ຂປລ. ກົມ​ສົ່ງ​ເສີມການ​ຄ້າ ແລະ ຫັດຖະກໍາ, ກະຊວງອຸດສາຫະກຳ ແລະ ການຄ້າ ແລະ ​ບໍລິ​ສັດ ອີລີເກັ້ນ ອີເວັ້ນ ຈຳກັດຜູ້ດຽວ ຈັດງານວາງສະແດງວຽງຈັນມໍເຕີເຊວ ເອັກສໂປ 2024 ຄັ້ງທີ 2 ໃນລະຫວ່າງວັນທີ 29 ພະຈິກ ຫາ 8 ທັນວາ 2024 ຢູ່ ສູນການຄ້າ ລາວ-ໄອເຕັກ (ຕຶກເກົ່າ) ນະຄອນຫລວງວຽງຈັນ (ນວ) ໂດຍມີ ທ່ານ ມະໂນທອງ ວົງໄຊ ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ, ມີບັນດາຮອງຫົວໜ້າກົມທີ່ກ່ຽວຂ້ອງ, ຜູ້ຈັດການທົ່ວໄປ ບໍ​ລິ​ສັດ​ລາວ​ເວີນ​ມະ​ຫາ​ຊົນ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມໃນພິທີເປີດງານດັ່ງກ່າວ.

ທ່ານ ຈັນສະໝອນ ສີສະອາດ ຮອງຫົວໜ້າກົມສົ່ງເສີມການຄ້າ ແລະ ຫັດຖະກຳ ໄດ້ໃຫ້ຮູ້ວ່າ: ການຈັດງານວາງສະແດງລົດໃນຄັ້ງນີ້, ເປັນກົນໄກໜຶ່ງທີ່ທາງພາກລັດ ໃຫ້ຄວາມສຳຄັນ ໃນການສົ່ງເສີມການຄ້າ ເພື່ອກະຕຸ້ນເສດຖະກິດ, ດຶງດູດການຄ້າ ແລະ ການລົງທຶນຂອງນັກທຸລະກິດຂອງລາວ ແລະ ສາກົນ ໃຫ້ນັບມື້ເຂັ້ມແຂງ ຕາມຍຸກເຊື່ອມໂຍງກັບສາກົນ ໂດຍມີສິນຄ້າ ປະເພດລົດຍີ່ຫໍ້ຕ່າງໆ ທັງໝົດ 55 ຫ້ອງ, 18 ຢີ່ຫໍ້ ເຊັ່ນ: ລົດໄຟຟ້າ, ລົດປະຢັດນ້ຳມັນ. ພິເສດພາຍໃນງານ ຍັງມີຫ້ອງວາງສະແດງສຳລັບສິນຄ້າທ່າແຮງ ແລະ ສິນຄ້າໂອດັອບ ຂອງລາວມາຮ່ວມວາງສະແດງ ຈຳນວນ 21 ຫ້ອງ ແລະ ຫ້ອງວາງສະແດງຂອງກົມສົ່ງເສີມການຄ້າ ແລະ ຫັດຖະກຳ 1 ຫ້ອງ ເຊິ່ງປະເພດສິນຄ້າທ່າແຮງຂອງລາວ ທີ່ນຳມາວາງສະແດງ ມີປະເພດສິນຄ້າຫັດຖະກຳ, ເຄື່ອງນຸ່ງ, ເຄື່ອງດື່ມ, ອາຫານ ແລະ ຢາພື້ນເມືອງກ ທັງນີ້, ກໍເພື່ອເປັນການໂຄສະນາສິນຄ້າລາວ ແລະ ຊຸກຍູ້ສົ່ງເສີມຜະລິດຕະພັນພາຍໃນ ໂຄສະນາໃຫ້ ຄົນລາວຫັນມາຊົມໃຊ້ ຜະລິດຕະພັນພາຍໃນ ໃຫ້ນັບມື້ນັບຫລາຍຂຶ້ນ.

ທ່ານ ພານະລິນ ສຸວັນນະວົງ ຜູ້ອຳນວຍການ ບໍລິສັດ ອີລີເກັ້ນ ອີເວັ້ນ ຈຳກັດຜູ້ດຽວ ໄດ້ກ່າວວ່າ: ງານວາງສະແດງວຽງຈັນມໍເຕີເຊວ ເອັກສໂປ 2024 ຈັດຂຶ້ນ ເປັນຄັ້ງທີ 2 ພາຍໃຕ້ແນວຄິດ ເຕັກໂນໂລຊີ ນະວັດຕະກຳລົດ ກ້າວສູ່ອະນາຄົດ  ເພື່ອເປັນການສົ່ງເສີມການຂາຍ ລົດທີ່ໃຊ້ພະລັງງານນໍ້າມັນ ແລະ ລົດທີ່ໃຊ້ພະລັງງານໄຟຟ້າ ເຊິ່ງມີທັງຄຸນນະພາບ, ມາດຕະຖານ ແລະ ລາຄາ ທີ່ແຕກຕ່າງກັນ. ຍ້ອນແນວນັ້ນ, ຈຶ່ງກໍໃຫ້ເກີດ ມີຄວາມຄິດ ທີ່ຈະໃຫ້ຂໍ້ມູນຜູ້ຊົມໃຊ້ ສາມາດປຽບທຽບຂໍ້ມູນຕ່າງໆ ຂອງລົດແຕ່ລະຮຸ່ນ, ແຕ່ລະຍີ້ຫໍ້ ໄດ້ຢ່າງທົ່ວເຖິງ. ທັງນີ້, ເພື່ອຜັກດັນການແຂ່ງຂັນວົງການຍານພາຫະນະ ຢູ່ບ້ານເຮົາໄດ້ມີການເຕີບໂຕຂຶ້ນຕື່ມ ແລະ ເຫັນໄດ້ເຖິງຄວາມສຳຄັນລະ ຫວ່າງຄວາມຕ້ອງການຂອງຜູ້ຊື້ ແລະ ການຕອບສະໜອງຂອງຜູ້ຂາຍ ບໍລິສັດ ອີລີເກັ້ນ ອີເວັ້ນ ຈຳກັດຜູ້ດຽວ ຈຶ່ງເຂົ້າມາມີສ່ວນຮ່ວມ ເພື່ອເປັນສື່ກາງ ໃຫ້ແກ່ຜູ້ປະກອບການ ທາງດ້ານທຸລະກິດລົດ ໄດ້ມີການໂຄສະນາ ໃຫ້ຄວາມຮູ້ກ່ຽວກັບນະວັດຕະກຳໃໝ່ໆຂອງລົດ ໃຫ້ແກ່ກຸ່ມລູກຄ້າເປົ້າໝາຍ ເພື່ອເປັນຂໍ້ມູນໃນການຕັດສິນໃຈຊື້ລົດ.

ໃນງານຄັ້ງນີ້, ຍັງໄດ້ຈັດຫລາຍກິດຈະກຳ ເປັນຕົ້ນ ລູກຄ້າທີ່ຈອງລົດພາຍໃນງານ ຈະມີສິດລົງທະບຽບເພື່ອຮັບຄູ່ປ່ອງລຸ້ນໂຊກ, ແຈກລາງວັນ ເປັນຕົ້ນ ເຄືອບແກ້ວຟຣີ 30 ຄັນ, ແຈກລົດໄຟຟ້າ 3 ຄັນ, ແຈກ Smart TV 5 ໜ່ວຍ, ແຈກຕູ້ເຢັນ 9 ໜ່ວຍ, ແຈກປຸມເປົ້າ 5.000 ໜ່ວຍ, ພວງກະແຈ 500 ອັນ  ແລະ ລາງວັນອື່ນໆ ອີກຢ່າງຫລວງຫລາຍ. ພ້ອມນັ້ນ, ພາຍໃນງານ ຍັງມີງານປະກວດ Cosplay, ແຂ່ງຂັນເຕັ້ນ Concept ລົດຍົນ, ມີການເເຂ່ງເຕັ້ນໂຄເວີ້ ຂອງກຸ່ມນ້ອງໆນັກຮຽນ ທີ່ມີຄວາມສາມາດ, ຈັດປະກວດເດີນແບບ ຂອງນ້ອງນ້ອຍ ໃນຫົວຂໍ້ຮັກໂລກ ໂດຍນຳໃຊ້ລົດໄຟຟ້າ ແລະ ຍັງມີໂປຣໂມຊັນ ຈາກບັນດາຄ້າຍລົດ ເພື່ອບໍລິການດຶງດູດເເຂກ ທີ່ເຂົ້າມາຮ່ວມງານ. ນອກນີ້, ບໍລິສັດ ຍັງຈະໄດ້ລະດົມທຶນ ຊ່ວຍເຫລືອຕ້ານໄພໜາວ ຢູ່ຊົນນະບົດຫ່າງໄກສອກລີກ ຕື່ມອີກ.

ຂ່າວ: ທະນູທອງ

ພາບ: ອ່າຍຄຳ

KPL