ຂປລ
ຜັກກາດຮ່ອງເຕ້ ເປັນພຶດຜັກຊະນິດໜຶ່ງທີ່ຄົນລາວນິຍົມນຳມາປຸງແຕ່ງອາຫານ ແລະ ປູກຂາຍເປັນສິນຄ້າສ້າງລາຍຮັບໃຫ້ແກ່ຄອບຄົວໄດ້ເປັນກອບເປັນກຳ.
*ຜັກກາດຮ່ອງເຕ້ ເປັນພຶດຜັກຊະນິດໜຶ່ງທີ່ຄົນລາວນິຍົມນຳມາປຸງແຕ່ງອາຫານ ແລະ ປູກຂາຍເປັນສິນຄ້າສ້າງລາຍຮັບໃຫ້ແກ່ຄອບຄົວໄດ້ເປັນກອບເປັນກຳ ເຊິ່ງຈະສັງເກດເຫັນໄດ້ຕາມທ້ອງຕະຫລາດ ແລະ ຮ້ານຂາຍຜັກຕາມບ້ານຈະມີຜັກກາດຊະນິດນີ້ວາງຂາຍຢູ່. ດັ່ງນັ້ນ, ມື້ນີ້ຄໍລ້ຳສຶກສາຫາຄວາມຮູ້ຂໍແນະນໍາວິທີການປູກຜັກກາດ ຮ່ອງເຕ້ ດັ່ງນີ້:
ການກຽມໜານ: ແປງໜານດ້ວຍການຂຸດ ຫລື ໄຖ ພ້ອມພວນດິນປັບໜ້າໜານໃຫ້ລຽບພຽງດີ ໂດຍມີຄວາມກວ້າງປະມານ 1 ແມັດ, ຍົກໜານສູງ 30 ຊັງຕີແມັດ ( 20 ຊັງຕີແມັດໃນລະດູແລ້ງ ), ໄລຍະຫ່າງລະຫວ່າງໜານຕໍ່ໜານ 50 ຊັງຕີແມັດ ແລະ ຮອງພື້ນໜານດ້ວຍຝຸ່ນຄອກ. ການປູກ: ສາມາດເຮັດໄດ້ດ້ວຍການຫວ່ານແກ່ນໂດຍກົງ ເຮັດເປັນແຖວ, ຫວ່ານແກ່ນບາງໆ ເພື່ອບໍ່ໃຫ້ມັນບຽດກັນເກີນໄປເມື່ອຕົ້ນໃຫຍ່, ແກ່ນງອກອອກມາເປັນຕ້ົນອ່ອນໃຫ້ຖອນແຍກໃນໄລຍະຫ່າງ 10 ຊັງຕີແມັດ, ເມື່ອເບ້ຍໃຫຍ່ຂຶ້ນອີກໃຫ້ຖອນແຍກອອກ ໃນໄລຍະຫ່າງ 20 ຊັງຕີແມັດ ແລະ ຖອນແຍກໄລຍະຫ່າງ 25 ຫາ 30 ຊັງຕີແມັດ ສໍາລັບຕົ້ນໃຫຍ່ແລ້ວ.
ການໃສ່ປຸ໋ຍ: ກ່ອນໃສ່ປຸ໋ຍສູດ 15:15:15 ໃຫ້ກໍາຈັດວັດຊະພືດ ກ່ອນ; ໃນໄລຍະອາຍຸ 7 ວັນໃຫ້ໃສ່ ປຸ໋ມປະມານ 100 ກຣາມຕໍ່ຕົ້ນ, ເມື່ອອາຍຸໄດ້ 14 ວັນ ໃສ່ 50 ກຣາມຕໍ່ຕົ້ນ, ຫລັງຈາກນັ້ນກໍ່ບົວລະບັດຮັກສາໃຫ້ນໍ້າປົກກະຕິໂດຍທີ່ບໍ່ໃສ ປຸ໋ຍອີກກໍໄດ້. ຫລັງຈາກປູກອາຍຸປະມານ 35 ຫາ 45 ວັນ ກໍສາມາດເກັບໄດ້ແລ້ວຢ່າປ່ອຍໃຫ້ມັນອອກດອກ ເພາະມັນຈະແກ່ເກີນໄປຄຸນນະພາບຈະຕໍ່າລົງ, ໃຫ້ຕັດຕົ້ນຜັກເໜືອລະດັບໜ້າດິນເລັກໜ້ອຍເດັດໃບເນົ່າເສຍ ຫລື ໃບເຫລືອງຖິ້ມ.
ວິທີການປູກໃຫ້ຜົນຜະລິດສູງ: ໃຫ້ກໍາຈັດພືດທີ່ຕິດພະຍາດ, ເສດຊາກພືດ ແລະ ວັດຊະພືດອອກຈາກໜານປູກເພື່ອປ້ອງກັນການແຜ່ລະບາດຂອງພະຍາດ. ພ້ອມນີ້, ກໍຕ້ອງປູກພືດໝູນວຽນປ້ອງກັນການສະສົມຂອງແມງໄມ້, ເຊື້ອພະ ຍາດ ແລະ ຄືນຄວາມອຸດົມສົມບູນໃຫ້ແກ່ດິນປູກພືດ.
ຮຽບຮຽງໂດຍ: ແສງສະຫວັນ
KPL
