ຂປລ. ໃນ​ໄລ​ຍະ 9 ເດືອນ ປີ 2024, ການລົງທຶນຂອງລັດ ສາມາດປະຕິບັດໄດ້ 6.839 ໂຄງການ ມູນຄ່າ 4.013,41 ຕື້ກີບ ເທົ່າກັບ 80% ຂອງແຜນການ, ສ່ວນແຜນການລົງທຶນ ຂອງລັດປີ 2025 ຄາດວ່າຈະມີງົບປະມານການລົງທຶນທີ່ມູນຄ່າ 5,450 ຕື້.

 ທ່ານ ເພັດ ພົມພິພັກ ລັດຖະມົນຕີກະຊວງແຜນການ ແລະ ການລົງທຶນ ໄດ້ລາຍງານກ່ຽວກັບ ການຈັດຕັ້ງປະຕິບັດ ແຜນການລົງທຶນຂອງລັດ ປະຈໍາປີ 2024 ແລະ ແຜນການລົງທຶນ ຂອງລັດ ປະຈໍາປີ 2025 ​ໃນກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ IX ໃນວັນທີ 18 ພະຈິກ 2024 ວ່າ: ໃນປີ 2024, ສະພາແຫ່ງຊາດ ໄດ້ຮັບຮອງແຜນ ການລົງທຶນຂອງລັດ ທັງໝົດ 5.000 ຕື້ກີບ ທຽບໃສ່ປີ 2023 ເພີ່ມຂຶ້ນ 15,8%. ໃນນີ້, ທຶນຊໍາລະໂຄງການໜີ້ສິນ 803,32 ຕື້ກີບ ກວມ 16% ມີ 2.610 ໂຄງການ, ທຶນໂຄງການສືບຕໍ່ 3.232,67 ຕື້ກີບ ກວມ 65% ມີ 4.302 ໂຄງການ ແລະ ທຶນໂຄງການສະເໜີ ໃໝ່ 964,01 ຕື້ກີບ ກວມ 19% ມີ 1.098 ໂຄງການ ​ເຊິ່ງໄດ້ແບ່ງການລົງທຶນ ອອກເປັນ 2 ກຸ່ມ ຄື: ບ້ວງການລົງທຶນທົ່ວໄປ ຈໍານວນ 2.900 ຕື້ກີບ ແລະ ບ້ວງຈົດ ຮັບ-ຈົດຈ່າຍ ແລະ ລົງທຶນອື່ນໆ 2.100 ຕື້ກີບ. ສັງລວມແລ້ວ, ໃນໄລຍະ 9 ເດືອນ ປີ 2024 ສາມາດປະຕິບັດໄດ້ທັງໝົດ 6.839 ໂຄງການ ມູນຄ່າ 4.013,41 ຕື້ກີບ ເທົ່າກັບ 80% ຂອງແຜນການ. ໃນນີ້, ບ້ວງການລົງທຶນທົ່ວໄປ ໂຄງການບຸລິມະສິດຂອງລັດຖະບານ (9 ເປົ້າໝາຍບຸລິມະສິດ) ປະຕິບັດໄດ້ 1.775 ໂຄງການ ມູນຄ່າ 806,35 ຕື້ກີບ ເທົ່າກັບ 85% ຂອງແຜນການ; ບ້ວງທຶນປົກະຕິ ແລະ ທຶນເປົ້າໝາຍສະເພາະ ປະຕິບັດໄດ້ 4.048 ໂຄງການ, ມູນຄ່າ 1.522,06 ຕື້ກີບ ເທົ່າກັບ 78% ຂອງແຜນການ; ບ້ວງຈົດຮັບ-ຈົດຈ່າຍ ແລະ ລົງທຶນອື່ນໆ ສາມາດປະຕິບັດໄດ້ 1.016 ໂຄງການ ມູນຄ່າ 1.685 ຕື້ກີບ ເທົ່າກັບ 80% ຂອງແຜນການ. ສ່ວນການຈັດຕັ້ງປະຕິບັດ ແຜນແກ້ໄຂໜີ້ສິນດ້ວຍ ຮູບແບບອວ່າຍໜີ້ກັບທະນາຄານບ້ວງ 8.000 ຕື້ກີບ, ຜ່ານການຈັດຕັ້ງປະຕິບັດມາຮອດປັດຈຸບັນ ສາມາດປະຕິບັດໄດ້ 7.893 ຕື້ກີບ ທຽບເທົ່າ 98,6% ຂອງແຜນການ.

 ສໍາລັບ ການຄົ້ນຄວ້າສ້າງແຜນການລົງທຶນຂອງລັດ ປີ 2025, ໃນເບື້ອງຕົ້ນ ມີມູນຄ່າທັງໝົດ 5.300 ຕື້ກີບ ເພີ່ມຂຶ້ນ 6% ທຽບໃສ່ແຜນປະຈໍາປີ 2024 ແຕ່ອີງຕາມການແຈ້ງຫລ້າສຸດ ຂອງກະຊວງການເງິນ ຄາດວ່າຈະເພີ່ມຂຶ້ນອີກ 150 ຕື້ກີບ. ດັ່ງນັ້ນ, ຄາດວ່າງົບປະມານລົງທຶນຂອງລັດ ໃນປີ 2025 ມີທັງໝົດ 5.450 ຕື້ກີບ. ໃນຈໍານວນງົບປະມານ 5.300 ຕື້ກີບ ແມ່ນບ້ວງທຶນທົ່ວໄປ, ຈໍານວນ 3.150 ຕື້ກີບ ໄດ້ຈັດສັນໃຫ້ 2 ກຸ່ມແຜນງານໃຫຍ່ ຄື: ກຸ່ມທີ 1 ຈັດສັນໃຫ້ບັນດາແຜນງານ/ໂຄງການບຸລິມະສິດຂອງລັດຖະບານ (9 ເປົ້າໝາຍບຸລິມະສິດ) ແລະ ກຸ່ມທີ 2 ຈັດສັນໃຫ້ບັນດາໂຄງການປົກ ກະຕິ ແລະ ໂຄງການເປົ້າໝາຍສະເພາະ ຂອງບັນດາກະຊວງ-ອົງການ ແລະ ທ້ອງຖິ່ນຕ່າງໆ. ໃນນີ້, ໃຫ້ບຸລິມະສິດໂຄງການ ສົມທົບທຶນກັບ ຕ່າງປະເທດ (ODA), ໂຄງການທີ່ມີຜົນປະໂຫຍດ ດ້ານເສດຖະກິດ ແລະ ສະໜັບສະໜູນການຈັດຕັ້ງປະຕິບັດ 2 ວາລະແຫ່ງຊາດ ຊຶ່ງໄດ້ຈັດສັນໄປຕາມບຸລິມະສິດ ໂດຍໃຫ້ບັນດາ ຂະແໜງການ ແລະ ທ້ອງຖິ່ນ ອີງໃສ່ທິດທາງວຽກງານບຸລິມະສິດ ຂອງການພັດທະນາເສດຖະ ກິດ-ສັງຄົມ ແລະ ມະຕິຂອງກົມການເມືອງສູນກາງພັກ ສະບັບເລກທີ 04/ກມສພ ລົງວັນທີ 11 ເມສາ 2024 ວ່າດ້ວຍການສ້າງເສດຖະກິດ ເອກະລາດ ເປັນເຈົ້າຕົນເອງ ໃນໄລຍະໃໝ່ ໂດຍສະເພາະ ການແກ້ໄຂຄວາມຫຍຸ້ງຍາກ ດ້ານເສດຖະກິດ-ການເງິນ.

ຂ່າວ: ສົມຫວັງ

ພາບ: ເກດສະໜາ

KPL