ຂປລ. ວິທະຍາຄານປ້ອງກັນຊາດ ໄກສອນ ພົມວິຫານ (ວປກ) ໄດ້ເປິດສົກຮຽນໃໝ່ 2024-2025 ​ໃນວັນທີ 17 ກັນຍາ 2024 ໂດຍການເປັນປະທານ ຂອງສະຫາຍ ພົນໂທ ທອງລອຍ ສີລິວົງ  ຮອງລັດຖະມົນຕີກະຊວງປ້ອງກັນປະເທດ, ຫົວໜ້າກົມໃຫຍ່ການເມືອງກອງທັບ, ມີບັນດາຄະນະພັກ-ຄະນະບັນຊາ ວປກ, ຄະນະກົມ, ຫ້ອງການ, ຄະນະຮັບຜິດຊອບນັກສຶກສາ, ຄະນະຊ່ຽວຊານ, ຄູ-ອາຈານ  ​ແລະ ນັກສຶກສາທຸກລະບົບ ເຂົ້າຮ່ວມ.

ສະຫາຍ ພົນຈັດຕະວາ ສົງກາ ບຸນຄຸນ ຮອງຫົວໜ້າການທະຫານ, ຫົວໜ້າກົມອົບຮົມກໍ່ສ້າງ ວິທະຍາຄານປ້ອງກັນຊາດ ໄກສອນ ພົມວິຫານ ​ໄດ້ໃຫ້ຮູ້ວ່າ: ໃນສົກຮຽນ 2024-2025 ມີນັກສຶກສາທັງໝົດ 618 ສະຫາຍ. ໃນນັ້ນ, ມີນັກສຶກສາເກົ່າ 259 ສະຫາຍ ແລະ ນັກສຶກສາຈະເຂົ້າໃໝ່ 359 ສະຫາຍ, ໃນຈຳນວນ 13 ເປົ້າໜາຍຄື: ກໍ່ສ້າງເລັງລັດຍຸດທະບັ້ນຮົບ-ຍຸດທະສາດ ລະບົບ 1 ປີ ຊຸດທີ XXI, ກໍ່ສ້າງປະລິຍາໂທການທະຫານ ລະບົບ 2 ປີ ຊຸດທີ XVII, ກໍ່ສ້າງປະລິຍາຕີການທະຫານຂັ້ນ ກອງພັນໃຫຍ່-ກອງພົນ ລະບົບ 2 ປີ ຊຸດທີ  XV, ກໍ່ສ້າງເລັ່ງລັດການທະຫານຂັ້ນກອງພັນໃຫຍ່ ລະບົບ 1 ປີ ຊຸດທີX, ກໍ່ສ້າງເລັ່ງລັດການທະຫານ ຂັ້ນກອງພັນນ້ອຍລະບົບ 1 ປີ ຊຸດທີ X, ກໍ່ສ້າງຄູເລັ່ງລັດການທະຫານຂັ້ນ ກອງພັນໃຫຍ່-ກອງພົນ ລະບົບ 1 ປີ ຊຸດທີ III, ກໍ່ສ້າງຊັ້ນສູງຄູພາສາຫວຽດນາມ ລະບົບ 3 ປີ ຊຸດທີ XIV, ກໍ່ສ້າງຊັ້ນສູງພາສາຈີນ ລະບົບ 4 ປີ ຊຸດທີ XXII, ກໍ່ສ້າງຊັ້ນສູງພາສາອັງກິດ ລະບົບ 4 ປີ ຊຸດທີ XX, ກໍ່ສ້າງພາສາລັດເຊຍ ລະບົບ 3 ປີ ຊຸດທີ VIII, ກໍ່ສ້າງເລັ່ງລັດພາສາອັງກິດ ລະບົບ 1 ປີ ຊຸດທີ  XVIII, ບຳລຸງວຽກງານປ້ອງກັນຊາດ-ປ້ອງກັນຄວາມສະຫງົບ ໃຫ້ການນໍາພັກ-ລັດ ໄລຍະ 64 ວັນ ຊຸດທີ XXI ແລະ XXII, ບໍາລຸງວຽກງານການທະຫານທ້ອງຖີ່ນ ລະບົບ 3 ເດືອນ ຊຸດທີ X.  ສໍາລັບຈຸດປະສົງ, ຄາດໝາຍຂອງການບຳລຸງ-ກໍ່ສ້າງ ຂອງແຕ່ລະເປົ້າໜາຍ ກໍເພື່ອເປັນການຍົກລະດັບ ຄວາມຮັບຮູ້ເຂົ້າໃຈ ຕໍ່ພື້ນຖານທິດສະດີ, ຫລັກມູນວິທະຍາສາດ ຂອງລັດທິມາກ-ເລນິນ, ແນວທາງແຜນນະໂຍບາຍຂອງພັກ, ແນວທາງປ້ອງກັນຊາດ-ປ້ອງກັນຄວາມສະຫງົບ, ໜ້າທີ່ການເມືອງຂອງກອງທັບ ໃນສະພາບແວດລ້ອມ ແລະ ຄວາມຮຽກຮ້ອງຕ້ອງການໃໝ່ ກັບການໜ້າທີ່ການເມືອງ ໃນໄລຍະໃໝ່ ໃຫ້ສອດຄ່ອງກັບສະພາບຈຸດພິເສດ ເງື່ອນໄຂຕົວຈິງ ຂອງກົມກອງທ້ອງຖິ່ນຢ່າງມີປະສິດທິຜົນ.

ໂອກາດນີ້, ສະຫາຍ ພົນໂທ ທອງລອຍ ສິລິວົງ ໄດ້ເນັ້ນໃຫ້ຄະນະພັກ-ຄະນະບັນຊາ ແລະ ຄູອາຈານ ຕ້ອງເປັນເຈົ້າການໃນການນໍາພາ-ຊີ້ນໍາ ປັບປຸງກໍ່ສ້າງວິທະຍາຄານ ໂດຍສະເພາະແມ່ນ ເອົາໃຈໃສ່ປະຕິບັດຕາມໂຄງການ ຫລັກສູດການຮຽນ-ການສອນຕາມຫົວບົດ ແລະ ວິຊາທີ່​ໄດ້ກຳນົດໄວ້ ໃຫ້ແທດ ເໝາະກັບແຕ່ລະເປົ້າໝາຍ ທີ່ຈະເຂົ້າມາສຶກສາຢູ່ວິທະຍາຄານ ແລະ ແທດເໝາະກັບຄວາມຕ້ອງການຕົວຈິງ ຂອງການກໍ່ສ້າງນາຍທະຫານຂອງກອງທັບເຮົາ ໃນແຕ່ລະໄລຍະ. ພ້ອມທັງຮຽກຮ້ອງໃຫ້ ນັກຮຽນ-ນັກສຶກສາແຕ່ລະເປົ້າໝາຍ ຈົ່ງພ້ອມກັນ ເພີ່ມທະວີຄວາມເປັນເຈົ້າການ ຕໍ່ໜ້າທີ່ການເມືອງຂອງຕົນ ກໍຄືການຝຶກຝົນຫລໍ່​ຫລອມຕົນເອງ ໃຫ້ມີຄວາມຮູ້ ຄວາມສາມາດ ແລະ ເອົາໃຈໃສ່ຄົ້ນຄວ້າຮໍ່າຮຽນ ເພື່ອໃຫ້ກາຍເປັນນັກສຶກສາດີເດັ່ນ ແລະ ໃຫ້ກາຍເປັນພະນັກງານສືບທອດໃນອະນາຄົດ.

ຂ່າວ: ບິກໄຊ ສົມພູ

KPL