*ກອງທັບປະຊາຊົນລາວ ມີມູນເຊື້ອອັນສະຫງ່າອົງອາດ, ມີຄວາມຈົ່ງຮັກພັກດີຕໍ່ພັກ, ຕໍ່ປະຊາຊົນ, ຕໍ່ອຸດົມການສັງຄົມນິຍົມ, ໃນການຕໍ່ສູ້ກູ້ຊາດຍືດເຍື້ອຍາວນານ ໄດ້ຢັ້ງຢືນຢ່າງຈະແຈ້ງວ່າກອງທັບປະຊາຊົນລາວ ມາຈາກປະຊາຊົນໂດຍປະຊາຊົນ ແລະ ເພື່ອປະຊາຊົນ, ມີນ້ຳໃຊ້ເສຍສະຫລະອັນສູງສົ່ງພ້ອມທັງຍອມເສຍສະຫລະຊີວິດຕົນ ເພື່ອຊາດເພື່ອປະຊາຊົນ ເຊິ່ງສິ່ງເຫລົ່ານີ້ມັນໄດ້ກາຍເປັນມູນເຊື້ອອັນສະຫງ່າງາມອົງອາດຂອງກອງທັບ ແລະ ກຳລັງປະກອບອາວຸດຂອງປະຊາຊົນເຮົາຕະຫລອດມາ.

    ຄວາມສາມັກຄີເປັນມູນເຊື້ອອັນປະເສີດຂອງຊາດລາວ ແລະ ເປັນທາດແທ້ອັນດີງາມທີ່ມີມາແຕ່ໃດໆຂອງປະຊາຊົນລາວບັນດາເຜົ່າ. ດ້ວຍເຫດນັ້ນ, ກອງທັບເຮົາເວລາໃດກໍຖືຄວາມສາມັກຄີເປັນປັດໄຈສຳຄັນກວ່າໝູ່ຂອງຄວາມເປັນ ເອກະພາບແຫ່ງຊາດ. ກອງທັບເຮົາຍາມໃດກໍໄດ້ເອົາໃຈໃສ່ຢ່າງຈົດຈໍ່ຕໍ່ຄວາມສາມັກຄີປອງດອງອີງໃສ່ປະຊາຊົນຢ່າງໜັກແໜ້ນ ເພື່ອຕໍ່ສູ້ຕ້ານສັດຕູຜູ້ຮຸກຮານ, ເຮັດໃຫ້ການຕໍ່ສູ້ກູ້ຊາດຂອງກອງທັບປະຊາຊົນລາວເຕີບໃຫຍ່ຂະຫຍາຍຕົວ ແລະ ຍາດໄດ້ໄຊຊະນະຢ່າງສົມບູນ.

  ກອງທັບປະຊາຊົນລາວ ໄດ້ສາມັກຄີກັບກອງທັບປະຊາຊົນບັນດາປະເທດສັງຄົມນິຍົມອ້າຍນ້ອງ ແລະ ບັນດາປະເທດເພື່ອນມິດທີ່ກ້າວໜ້າໃນໂລກ, ໂດຍສະເພາະແມ່ນຄວາມສາມັກຄີຮ່ວມສຳພັນສູ້ຮົບແບບພິເສດກັບກອງທັບ ແລະ ປະຊາຊົນຫວຽດນາມອ້າຍ ນ້ອງ. ໃນພາລະກິດປະຕິວັດປົດປ່ອຍຊາດ, ກອງທັບເຮົາກໍໄດ້ຖືສຳຄັນຄວາມສາມັກຄີສູ້ຮົບຕ້ານ ຈັກກະພັດຜູ້ຮຸກຮານເຊິ່ງໄດ້ກາຍ ເປັນກົດເກນແນ່ນອນອັນໜຶ່ງ ເພື່ອຍາດເອົາໄຊຊະນະພິເສດໃນສາຍພົວພັນສາມັກຄີສູ້ຮົບອັນແໜ້ນແຟ້ນເລິກເຊິ່ງລະຫວ່າງລາວກັບຫວຽດນາມ ເຊິ່ງກຳລັງປະກອບອາວຸດປະຊາຊົນລາວຍາມໃດກໍໄດ້ຄຽງບ່າຄຽງໄຫລ່ສູ້ຮົບ ແລະ ໄດ້ຮັບການຊ່ວຍເຫລືອຢ່າງຈິງໃຈຈາກພັກ, ລັດ ແລະ ປະຊາຊົນຫວຽດນາມ. ພ້ອມກັນນ້ັນ, ກໍໄດ້ຍາດແຍ່ງການສະໜັບສະໜູນ ແລະ ການຊວຍເຫລືອຂອງສາກົນ ໂດຍສະເພາະແມ່ນບັນດາປະເທດສັງຄົມນິຍົມອ້າຍນ້ອງ.

   ກອງທັບປະຊາຊົນລາວ ເວລາໃດກໍຮັກສາມູນເຊື້ອອັນດີງາມມີປະຊາທິປະໄຕ ແລະ ມີລະບຽບວິໄນ. ພັກເຮົາຖືວ່າ: ປະຊາທິປະໄຕ ທັງແມ່ນຈຸຸດໝາຍທັງແມ່ນກຳລັງດັນຂອງພາລະກິດປະຕິວັດຂອງປະເທດເຮົາ, ການເສີມຂະຫຍາຍປະຊາທິປະໄຕ ແມ່ນຂະບວນວິ ວັດໜ່ຶງທີ່ຕິດພັນກັບຈັງຫວະຂະຫຍາຍຕົວໃນທຸກດ້ານຂອງປະເທດຊາດ, ດັ່ງນ້ັນ ກອງທັບເຮົາເວລາໃດກໍໄດ້ຍົກສູງ ແລະ ເປີດກວ້າງປະຊາທິປະໄຕ, ເຄົາລົບ ແລະ ປະຕິບັດລະບຽບວິໄນເຂັ້ມງວດ, ປະຕິບັດສິດເປັນເຈົ້າຂອງ ປະຊາຊົນ ຢ່າງເຕັມສ່ວນ ແລະ ຄົບຖ້ວນ, ຕັ້ງໜ້າປົກປັກຮັກສາຄວາມເປັນເອກະລາດ ອະທິປະໄຕຂອງຊາດ ແລະ ລະບອບປະຊາທິປະໄຕ ປະຊາຊົນ ໄວ້ໄດ້ຢ່າງໝັ້ນຄົງ.

KPL