ຂປລ. ກອງປະຊຸມ ຄົບຄະນະບໍລິຫານງານ ແຂວງສະຫວັນນະເຂດ ເປີດກວ້າງ ຄັ້ງທີ 19 ສະໄໝທີ IX ຈັດຂຶ້ນຢ່າງເປັນທາງການ ໃນຕອນເຊົ້າວັນທີ 7 ກໍລະກົດ 2025 ທີ່ສະໂມສອນຫ້ອງວ່າການແຂວງ ພາຍໃຕ້ການເປັນປະທານຂອງ ສະຫາຍ ບຸນທອງ ຈິດມະນີ ກໍາມະການກົມການເມືອງສູນກາງພັກ, ຜູ້ປະຈໍາການຄະນະເລຂາທິການສູນກາງພັກ, ຮອງປະທານປະເທດ ແລະ ສະຫາຍ ບຸນໂຈມ ອຸບົນປະເສີດ ກໍາມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງສະຫວັນນະເຂດ, ມີສະຫາຍຮອງເລຂາພັກແຂວງ, ຄະນະປະຈໍາພັກແຂວງ, ກຳມະການພັກແຂວງ, ເລຂາຄະນະບໍລິຫານງານ ພັກເມືອງ-ນະຄອນ, ເລຂາຄະນະພັກກອງບັນຊາການ ປກຊ-ປກສ ແຂວງ, ເລຂາຄະນະພັກຮາກຖານ-ເລຂາໜ່ວຍພັກຮາກຖານ ພະແນກການອ້ອມຂ້າງແຂວງ ແລະພາກສ່ວນກ່ຽວຂ້ອງ ເຂົ້າຮ່ວມ.

ໂອກາດນີ້, ສະຫາຍ ບຸນໂຈມ ອຸບົນປະເສີດ ໄດ້ກ່າວເປີດກອງປະຊຸມຢ່າງເປັນທາງການ ວ່າ: ກອງປະຊຸມໃນຄັ້ງນີ້, ແມ່ນມີຄວາມສຳຄັນຫລາຍ ເພາະວ່າຈະໄດ້ພ້ອມກັນສະຫລຸບຕີລາຄາຄືນ ກ່ຽວກັບວຽກງານ ການນໍາພາ-ຊີ້ນໍາວຽກງານຮອບດ້ານ ຂອງຄະນະບໍລິຫານງານພັກແຂວງ ໄລຍະ 6 ເດືອນຜ່ານມາ ແລະ ວາງທິດທາງແຜນການ 6 ເດືອນທ້າຍປີ ຫລື ແຜນໝົດປີ 2025, ຈະໄດ້ພ້ອມກັນສະຫລຸບຕີລາຄາ ການນໍາພາຂອງຄະນະບໍລິຫານງານພັກແຂວງ ໃນທຸກຂົງເຂດວຽກງານ ນັບແຕ່ວຽກງານການເມືອງ-ແນວຄິດ, ວຽກງານປ້ອງກັນຊາດ-ປ້ອງກັນຄວາມສະຫງົບ, ວຽກງານພັດທະນາເສດຖະກິດ-ສັງຄົມ, ວຽກງານຂົງເຂດບໍລິຫານລັດ, ວຽກງານນິຕິບັນຍັດ, ວຽກງານຕຸລາການ-ຍຸຕິທໍາ, ວຽກງານແນວລາວສ້າງຊາດ, ສະຫະພັນນັກຮົບເກົ່າ ແລະ ອົງການຈັດຕັ້ງມະຫາຊົນ ຕະຫລອດຮອດວຽກງານ ກໍ່ສ້າງພັກ-ພະນັກງານ ແລະວຽກງານກວດກາກວດສອບພາຍໃນແຂວງ ແລະ ຮັບຟັງການປະກອບຄຳຄິດຄຳເຫັນ ຈາກພາກສ່ວນຕ່າງໆ ກ່ຽວກັບວຽກງານຈັດຕັ້ງປະຕິບັດ ແຜນພັດທະນາ ເສດຖະກິດ-ສັງຄົມໄລຍະ 6 ເດືອນຕົ້ນປີ ແລະແຜນການທ້າຍປີ 2025 ເພື່ອຕີລາຄາໃຫ້ເລິກເຊິ່ງ, ຍົກໃຫ້ເຫັນຜົນງານທີ່ຍາດມາໄດ້ ເພື່ອສຶບຕໍ່ເສີມຂະຫຍາຍ, ຕີລາຄາຈຸດອ່ອນ-ຂໍ້ຄົງຄ້າງ, ຊອກໃຫ້ເຫັນສາເຫດເພື່ອຈະໄດ້ເອົາໃຈໃສ່ ປັບປຸງແກ້ໄຂ ແລະຖອດຖອນບັນດາບົດຮຽນ ຈາກການຈັດຕັ້ງປະຕິບັດວຽກງານຕົວຈິງໃນໄລຍະ 6 ເດືອນຜ່ານມາ ເພື່ອນໍາໄປຜັນຂະຫຍາຍ. ພ້ອມນັ້ນ, ຈະໄດ້ພ້ອມກັນຄົ້ນຄວ້າປະກອບຄຳເຫັນ ໃສ່ທິດທາງການນໍາພາ-ຊີ້ນໍາຂອງຄະນະພັກແຂວງໃນໄລຍະ 6 ເດືອນທ້າຍປີ ກໍຄື ທິດທາງແຜນການໝົດປີ 2025 ທີ່ຈະຕ້ອງສູ້ຊົນຈັດຕັ້ງປະຕິບັດ ແນໃສ່ນໍາພາ ແລະຊີ້ນໍາການປັບປຸງພັກທາງດ້ານການເມືອງ-ແນວຄິດ, ປັບປຸງການຈັດຕັ້ງໃຫ້ປອດໃສ, ເຂັ້ມແຂງ, ໜັກແໜ້ນ; ຕັ້ງໜ້າແກ້ໄຂບັນດາປະກົດການຫຍໍ້ທໍ້ຕ່າງໆ ທີ່ເກີດຂຶ້ນໃນສັງຄົມ ຕິດພັນກັບການຈັດຕັ້ງປະຕິບັດ ແຜນພັດທະນາ ເສດຖະກິດ-ສັງຄົມຂອງແຂວງ ເພື່ອຜັນຂະຫຍາຍ 2 ວາລະແຫ່ງຊາດໃນການແກ້ໄຂບັນຫາຢາເສບຕິດ ແລະ ແກ້ໄຂບັນຫາຄວາມຫຍຸ້ງຍາກ ທາງດ້ານເສດຖະກິດ-ການເງິນ ແລະ ແກ້ໄຂຄວາມທຸກຍາກຂອງປະຊາຊົນ.

ໂອກາດນີ້, ສະຫາຍເລຂາພັກແຂວງ ຍັງໄດ້ຮຽກຮ້ອງໃຫ້ບັນດາສະຫາຍ ຈົ່ງພ້ອມກັນສຸມສະຕິປັນຍາ ແລະຍົກສູງຄວາມຮັບຜິດຊອບ ຂອງຕົນເຂົ້າໃນການຄົ້ນຄວ້າຄິດຫງຳ ແລະ ປະກອບຄຳເຫັນຢ່າງຕັ້ງໜ້າ; ເອົາໃຈໃສ່ແລກປ່ຽນບົດຮຽນ ຈາກພຶດຕິກຳຕົວຈິງຂອງພະແນກການ, ກົມກອງຂອງຕົນ; ອັນສຳຄັນແມ່ນຢາກໃຫ້ພວກສະຫາຍ ລົງເລິກປະກອບຄຳເຫັນໃສ່ຮ່າງບົດລາຍງານການເມືອງ, ແຜນພັດທະນາເສດຖະກິດ-ສັງຄົມ ແລະ ບົດສໍາຫລວດການນໍາພາລວມ ຂອງຄະນະບໍລິຫານງານພັກແຂວງ ຊຸດທີ IX ຕໍ່ກອງປະຊຸມໃຫຍ່ຄັ້ງທີ X ຂອງອົງຄະນະພັກແຂວງ ໃຫ້ມີເນື້ອໃນທີ່ຄົບຖ້ວນ ແລະສົມບູນຍິ່ງຂຶ້ນ.

ໃນວາລະກອງປະຊຸມ ໄດ້ຮັບຟັງການຜ່ານບົດສະຫລຸບການນຳພາ-ຊີ້ນຳວຽກງານຮອບດ້ານ ຂອງຄະນະບໍລິຫານງານພັກແຂວງປະຈຳ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2025, ຮັບຟັງການລາຍງານການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ແລະແຜນງົບປະມານປະຈຳ 6 ເດືອນຕົ້ນປີ ແລະ ທິດທາງແຜນການສູ້ຊົນ 6 ເດືອນທ້າຍປີ 2025, ເຜີຍແຜ່ເຊື່ອມຊຶມມະຕິກອງປະຊຸມ ຄົບຄະນະບໍລິຫານງານສູນກາງພັກ ຄັ້ງທີ 10 ສະໄໝທີ XI, ຜ່ານຮ່າງລາຍງານການເມືອງ ກອງປະຊຸມໃຫຍ່ຜູ້ແທນອົງຄະນະພັກແຂວງ ຄັ້ງທີ X, ຜ່ານຮ່າງແຜນພັດທະນາ ເສດຖະກິດ-ສັງຄົມ 5 ປີ ຄັ້ງທີ X. ຈາກນັ້ນ, ຜູ້ເຂົ້າຮ່ວມກໍຈະໄດ້ພ້ອມກັນ ປະກອບຄໍາເຫັນໃສ່ຮ່າງບົດລາຍງານການເມືອງ, ແຜນພັດທະນາເສດຖະກິດ-ສັງຄົມ ແລະບົດສໍາຫລວດການນໍາພາລວມ ຂອງຄະນະບໍລິຫານງານພັກແຂວງ ຊຸດທີ IX ຕື່ມອີກ.

KPL