ຂປລ. ກອງປະຊຸມຮ່ວມມືຕ້ານຢາເສບຕິດ 6 ປະເທດລຸ່ມແມ່ນໍ້າຂອງ ຈັດຂຶ້ນໃນວັນທີ 25 ມິຖຸນາ 2024 ຢູ່ເຂດເສດຖະກິດພິເສດສາມຫລ່ຽມຄໍາ ເມືອງຕົ້ນເຜີ້ງ ແຂວງບໍ່ແກ້ວ ສປປ ລາວ ໂດຍການເປັນປະ ທານຂອງ ທ່ານ ພົຕ ຄໍາກິ່ງ ຜຸຍຫລ້າມະນີວົງ ຮອງລັດຖະມົນຕີ ກະຊວງປ້ອງກັນຄວາມສະຫງົບ, ມີຮອງເຈົ້າແຂວງ ບໍ່ແກ້ວ, ຜູ້ຕາງໜ້າຫ້ອງການ ອົງການສະຫະປະຊາຊາດ ເພື່ອຕ້ານຢາເສບຕິດ ແລະ ອາດຊະຍາກຳ (UNODC) ປະຈໍາລາວ, ຕ່າງໜ້າຈາກສະຖານທູດປະຈໍາລາວ 5 ປະທດ ແລະ ເຈົ້າໜ້າທີ່ຈາກປະເທດ ສະມາຊິກລຸ່ມແມ່ນໍ້າຂອງ 6 ປະເທດ ຄື: ສປ ຈີນ, ມຽນມາ, ລາວ, ໄທ ກໍາປູເຈຍ ແລະ ສສ ຫວຽດນາມ ເຂົ້າຮ່ວມ ເພື່ອປະເມີນສະພາບ ການແກ້ໄຂສິ່ງທ້າທາຍໃນຕໍ່ໜ້າຮ່ວມກັນ ໃຫ້​ມີ​ໝາກ​ມີ​ຜົນ, ແນ​ໃສ່ການ​ສະ​ກັດ​ກັ້ນ ແລະ ແກ້​ໄຂ ບັນຫາຢາເສບຕິດ ທີ່ເປັນອຸປະສັກ, ເປັນໄພອັນຕະລາຍຂົ່ມຂູ່ ແລະ ສົ່ງຜົນກະທົບ ຕໍ່ການພັດທະນາເສດຖະກິດ-ສັງຄົມ ​ໃຫ້ມີທ່າອ່ຽງ​ທີ່​ດີຂຶ້ນ ແລະ ສາ​ມາດ​ຈຳ​ກັດ​ການຂະຫຍາຍ​ຕົວ ​ຂອງ​ຢາ​ເສບ​ຕິດ​ໃຫ້​ມີ​ລັກ​ສະ​ນະແຄບ​ລົງ.

ທ່ານ ພົຕ ຄໍາກິ່ງ ຜຸຍຫລ້າມະນີວົງ ຮອງລັດຖະມົນຕີ ກະຊວງປ້ອງກັນຄວາມສະຫງົບ ໄດ້ມີຄຳເຫັນວ່າ: ບັນ​ຫາ​ຢາ​ເສບ​ຕິດ ເປັນ​ໄພ​ອັນ​ຕະ​ລາຍຮ້າຍ​ແຮງ ແລະ ມີ​ການ​ແພ່​​ລະ​ບາດເປັນ​ວົງ​ກວ້າງ ແຕ່ຕົວເມືອງໄປ​ສູ່ຊົນນະບົດ ໃນຫລາຍລະດັບທີ່ ແຕກຕ່າງກັນ, ​ກາຍເປັນສາເຫດພາ​ໃຫ້​ເກີດ​ ບັນ​ຫາປະ​ກົດ​ການ​ຫຍໍ້​ທໍ້ ແລະ ອາ​ຊະ​ຍາ​ກຳ​ປະ​ເພດ​ຕ່າງໆໃນ​ສັງ​ຄົມ, ຈຳ​ນວນ​ຄະ​ດີ​ຢາ​ເສບ​ຕິດ, ​ຜູ້​ຖືກ​ຫາ, ນັກ​ໂທດ ​ຜູ້​ຕິດ​ເສບຢາເສບຕິດ ນຳໃຊ້ສານເສບຕິດ ລວມ ເຖິງຈຳ​ນວນ​ຕົວເລກຢາ​ເສບ​ຕິດ​ ແຕ່​ລະ​ປະ​ເພດໄດ້ມີການເພີ່ມຂຶ້ນຢ່າງ​ໜ້າ​ເປັນ​ຫວ່ງ. ພ້ອມດຽວກັນ, ເລ່ຫລ່ຽມ ການ​ເຄື່ອນ​ໄຫວຂົນສົ່ງ, ຄ້າຂາຍ,​ ຜະລິດຢາ​ເສບ​ຕິດ ມີລັກ​ສະ​ນະ​ເລິກ​ແລບ​ແນບ​ນຽນ ​ດ້ວຍຫລາຍວິ​ທີ​ການ-ຫລາຍ ຮູບ​ການ​ທີ່​ສະ​ຫລັບ​ສັບ​ຊ້ອນ, ​ການ​​ເຄື່ອນ​ໄຫວມີ​ລັກ​ສະ​ນະ​ ເປັນກຸ່ມ​ເຄືອ​ຂ່າຍ​ເຊື່ອມ​ໂຍງ​ທັງ​ພາຍ​ໃນ ແລະ ຕ່າງ​ປະ​ເທດ.

ສປປ ລາວ ກໍຄື ບັນດາປະເທດລຸ່ມແມ່ນ້ຳຂອງ ພວກເຮົາໄດ້ຮັບຜົນກະທົບໂດຍກົງ ແລະ ຜະເຊີນກັບໄພ ຂົ່ມຂູ່ຈາກບັນຫາຢາເສບຕິດ ຢ່າງຫລີກລ່ຽງບໍ່ໄດ້. ປັດຈຸບັນ, ຢາເສບຕິດໄດ້ສົ່ງຜົນກະທົບຮ້າຍ​ແຮງ ໃນທຸກ​ເພດ-ທຸກ​ໄວ, ທຸກຊັ້ນຄົນໃນທົ່ວສັງຄົມ, ນັບແຕ່ນັກຮຽນ-ນັກສຶກສາ, ພໍ່ຄ້າຊາວຂາຍ, ​ກຳ​ມະ​ກອນ, ຜູ້ວ່າງ​ງານ ຕະ ຫລອດຮອດພະນັກງານ, ລັດ​ຖະ​ກອນຈຳນວນໜຶ່ງ, ເປັນສາເຫດພາໃຫ້ເກີດ​​ປະ​ກົດ​ການ​ຫຍໍ້​ທໍ້, ເປັນ​ການກົດໜ່ວງ ຖ່ວງດຶງ ການພັດທະນາເສດຖະກິດ, ວັດ​ທະ​ນະ​ທຳ-ສັງ​ຄົມ, ສົ່ງຜົນກະທົບຕໍ່ ຄວາມໝັ້ນຄົງ ທາງດ້ານການເມືອງ ແລະ ຄວາມເປັນລະບຽບ ຮຽບຮ້ອຍ-ປອດ​ໄພຂອງສັງຄົມ.

ທ່ານ ພົຕ ຄໍາກິ່ງ ຜຸຍຫລ້າມະນີວົງ ຍັງໃຫ້ຮູ້ອີກວ່າ: ລັດ​ຖະ​ບານ ຍາມໃດກໍເຫັນຄວາມສຳຄັນ ແລະ ເອົາໃຈ ໃສ່ຢ່າງຈິງຈັງ, ຜ່ານມາກໍໄດ້ມີການຮ່ວມມືກັບບັນດາປະເທດ ເຊິ່ງສະແດງອອກໃນ ການເຂົ້າຮ່ວມເປັນພາຄີສົນ ທິສັນຍາສາກົນ ວ່າດ້ວຍການສະກັດກັ້ນ, ຕ້ານຢາເສບຕິດ ແລະ ສານອອກລິດຕໍ່ຈິດປະສາດ 3 ສະບັບ; ລົງນາມ ບົດບັນທຶກການຮ່ວມມືສອງຝ່າຍ ວ່າດ້ວຍການສະກັດກັ້ນ, ຕ້ານຢາເສບຕິດ ກັບ 13 ປະເທດ; ລົງນາມໃນບົດບັນ ທຶກຄວາມເຂົ້າໃຈແບບສອງຝ່າຍ ກັບປະເທດໃກ້ຄຽງ-ຮ່ວມມືຫລາຍຝ່າຍ, ພາກພື້ນອາຊຽນ, ພາກພື້ນແມ່ນໍ້າຂອງ, ການສ້າງ ແລະ ຮັບຮອງບັນດາກົດໝາຍ-ນິຕິກຳ ກ່ຽວກັບການຕ້ານຢາເສບຕິດ ອື່ນໆ. ທັງໝົດນັ້ນ, ສະແດງເຖິງ ຄວາມເອົາໃຈໃສ່ໃນການ​ແກ້​ໄຂ​ບັນ​ຫາ​ຢາ​ເສບ​ຕິດ ຂອງລັດຖະບານ ແລະ ໜ່ວຍງານທີ່ຮັບຜິດຊອບ. ສະ​ນັ້ນ, ໃນເດືອນ ສິງຫາ 2021, ສະພາແຫ່ງຊາດ ໄດ້ເຫັນດີຮັບຮອງເອົາ ການແກ້ໄຂບັນຫາຢາເສບຕິດ ເປັນ​ວຽກ​ງານບຸ​ລິ​ມະ​ສິດ​ຈຳເປັນຮີບ​ດ່ວນ ແລະ ​ໄດ້​ຍົກ​ໃຫ້​ເປັນວາລະແຫ່ງຊາດ​ ຕາມການສະເໜີ ຂອງລັດຖະບານ ແລະ ມອບໃຫ້ກະ ຊວງ ປກສ ນຳໄປປະສານສົມທົບກັບ ບັນດາອົງການຈັດຕັ້ງທີ່ກ່ຽວຂອ້ງ ເພື່ອຮ່ວມມື ແລະ ສຸມທຸກກຳລັງແຮງສັງ ລວມ ໂດຍໃຫ້ຖືເອົາການຈັດຕັ້ງ ປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ເປັນພັນທະໜ້າທີ່ ແລະ ຄວາມຮັບຜິດຊອບ ຂອງທຸກພາກສ່ວນໃນສັງຄົມ ເຂົ້າໃສ່ການແກ້ໄຂບັນຫາສຳຄັນຂອງຊາດ ທີ່ໄດ້ສະສົມມາ ຫລາຍປີໃຫ້ຫລຸດລົງຢ່າງຈະແຈ້ງ ແລະ ເປັນຮູບປະທຳໂດຍໄວ.

ເພື່ອແກ້ໄຂບັນຫາຢາເສບຕິດ,​ ກະຊວງ ປກສ ໄດ້ພະ​ຍາ​ຍາມ​ປຶກ​ສາ​ຫາ​ລື ແລະ ຮ່ວມ​ມື​ກັບຫລາຍ​ພາກ​ສ່ວນ ທັງ​ພາກ​ລັດ ແລະ ເອ​ກະ​ຊົນ ເພື່ອ​ຊຸກ​ຍູ້​ປະ​ຕິ​ບັດແຜນວາລະແຫ່ງຊາດ ແກ້ໄບັນຫາຢາເສບຕິດ ຢ່າງຈິງຈັງ ແນໃສ່ສົ່ງເສີມການຮ່ວມມື ແລະ ການ​ມີ​ສ່ວນ​ຮ່ວມ​ຂອງ​ສັງ​ຄົມ,  ຮັບປະກັນປະສິດທິພາບ, ປະສິດທິຜົນ ການຈັດ ຕັ້ງປະຕິບັດໃນແຕ່ລະໄລຍະ. ກອງປະຊຸມຂອງບັນດາປະເທດ ອານຸພາກພື້ນແມ່ນ້ຳຂອງ​ ​ເປັນສິ່ງ​ສຳ​ຄັນ ແລະ ມີ​ຄວາມຈໍາເປັນ ​ຕໍ່​ການຮ່ວມມືການສະກັດກັ້ນ ແລະ ຕ້ານຢາເສບຕິດ ໃຫ້ມີປະສິດທິພາບ ເຊິ່ງໄລຍະຜ່ານມາກໍໄດ້​ມີ​ການຊຸກຍູ້ ສົ່ງເສີມການຮ່ວມມື ຜ່ານການແລກປ່ຽນ, ສະໜອງຂໍ້ມູນຂ່າວສານ, ການຊ່ວຍເຫລືອ ແລະ ການສົ່ງ ເສີມສ້າງຂີດຄວາມສາມາດຕ່າງໆ ເຊິ່ງສະແດງເຖິງຄວາມເປັນຫ່ວງ, ຄວາມເອົາໃຈໃສ່ ແລະ ການຊ່ວຍເຫລືອ ໃນການ​ແກ້​ໄຂ​ບັນ​ຫາ​ຢາ​ເສບ​ຕິດ​ ຢູ່ໃນ​ພາກ​ພື້ນ ໄດ້ຢ່າງມີປະສິດທິພາບ.

ຂ່າວ-ພາບ: ຢ່າຕົ່ງ

KPL