ຂປລ
ເນື່ອງໃນໂອກາດ ວັນຊາດຂອງປະເທດ ສາທາລະນະລັດ ສັງຄົມນິຍົມ ຫວຽດນາມ(Vietnam) ຄົບ ຮອບ 80 ປີ(2/9/1945-2/9/2025) ຫວຽດນາມ ເປັນປະເທດ
ເນື່ອງໃນໂອກາດ ວັນຊາດຂອງປະເທດ ສາທາລະນະລັດ ສັງຄົມນິຍົມ ຫວຽດນາມ(Vietnam) ຄົບ ຮອບ 80 ປີ(2/9/1945-2/9/2025) ຫວຽດນາມ ເປັນປະເທດ ໃນອາຊີຕາເວັນອອກສ່ຽງໃຕ້ ຕັ້ງຢູ່ທາງຕາເວັນອອກສຸດ ຂອງ ແຫລມອິນດູຈີນ, ມີຊາຍແດນທິດເໜືອ ຕິດກັບປະເທດຈີນ, ທິດຕາເວັນຕົກຕິດກັບ ສປປລາວ, ທິດຕາເວັນຕົກສຽງໃຕ້ ຕິດກັບ ກຳປູເຈຍ, ທິດຕາເວັນອອກຕິດກັບ ທະເລຈີນໃຕ້ ແລະ ອ່າວ ທອນກິນ(Tonkin) ແລະ ທິດໃຕ້ຕິດກັບ ອ່າວໄທ. ມີນະຄອນຫລວງ ຊື່ວ່າ ຮ່າໂນ້ຍ; ມີເນື້ອທີ່ທັງໝົດ 331.690 ກິໂລຕາແມັດ ກວມເອົາປະຊາກອນ 100,4 ລ້ານຄົນ(ໃນປີ2024) ຫລາຍເປັນອັນດັບ 3 ໃນອາຊີຕາເວັນອອກສຽງໃຕ້ ຖັດຈາກອິນໂດເນເຊຍ ແລະ ຟີລິບປິນ; ໃຊ້ພາສາ ຫວຽດນາມ ເປັນພາສາທາງການ, ໃຊ້ສະກຸນເງິນດົ່ງ(VND), ປະຊາຊົນ ສ່ວນໃຫຍ່ ນັບຖືສາສະໜາພຸດ ກວມເອົາ 9,3%.
ຫວຽດນາມ ກາຍເປັນປະເທດໜຶ່ງ ທີ່ມີຄວາມຈະເລີນເຕີບໃຫຍ່ ທາງດ້ານເສດຖະກິດ ຢ່າງວ່ອງໄວ ແລະ ທັງເປັນປະເທດ ທີ່ມີຄວາມຫລາກຫລາຍ ທາງຊີວະພາບສູງເຕັມໄປ ດ້ວຍ ຊັບພະຍາກອນ ທຳມະຊາດທີ່ສຳຄັນ ຢ່າງຫລວງຫລາຍ ໃນການສ້າງລາຍຮັບ ໃຫ້ແກ່ປະເທດ ຫວຽດນາມ ເປັນຕົ້ນ: ຖ່ານຫີນ, ປ່າໄມ້, ນໍ້າມັນ ແລະ ໂລຫະມີຄ່າເຊັ່ນ: ຄຳ,ທອງ ແດງ, ຜະລິດທາງກະສິກຳ ທີ່ສຳຄັນ ແລະ ຢູ່ໃນອັນດັບຕົ້ນຂອງໂລກ ຄື: ເຂົ້າ, ກາເຟແລະໝາກມ່ວງຫິມະພານ ອື່ນໆ ເຮັດໃຫ້ລວມຍອດ ຜະລິດຕະພັນພາຍໃນ ປະເທດ(GDP) ເຕີບໂຕເຖິງ 433.360 ລ້ານໂດລາສະຫະລັດ, (ໃນປີ 2023); ອັດຕາການເຕີບໂຕທາງເສດຖະກິດ 4,24% ຕໍ່ປີ; ລາຍໄດ້ສະເລ່ຍຕໍ່ຫົວຄົນຕໍ່ເດືອນ 4.110ໂດລາສະຫະລັດ.
ສ່ວນມູນຄ່າການສົ່ງອອກ 164.450 ລ້ານໂດລາສະຫະລັດ(ໃນປີ 2023); ສິນຄ້າ ທີ່ສົ່ງອອກສຳຄັນ: ໂທລະສັບ ແລະ ອຸປະກອນ, ເກີບ, ເສື້ອຜ້າ, ເຄື່ອງກົນຈັກ, ອຸປະກອນການແພດ; ມູນຄ່າການນຳເຂົ້າ 152,200 ລ້ານໂດລາສະຫະລັດຕໍ່ປີ; ສິນຄ້າທີ່ນຳເຂົ້າ ລວມມີ: ເອເລັກໂຕຣນິກ, ເຄື່ອງກົນຈັກ(ຄອມພີວເຕີ) , ເຊື້ອໄຟທຳມະຊາດ, ວັດຖຸດີບ ພາສຕິກ ແລະ ອຶ່ນໆ. ສ່ວນປະເທດ ຄູ່ການຄ້າທີ່ສຳຄັນມີ: ສ.ອາເມລິກາ, ຈີນ, ສ.ເກົາຫລີ, ຍີ່ປຸ່ນ, ສະຫະພາບເອີຣົບ ແລະ ອາຊຽນ.
ນອກນັ້ນ ຫວຽດນາມ ຍັງໄດ້ຮັບຄວາມນິຍົມ ຈາກນັກທ່ອງທ່ຽວ ທັງພາຍໃນ ແລະ ຕ່າງປະເທດ ຍ້ອນຄວາມສວຍງາມ ທາງທຳມະຊາດ ແລະ ສະຖານທີ່ທາງປະຫວັດສາດຫລາຍແຫ່ງ ແຕ່ເໜືອຕະຫລອດໃຕ້ ເປັນຕົ້ນຢູ່ ນະຄອນຫລວງຮ່າໂນ້ຍ ໂດຍສະເພາະສຸສານປະທານໂຮ່ຈີມິງ, ພິພິທະພັນໂຮ່ຈີມິງ ແລະ ຍັງມີອ່າວຮ່າລອງ, ສະປາ ອື່ນໆ, ຄຽງຄູ່ກັນນັ້ນ ຍັງມີເມືອງເຮ້ວ; ເມືອງດານັງ; ເມືອງໂຮຍອານ; ເມືອງຍາຈາງ; ເມືອງດາລາດ ແລະ ນະຄອນໂຮ່ຈີ່ມິງ ອື່ນໆອີກ.
ປະເທດຫວຽດນາມ ແລະ ປະເທດສປປລາວ ໄດ້ສ້າງຕັ້ງສາຍພົວພັນທາງການທູດ ຮ່ວມກັນເມື່ອວັນທີ 5.9.1962 ຕະຫລອດໄລຍະຜ່ານມາ ທັງສອງປະເທດອ້າຍນ້ອງ ໄດ້ມີການພົວພັນຮ່ວມມື ຢ່າງຮອບດ້ານ, ຊ່ວຍ ເຫລືອເຊິ່ງກັນ ແລະ ກັນ, ແລກປ່ຽນປະສົບການຢ່າງຕໍ່ເນື່ອງ ແລະ ຂະຫຍາຍຕົວຢ່າງບໍ່ຢຸດຢັ້ງ. ນັບແຕ່ປີ 1975 ມາຮອດປັດຈຸບັນ ສາຍພົວພັນຫວຽດນາມ-ລາວ ກໍ່ກ້າວເຂົ້າສູ່ໄລຍະໃໝ່ ໄລຍະການພົວພັນ ຮ່ວມມືຮອບດ້ານລະ ຫວ່າງສອງພັກ, ສອງລັດ ແລະ ປະຊາຊົນສອງປະເທດ.
ຕະຫລອດໄລຍະຜ່ານມາ ເຖິງແມ່ນວ່າ ສະພາບການໃນໂລກ ແລະ ຢູ່ພາກພື້ນມີຫລາຍອັນປ່ຽນແປງສັບ ສົນ ໂດຍສະເພາະ ໄພພິບັດທາງທຳມະຊາດ, ນໍ້າຖ້ວມ, ພາຍຸຖະຫລົ່ມ ແລະ ຄວາມຂັດແຍ້ງ ທາງຊາຍແດນ ລະ ຫວ່າງໄທ-ກຳປູເຈຍກໍ່ຕາມ, ແຕ່ສາຍພົວພັນ ມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ຫວຽດ ນາມ-ລາວ ຍັງຄົງນັບມື້ສະນິດ ຕິດແໜ້ນ, ພັດທະນາຢ່າງເລິກເຊິ່ງ ແລະ ກວ້າງຂວາງ, ສາມາດບັນລຸປະສິດທິຜົນຢ່າງແທ້ຈິງ. ບັນດາກົນໄກການຮ່ວມມື ສອງປະເທດພິເສດ ຢູ່ຂັ້ນສູງໄດ້ປັບປຸງ, ເສີມຂະຫຍາຍຢ່າງມີປະສິດທິຜົນ, ຊຸກຍູ້ການພົວພັນສອງປະເທດ ໃຫ້ນັບມື້ພັດທະນາ ແລະ ເຂົ້າສູ່ລ່ວງເລິກ, ການຮ່ວມມືທາງຊາຍແດນ, ການປ້ອງກັນຊາດ, ປ້ອງກັນຄວາມສະຫງົບ ໄດ້ຮັບການຊຸກຍູ້, ການຮ່ວມມືເສດຖະກິດລະ ຫວ່າງສອງປະເທດ ໄດ້ຮັບການພັດທະນາຂຶ້ນຢ່າງບໍ່ຢຸດຢັ້ງ./.
ໂດຍ:ດາວັນ
KPL
