ຂປລ
ຂປລ. ໃນລະຫວ່າງວັນທີ 22-23 ເມສາ 2025, ທ່ານ ນາງ ແຄັດເທີຣິນ ເວສທ໌ ຮອງລັດຖະມົນຕີ ຮັບຜິດຊອບວຽກງານອິນໂດ-ປາຊີຟິກ ກະຊວງການຕ່າງປະເທດ ແລະ ການພັດທະນາ ແຫ່ງ ສະຫະຣາຊະອານາຈັກອັງກິດ ແລະ ອຽກລັງເໜືອ ພ້ອມຄະນະ ໄດ້ເດີນທາງມາຢ້ຽມຢາມ ເຮັດວຽກ ຢູ່ ສປປ ລາວ ເຊິ່ງເປັນຂີດໝາຍສຳຄັນ ໃນການເສີມຂະຫຍາຍສາຍພົວພັນ ແລະ ການຮ່ວມມື ຂອງສອງປະເທດໃຫ້ມີບາດກ້າວໃໝ່.
ຂປລ. ໃນລະຫວ່າງວັນທີ 22-23 ເມສາ 2025, ທ່ານ ນາງ ແຄັດເທີຣິນ ເວສທ໌ ຮອງລັດຖະມົນຕີ ຮັບຜິດຊອບວຽກງານອິນໂດ-ປາຊີຟິກ ກະຊວງການຕ່າງປະເທດ ແລະ ການພັດທະນາ ແຫ່ງ ສະຫະຣາຊະອານາຈັກອັງກິດ ແລະ ອຽກລັງເໜືອ ພ້ອມຄະນະ ໄດ້ເດີນທາງມາຢ້ຽມຢາມ ເຮັດວຽກ ຢູ່ ສປປ ລາວ ເຊິ່ງເປັນຂີດໝາຍສຳຄັນ ໃນການເສີມຂະຫຍາຍສາຍພົວພັນ ແລະ ການຮ່ວມມື ຂອງສອງປະເທດໃຫ້ມີບາດກ້າວໃໝ່.
ທ່ານ ນາງ ແຄັດເທີຣິນ ເວສທ໌ ໄດ້ເຂົ້າພົບປະ ທ່ານ ນາງ ຟອງສະໝຸດ ອັ່ນລາວັນ ຮອງລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ, ທັງສອງຝ່າຍ ໄດ້ຮ່ວມກັນປຶກສາຫາລື ກ່ຽວກັບ ວິທີທາງຊຸກຍູ້ສົ່ງເສີມການພົວພັນຮ່ວມມື ທີ່ດີໃນປັດຈຸບັນ ໃຫ້ເຂັ້ມແຂງ ແລະ ຂະຫຍາຍຕົວຍິ່ງໆຂຶ້ນໃນຕໍ່ໜ້າ ທັງໃນຂອບສອງຝ່າຍ ແລະ ຫລາຍຝ່າຍ. ຄຽງຄູ່ກັນນັ້ນ, ກໍໄດ້ມີການແລກປ່ຽນທັດສະນະ ຕໍ່ສະພາບການພາກພື້ນ ແລະ ສາກົນທີ່ພົ້ນເດັ່ນ ທີ່ສອງຝ່າຍມີຄວາມສົນໃຈ ຮ່ວມກັນ. ໃນໂອກາດດຽວກັນ ກໍໄດ້ລົງນາມບົດບັນທຶກຄວາມເຂົ້າໃຈ ວ່າດ້ວຍໂຄງການ ສ້າງຄວາມເຂັ້ມແຂງ ໃຫ້ແກ່ການບໍລິຫານການຂົນສົ່ງ ພາຍໃນຕົວເມືອງນະຄອນຫລວງວຽງຈັນ. ພ້ອມນີ້, ຄະນະຜູ້ແທນດັ່ງກ່າວ ຍັງໄດ້ໄປຢ້ຽມ ຢາມ ແລະ ພົບປະບັນດາອົງການ ທີ່ໄດ້ຮັບການສະໜັບສະໜູນ ຈາກລັດຖະບານອັງກິດ ເຊັ່ນ: ຄະນະກໍາມະການແມ່ນໍ້າຂອງ (MRC), ສູນເກັບກູ້ລະເບີດບໍ່ທັນແຕກ (UXO), ອົງການ MAG ແລະ ອົງການ HALO TRUST.
ປີ 2025 ແມ່ນຄົບຮອບ 70 ປີ ແຫ່ງ ການສ້າງຕັ້ງສາຍພົວພັນການທູດ ລະຫວ່າງ ສປປ ລາວ ແລະ ສະຫະ ຣາຊະອານາຈັກອັງກິດ ແລະ ອຽກລັງເໜືອ ສອງຝ່າຍມີການຈັດກິດຈະກໍາ ສະເຫລີມສະຫລອງວັນສໍາຄັນດັ່ງກ່າວຮ່ວມກັນໃນທ້າຍປີນີ້. ນັບຕັ້ງແຕ່ສອງປະເທດ ໄດ້ສ້າງຕັ້ງສາຍພົວພັນ ການທູດຮ່ວມກັນ ໃນວັນທີ 5 ກັນຍາ 1955 ການພົວພັນຮ່ວມມື ລະຫວ່າງ ສອງປະເທດແມ່ນມີທ່າກ້າວ ແລະ ຂະຫຍາຍຕົວດີຂຶ້ນ ໂດຍສະເພາະພາຍຫລັງທີ່ຝ່າຍອັງກິດ ໄດ້ເປີດສະຖານທູດຂອງຕົນ ຢູ່ ນະຄອນ ຫລວງວຽງຈັນ ຄືນໃໝ່ ໃນປີ 2012 ແລະ ຝ່າຍລາວ ກໍໄດ້ເປີດສະຖານທູດ ຄືນໃໝ່ ຢູ່ລອນດອນ ໃນປີ 2014, ສປປ ລາວ ແລະ ອັງກິດ ໄດ້ມີການຮ່ວມມືທີ່ດີນໍາກັນ ທັງໃນຂອບສອງຝ່າຍ ແລະ ຫລາຍຝ່າຍ ເຊັ່ນ: ວຽກງານສາທາລະນະສຸກ, ວຽກງານການສຶກສາ ແລະ ໂຄງການເກັບກູ້ລະເບີດ. ພ້ອມກັນນັ້ນ, ອັງກິດຍັງໃຫ້ການຊ່ວຍເຫລືອ ຈັດຝຶກອົບຮົມສຳລັບ ຂະແໜງການຕ່າງໆ ເຊິ່ງເປັນການປະກອບສ່ວນທີ່ສຳຄັນ ເຂົ້າໃນການສ້າງສາພັດທະນາ ສປປ ລາວ. ນອກນັ້ນ, ຍັງມີການແລກປ່ຽນການຢ້ຽມຢາມ ຂອງຄະນະຜູ້ແທນ ລະຫວ່າງ ກະຊວງ,ຂະແໜງການ ຂອງ ສປປ ລາວ ແລະ ສະຫະຣາຊະອານາຈັກອັງກິດ ຢ່າງເປັນປົກກະຕິ.
ຂ່າວ: ວຽງຈັນໃໝ່
KPL
