ຂປລ
ທ່ານ ໂວໂລດີເມຍຣ ເຊເລນສກີ ປະທານາທິບໍດີ ອູແກຣນ ໄດ້ຕ້ອນຮັບ ທ່ານ ເຊີຣ ເຄີຍຣ ສຕາຣເມີຣ ນາຍົກ ລັດຖະມົນຕີ ອັງກິດ ຢູ່ນະຄອນຫລວງຄິຟ
ຂປລ. ສຳນັກຂ່າວ ຕ່າງປະເທດ ລາຍງານ ຈາກ ນະຄອນຫລວງ ຄິຟ ປະເທດ ອູແກຣນ ເມື່ອວັນທີ 17 ມັງກອນ 2025ວ່າ: ທ່ານ ໂວໂລດີເມຍຣ ເຊເລນສກີ ປະທານາທິບໍດີ ອູແກຣນ ໄດ້ຕ້ອນຮັບ ທ່ານ ເຊີຣ ເຄີຍຣ ສຕາຣເມີຣ ນາຍົກ ລັດຖະມົນຕີ ອັງກິດ ຢູ່ນະຄອນຫລວງຄິຟ , ຖືເປັນ ການຢ້ຽມຢາມ ອູແກຣນ ຢ່າງເປັນທາງການຄັ້ງທຳອິດ ຂອງ ທ່ານ ເຊີຣ ເຄີຍຣ ສຕາຣເມີຣ ນັບຕັ້ງແຕ່ ຮັບຕຳແໜ່ງ ເມື່ອເດືອນ ກໍລະກົດທີ່ຜ່ານມາ.
ໂດຍຜູ້ນຳທັງສອງ ປະເທດ ໄດ້ລົງນາມ ຮ່ວມກັນ ໃນຂໍ້ຕົກລົງ ການເປັນຄູ່ຮ່ວມມື ລະດັບ ທະວີພາຄີ ຄວບຄຸມ ໄລຍະເວລາ 100 ປີ. ຊຶ່ງເປັນ ກອບຄວາມຮ່ວມມື ທີ່ຈະເຮັດໃຫ້ ອັງກິດ ກັບ ອູແກຣນ ມີຄວາມໃກ້ຊິດກັນຫລາຍຂຶ້ນ ແລະ ຄາດຫວັງວ່າ ຈະໄດ້ຮັບ ການສະໜັບສະໜູນ ແບບດຽວກັນນີ້ ຈາກສາກົນ. ສຳລັບ ເນື້ອໃນສຳຄັນ ຂອງ ຂໍ້ຕົກລົງ ແມ່ນ ອູແກຣນ ແລະ ອັງກິດ ໄດ້ຂະຫຍາຍ ຂອບເຂດ ຄວາມຮ່ວມມື ດ້ານຄວາມໝັ້ນຄົງ ລວມເຖິງ ການພັດທະນາ ອຸດສາຫະກຳ ປ້ອງກັນ ປະເທດຂອງ ອູແກຣນ ແລະ ການຍອມຮັບ ອູແກຣນ ໃນຖານະ “ພັນທະມິດໃນອະນາຄົດ” ຂອງ ອົງການສົນທິສັນຍາ ອັດລັງຕິກເໜືອ (ນາໂຕ). /
KPL
