ຂປລ. ສຳນັກ​ຂ່າວ ​ເອ​ເອຟພີ ລາຍ​ງານ​ ຈາກ​ເມືອງ ອິສຕັນ​ບູ ປະ​ເທດ​ຕວັກ​ກີ ​ເມື່ອ​ບໍ່​ດົນ​ມາ​ນີ້​ວ່າ: ທ່ານ ​ເຣ​ເຊບ ​ເທຍິບ ເອີຣ​ໂດ​ກັນ  ປະທານາທິບໍດີ ຕວັກ​ກີ ໄດ້ຂະຫຍາຍ​ຂອບ​ເຂດ ຂອງ ​ຄຳ​ໝັ້ນສັນຍາ ​ທາງ​ການ​ເງິນ ສຳລັບ ​ຄອບຄົວ ​ແລະ ຄູ່​ບ່າວສາວ ​ທີ່​ຫາ​ກໍ່​ແຕ່ງງານ ​ເພື່ອ​ສະໜັບສະ​ໜູນ ການ​ມີ​ລູກ ທ່າມ​ກາງ​ບັນຫາ​ ປະຊາກອນ ທີ່​ຫລຸດ​ລົງ​ ຢ່າ​ງຕໍ່​ເນື່ອງ ຊຶ່ງ​ອາດ​ຈະສົ່ງ​ ຜົນ​ກະທົບ ​ຕໍ່​ການ​ເຕີບ​ໂຕ​ ທາງ​ເສດຖະກິດ.

​          ໂດຍ​ຜູ້​ສູງ​ອາຍຸ​ ຂອງ ຕວັກ​ກີ ກວມເອົາ ຫລາຍ​ກວ່າ 10% ຂອງ ​ປະຊາກອນ​ທັງ​ໝົດ ​ເປັນ​ຄັ້ງ​ທຳ​ອິດ​ໃນ​ປະຫວັດ​ສາດ​ ຂອງ​ ປະ​ເທດ, ໃນຂະນະ​ທີ່ ອາຍຸ​ສະ​ເລ່ຍ ​ເພີ່ມ​ຂຶ້ນ​ເປັນ 34 ​ປີ , ຊຶ່ງ​ເປັນ ເປົ້າ​ໝາຍ ທີ່​ ລັດຖະບານ ຕວັກ​ກີ ຕ້ອງການ​ບັນລຸ ​ຄື: ການ​ເຮັດ​ໃຫ້ ​ແຕ່​ລະ​ຄອບຄົວ ມີ​ລູກ 3 ຄົນ.

ສ່ວນ​ອັດຕາ​ການ​ເກີດ​ ຂອງ​ເດັກ​ ຫລຸດ​ລົງ ​ເຫລືອ 1,51 ຄົນ​ຕໍ່​ແມ່ຍິງ 1​ ຄົນ ​ໃນ​ປີ 2023 ​ເມື່ອ​ທຽບກັບ​ເດັກ 2,38 ຄົນ​ຕໍ່​ແມ່ຍິງ1​ ຄົນ ​ໃນ​ປີ 2001. ນອກ​ນີ້ ທ່ານ ເຣ​ເຊບ ​ເທຍຍິບ ເອີຣ​ໂດ​ກັນ  ຍັງປະກາດ​ວ່າ ປີ 2025 ​ເປັນ​ປີ ແຫ່ງ​ຄອບຄົວ ​ເພື່ອພະຍາຍາມ ​ແລະ ​ແກ້​ໄຂ​ສະຖານະ​ການ​ດັ່ງກ່າວ. ນອກ​ນີ້ ລັດຖະບານ ​ຕວັກ​ກີ ຈະ​ເພີ່ມ​ຄວາມ​ຊ່ວຍ​ເຫລືອ​ ທາງ​ດ້ານ ການ​ເງິນ ​ໂດຍ​ຈະ​ມອບ​ເງິນ​ ຄັ້ງ​ດຽວ 5.000 ລີຣາ ​ເມື່ອ​ເກີດ​ລູກ ​ຄົນ​ທຳ​ອິດ ລວມ​ເຖິງ​ ດຳ​ເນີນ​ການ​ຊ່ວຍ​ເຫລືອ​ເດັກ ​ເປັນ​ຈຳນວນ​ເງິນ 1.500 ລີຣາຕໍ່​ເດືອນ ສຳລັບ​ລູກ​ຄົນທີ2 ​ແລະ 5.000 ລີຣາຕໍ່​ເດືອນ​ສຳລັບ​ລູກ​ຄົນທີ 3 ຂຶ້ນ​ໄປ./

KPL