຮ່ວມຍຸດທະສາດ ລະຫວ່າງ ສອງປະເທດ ລາວ-ຍີ່ປຸ່ນ ໃຫ້ນັບມື້ນັບແໜ້ນແຟ້ນ ແລະ ມີປະສິດທິຜົນຍິ່ງໆຂຶ້ນ. ພ້ອມທັງ, ສະເໜີຕໍ່ທ່ານເອກອັກຄະຣາຊະທູດ ສືບຕໍ່ເຮັດວຽກຮ່ວມກັບ າກສ່ວນທີ່ກ່ຽວຂ້ອງຂອງ ສປປ ລາວ ເພື່ອເຮັດໃຫ້ການແລກປ່ຽນ ການຢ້ຽມຢາມຂອງການນຳຂັ້ນສູງ ຂອງສອງປະເທດ ໃຫ້ໄດ້ຮັບຜົນສຳເລັດຕາມລະດັບຄາດໝາຍ; ສືບຕໍ່ການຈັດຕັ້ງປະຕິບັດ ແຜນງານ-ໂຄງການຮ່ວມມືຂອງສອງປະເທດ ໃຫ້ໄດ້ຮັບຜົນສໍາເລັດ ມີປະສິດທິພາບ ແລະ ມີປະສິດທິ ຜົົນ; ຊຸກຍູ້ການຮ່ວມມືດ້ານການຄ້າ-ການລົງທຶນ ຂອງສອງປະເທດ ໃຫ້ພົ້ນເດັ່ນຂຶ້ນ; ຊຸກຍູ້ການທ່ອງ ທ່ຽວ ລະຫວ່າງ ປະຊາຊົນສອງຊາດ ໃຫ້ເປັນຂະບວນຟົດຟື້ນ ແລະ ມີຈໍານວນຫລາຍຂຶ້ນ; ສືບຕໍ່ລົງຢ້ຽມຢາມບັນດາແຂວງຂອງ ສປປ ລາວ ເພື່ອເຫັນໄດ້ສະພາບຕົວຈິງ ຂອງການພັດທະນາຢູ່ແຕ່ລະແຂວງ ເຊິ່ງເປັນການເພີ່ມທະວີຄວາມໃກ້ຊິດ ກັບບັນດາການນໍາ-ອົງການປົກຄອງທ້ອງຖິ່ນຂອງລາວ ຕື່ມອີກ.

   ໃນໂອກາດດຽວກັນ, ທ່ານເອກອັກຄະຣາຊະທູດ ກໍໄດ້ສະແດງຄວາມຂອບໃຈ ເປັນຢ່າງສູງຕໍ່ການຕ້ອນຮັບອັນອົບອຸ່ນຂອງທ່ານຮອງນາຍົກລັດຖະມົນຕີ ແລະ ໄດ້ຕີລາຄາສູງຕໍ່ສາຍພົວພັນມິດຕະພາບ ແລະ ການພົວພັນຄູ່ຮ່ວມຍຸດທະສາດ ຍີ່ປຸ່ນ-ລາວ ແລະ ໃຫ້ຄໍາໝັ້ນສັນຍາຈະປະຕິບັດໜ້າທີ່ ວຽກງານສຸດຄວາມສາມາດ ຂອງຕົນ ໃນການປະກອບສ່ວນ ຮັດແໜ້ນການພົວພັນຮ່ວມມື ຍີ່ປຸ່ນ-ລາວ ໃຫ້ມີການຂະຫຍາຍຕົວຢ່າງຕໍ່ເນື່ອງ, ພ້ອມທັງ ຢືນຢັນວ່າຈະສືບຕໍ່ປະສານງານ ແລະ ເຮັດວຽກຮ່ວມກັບພາກສ່ວນຕ່າງໆ ຂອງ ສປປ ລາວ ເພື່ອຮັດແໜ້ນ ແລະ ເສີມຂະຫຍາຍສາຍພົວພັນຮ່ວມມືທີ່ດີ ລະຫວ່າງ ສອງປະເທດ ຍີ່ປຸ່ນ-ລາວ ໃຫ້ເກີດດອກອອກຜົນຍິ່ງໆຂຶ້ນ.

ຂ່າວ-ພາບ: ກົມປະຊາສຳພັນ, ຫສນຍ

KPL