ຂປລ. ໃນປີ 2025 ລັດຖະບານ ກໍ​ຄື ກະຊວງການເງິນ ຈະ​ສຸມ​ໃສ່​ຫລາຍ​ໜ້າ​ວຽກ​ສໍາຄັນ. ​ໃນ​ນັ້ນ, ຈະປັບຂຶ້ນເງິນເດືອນ ຂັ້ນຕໍ່າຈາກ 1.850.000 ກີບ ມາເປັນ 2.200.000 ກີບ/ຄົນ/ເດືອນ ເຊິ່ງຈະເລີ່ມຈັດຕັ້ງປະຕິບັດ ແຕ່ງວດທີ 1 ປີ 2025 ເປັນຕົ້ນໄປ ແລະ ສືບຕໍ່ສົບທົບກັບກະຊວງພາຍໃນ ແລະ ພາກສ່ວນທີ່ກ່ຽວຂ້ອງ ເພື່ອຄົ້ນຄວ້າປັບປຸງໂຄງສ້າງ ດັດສະນີ ເງິນເດືອນໃນໄລຍະຍາວ ໃຫ້ໃກ້ຄຽງກັບສະພາບເສດຖະກິດ ໃນແຕ່ລະໄລຍະ ຕາມຄວາມສາມາດຂອງງົບປະມານ.

ທ່ານ ສັນຕິພາບ ພົມວິຫານ ລັດຖະມົນຕີກະຊວງການເງິນ ໄດ້ລາຍງານຕໍ່ກອງປະຊຸມ ສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ IX ວັນທີ 18 ພະຈິກ 2024 ວ່າ: ໃນປີ 2025 ກະຊວງການເງິນ ຈະສຸມໃສ່ອອກຄຳແນະນຳ ກາຈັດຕັ້ງປະຕິບັດວຽກງານ ອາກອນມູນຄ່າເພີ່ມ 9 ສະບັບ ແລະ ຂະຫຍາຍຖານອາກອນ ມູນຄ່າເພີ່ມໃຫ້ຖືກຕ້ອງຄົບຖ້ວນ ຄັດເລືອກປະເພດກຸ່ມທຸລະກິດ ເພື່ອເປັນເປົ້າໝາຍ ໃນການຂະຫຍາຍຢ່າງຈິງຈັງ ໂດຍເລີ່ມຈາກ ກຸ່ມໂຮງແຮມ, ບ້ານພັກ, ຮ້ານອາຫານ, ຮ້ານຂາຍຄຳ ແລະ ວັດຖຸມີຄ່າ, ມິນິມາກ, ຮ້ານຂາຍລົດ, ຮ້ານຂາຍເຄື່ອງກໍ່ສ້າງ ແລະ ອື່ນໆ, ພ້ອມທັງການຕິດຕັ້ງເຄື່ອງບັນທຶກການຂາຍ ແລະ ການບໍລິການ(POS) ໃຫ້ຫົວໜ່ວຍທຸລະກິດດັ່ງກ່າວ; ຄົ້ນຄວ້ານະໂຍ ບາຍເພື່ອຊຸກຍູ້ ໃຫ້ບຸກຄົນ, ນິຕິບຸກຄົນ ແລະ ອົງການຈັດຕັ້ງຫັນມານຳໃຊ້ ໃບເກັບເງິນໃຫ້ຫລາຍຂຶ້ນ;  ຄຸ້ມຄອງການເກັບຄ່າທຳນຽມ, ຄ່າບໍລິການ ແລະ ບັນດາກອງທຶນຕ່າງໆ ໂດຍຫັນເປັນທັນສະ​ໄໝຢ່າງ ລວມສູນ ໃຫ້ສອດຄ່ອງກັບມະຕິ 09/ລບ;  ຄົ້ນຄວ້າເອົາອາກອນມອບເໝົາ ຈາກຊັບສິນດີຈິຕອນ ບວກເຂົ້າກັບຄ່າກະແສໄຟຟ້າ ເພື່ອຮັບປະກັນໃຫ້ ການເກັບລາຍຮັບດັ່ງກ່າວ, ເຂົ້າງົບປະມານໃຫ້ຖືກຕ້ອງຄົບຖ້ວນ; ສຸມໃສ່ການເກັບອາກອນ ຈາກລັດຖະບັນຍັດປະທານປະເທດ ວ່າດ້ວຍອັດຕາອາກອນແບບ ເດັດຖານສະເພາະທຸລະກິດຄາຊີໂນ ເຊິ່ງຄາດວ່າ ຈະເກັບໄດ້ 26,73 ລ້ານໂດລາສະຫະລັດ ເທົ່າກັບ 615 ຕື້ກີບ; ສືບຕໍ່ຕິດຕາມ ກວດກາບັນດາຫົວໜ່ວຍທຸລະກິດ ທີ່ນຳເຂົ້າຜະລິດຕະພັນ ເຄື່ອງດື່ມທີ່ມີທາດເຫລົ້າ ເພື່ອໄລ່ລຽງ ອາກອນຊົມໃຊ້ ໃຫ້ສອດຄ່ອງກັບກົດໝາຍ ແລະ ລະບຽບການ, ປະສານສົມທົບກັບພາກ ສ່ວນກ່ຽວຂ້ອງ ເພື່ອກວດກາຄືນ ການຈັດຕັ້ງປະຕິບັດອາກອນຊົມໃຊ້ ຂອງຫົວໜ່ວຍທຸລະກິດ ຜະລິດຢາສູບ ແລະ ເຄື່ອງດື່ມທີ່ມີທາດເຫລົ້າ ລວມທັງການເຄື່ອນໄຫວຂອງຕົວແທນຈໍາໜ່າຍ; ຄຸ້ມຄອງການເກັບອາກອນທຸລະກິດ ການຂົນສົ່ງ, ການຄ້າທາງດີຈິຕອນ, Platform (Facebook, WhatsApp, You'Iube, Agoda, foodpanda, 'liklok ແລະ ອື່ນໆ) ລວມທັງການຄ້າຂາຍອອນລາຍ ຈາກນິຕິບຸກ ຄົນພາຍໃນ ແລະ ຕ່າງປະເທດ ໂດຍສົມທົບ ກັບກົມດີຈິຕອນ ແລະ ທະນາຄານ, ກະຊວງອຸດສາ ຫະກຳ ແລະ ການຄ້າ, ກະຊວງປ້ອງກັນຄວາມສະຫງົບ ເພື່ອຂຶ້ນທະບຽນ ແລະ ປະຕິບັດພັນທະຢ່າງຖືກຕ້ອງ, ປັດຈຸບັນ ລົງທະບຽນ ແລ້ວ 20 ຫົວໜ່ວຍ.

ພ້ອມ​ນີ້, ກໍ​ໄດ້ຜັນຂະຫຍາຍ ໂມດູນ FinPass ຂອງລະບົບຊຳລະພັນທະງົບປະມານແຫ່ງລັດ ແບບລວມສູນ (Fin Link) ເພື່ອລວມສູນການເກັບລາຍຮັບ ພາສີ-ອາກອນ, ຄ່າທຳນຽມ-ຄ່າບໍລິການ (ຕາມລັດຖະບັນຍັດ 02/ປປທ) ແລະ ສືບຕໍ່ຜັນຂະຫຍາຍ ລະບົບແກ່ບັນດາ ຜູ້ໃຫ້ບໍລິການຈັດເກັບລາຍຮັບ ແລະ ພັນທະອື່ນໆ ໃຫ້ຮອງຮັບການເກັບລາຍຮັບ ຂອງບັນດາຫົວໜ່ວຍງົບປະມານ, ຢູ່ບັນດາດ່ານ, ຢູ່ຂັ້ນສູນກາງ ແລະ ທ້ອງຖິ່ນຫັນການຊຳລະ ເຂົ້າລະບົບລວມສູນ ຜ່ານຊ່ອງທາງດຽວ; ສືບຕໍ່ປະ ສານສົມທົບກັບ ພາກສ່ວນທີ່ກ່ຽວຂ້ອງ ເປັນຕົ້ນ ກະຊວງປ້ອງກັນ ຄວາມສະຫງົບ, ກະຊວງໂຍທາທິການ ແລະ ຂົນສົ່ງ, ກະຊວງສາທາລະນະສຸກ, ກະຊວງອຸດສາຫະກຳ ແລະ ການຄ້າ, ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ກະຊວງກະສິກຳ ແລະ ປ່າໄມ້ ແລະ ກະຊວງການຕ່າງປະເທດ ເພື່ອປຶກສາຫາລື ໃນການລວມສູນການເກັບລາຍຮັບຂອງຂະແໜງການຕ່າງໆ ຜ່ານໂມດູນຊຳລະຄ່າທຳ ນຽມ-ຄ່າບໍລິການຢູ່ ດ່ານພາສີ ແບບລວມສູນ (FinPass); ເພີ່ມທະວີການໂຄສະນາ ແລະ ຜັນຂະ ຫຍາຍ ແນະນໍາໃຫ້ຜູ້ປະກອບການ ແລະ ຜູ້ໂດຍສານໃຊ້ບໍລິການຊຳລະ ຜ່ານຊ່ອງ Application, ການຊຳລະຂ້າມທະນາຄານ, ການຊຳລະຜ່ານຕູ້ຮັບເງິນສົດ ແລະ ບໍ່ຮັບເງິນສົດ (KIOSK), ການຊຳລະຜ່ານ LAO QR, ການຊໍາລະດິຈິຕອນຜ່ານ Mobile Banking ແລະ Mobile APP ຂອງບັນດາທະ ນາຄານ, EASY KIP, Wallet; ສ້າງຄໍາແນະນໍາໃນການຄຸ້ມຄອງນໍາໃຊ້ລະບົບການຈັດເກັບຄ່າທຳ ນຽມ ແລະ ຄ່າບໍລິການ ແບບລວມສູນ ຜ່ານທະນາຄານ (FinPass) ຢູ່ດ່ານສາກົນ;  ສືບຕໍ່ເຊື່ອມໂຍງຖານຂໍ້ມູນກັບຂະແໜງການທີ່ກ່ຽວຂ້ອງ ເພື່ອເຊື່ອມຕໍ່ຂໍ້ມູນ ເຂົ້າໃນລະບົບຖານຂໍ້ມູນໃຫຍ່ລວມສູນ, ເຊື່ອມຕໍ່ແລກ ປ່ຽນຂໍ້ມູນ ແລະ ວິເຄາະ-ວິໄຈຂໍ້ມູນ (LaoFIDA); ຄົ້ນຄວ້ານິຕິກຳ ໃນການຄຸ້ມຄອງ, ຕິດຕາມ ການເກັບອາກອນຈາກການຂາຍ Carbon Credit ຂອງຫົວໜ່ວຍທຸລະກິດ ທີ່ດຳເນີນ ທຸລະກໍາດັ່ງກ່າວ ເຊິ່ງກຳລັງ ເປັນແຫລ່ງລາຍຮັບໃໝ່, ປັດຈຸບັນ ມີ 11 ຫົວໜ່ວຍ ທີ່ໄດ້ໃຫ້ຄວາມສົນໃຈ.

ຂ່າວ: ກິດຕາ

ພາບ: ເກດສະໜາ

KPL