ຂປລ. ໃນວັນ​ທີ 21 ເມສາ 2025 ຜ່ານ​ມາ, ຄະນະຫ້ອງວ່າການປົກຄອງແຂວງຫົວພັນ ແລະ ສະມາຄົມມິດຕະພາບ ລາວ-ສປປ ເກົາຫລີ ຮ່ວມກັບ ສະຖານເອກອັກຄະລັດຖະທູດ ແຫ່ງ ສປປ ເກົາຫລີ ປະຈໍາ ສປປ ລາວ  ​ຈັດປາຖະກະຖາ ລະນຶກວັນຄ້າຍວັນເກີດ ສະຫາຍ ກິມ ອິນ ຊຸງ ຜູ້ນໍາທີ່ຍິ່ງໃຫຍ່ຂອງ ປະຊາຊົນ ສປປ ເກົາຫລີ ຄົບຮອບ 113 ປີ (​15/4/1912-15/4/2025) ຢູ່ແຂວງຫົວພັນ, ພ້ອມທັງ ວາງ​ສະ​ແດງ​ຮູບ​ພ​າບ, ສາຍ​ວິ​ດີ​ໂອ ກ່ຽວ​ກັບ​​ຊີວິດການເຄື່ອນໄຫວປະຕິວັດ ແລະ ຜົນງານໃນການນໍາພາ ຂອງ ສະຫາຍ ກິມ ອິນ ຊຸງ ໃນພາລະກິດປົກປັກຮັກສາ ແລະ ສ້າງສາພັດທະນາ ປະເທດຊາດ ສປປ ເກົາຫລີ ໃນໄລຍະຜ່ານມາ ໂດຍມີ ສະຫາຍ ອາດສະພັງທອງ ສີພັນດອນ ກໍາມະການສູນກາງພັກ, ປະທານຄະນະກຳມະການປົກຄອງ ນະຄອນຫລວງວຽງຈັນ, ປະທານສະມາຄົມມິດຕະພາບ ລາວ-ສປປ ເກົາຫລີ, ສະຫາຍ  ພຸດພັນ ແກ້ວວົງໄຊ ຮອງປະທານກຳມະທິການປົກຄອງແຂວງຫົວພັນ,  ສະຫາຍ ລີ ຢົງ ຊົນ ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສປປ ເກົາຫລີ ປະຈໍາ ສປປ ລາວ ພ້ອມດ້ວຍພາກສ່ວນກ່ຽວຂ້ອງ ເຂົ້າຮ່ວມ.

ໂອກາດດັ່ງກ່າວ, ສະຫາຍ ລີ ຢົງ ຊົນ ໄດ້ຫວນຄືນເຖິງການອຸທິດຊີວິດເຂົ້າໃນ ການເຄື່ອນໄຫວປະຕິວັດ  ແລະ ແບບແຜນການນໍາພາ ຂອງ ສະຫາຍ ກິມ ອິນ ຊຸງ ໃນພາລະກິດຕໍ່ສູ້ປົດປ່ອຍຊາດ ກໍຄື ການປົກປັກຮັກສາ ແລະ ສ້າງສາປະເທດຊາດໃນແຕ່ລະໄລຍະ, ອັນພົ້ນເດັ່ນແມ່ນ ໄດ້ສ້າງແນວຄິດຈຸເຊ (Juche Idea) ແລະ ແບບແຜນການນຳພາການຕໍ່ສູ້ປະຕິວັດ ຕໍ່ຕ້ານຈັກກະພັດຕ່າງດ້າວ ເປັນເວລາສອງທົດສະວັດ ເພື່ອປົດປ່ອຍປະເທດຊາດໃນປີ 1945. ຫລັງຈາກນັ້ນ, ກໍໄດ້ນໍາພາສ້າງຕັ້ງພັກແຮງງານເກົາຫລີ. ສະຫາຍ ກິມ ອິນ ຊຸງ ແມ່ນຜູ້ນໍາຮຸ່ນທໍາອິດ ໃນການສ້າງແນວຄິດ ແລະ ແບບແຜນການນໍາພາ ການຕໍ່ສູ້ການສ້າງສາ ພັດທະນາປະເທດຊາດ ແລະ ສືບທອດມາຍັງ ສະຫາຍ ກິມ ເຈິງ ອິນ ໄດ້ສືບຕໍ່ແນວຄິດ ແລະ ແບບແຜນການນໍາພາ ຈົນມາຮອດ  ປັດຈຸບັນ ທີ່ສະຫາຍ ກິມ ເຈິງ ອຸນ ພວມສືບຕໍ່ພາລະກິດດັ່ງກ່າວ, ຈຶ່ງເຮັດໃຫ້ ສປປ ເກົາຫລີ ມີການພັດທະນາຢ່າງຕໍ່ເນື່ອງ, ການເມືອງມີສະຖຽນລະພາບໜັກແໜ້ນ, ວຽກງານປ້ອງກັນຊາດ-ປ້ອງການຄວາມສະຫງົບມີຄວາມເຂັ້ມແຂງ ແລະ ທັນສະໄໝ, ເສດຖະກິດມີການພັດທະນາ, ຊີວິດການເປັນຢູ່ຂອງປະຊາຊົນໄດ້ຮັບການພັດທະນາ ແລະ ປັບປຸງດີຂຶ້ນເລື້ອຍໆ, ການພົວພັນຕ່າງປະເທດ ໄດ້ຮັບການເປີດກວ້າງເທື່ອລະກ້າວ, ເຮັດໃຫ້ບົດບາດການນໍາພາ ຂອງ ພັກ, ລັດ ສປປ ເກົາຫລີ ນັບມື້ນັບສູງເດັ່ນຂຶ້ນ.

ສະຫາຍ ເອກອັກຄະລັດຖະທູດ ຍັງໄດ້ຍົກໃຫ້ເຫັນເຖິງສາຍພົວພັນ ແລະ ການຮ່ວມມືອັນດີງາມ ​ທີ່ໄດ້​ຮັບການສ້າງຕັ້ງໂດຍ​ ສະຫາຍ ໄກ​ສອນ ພົມ​ວິ​ຫານ ຜູ້​ນຳ​ທີ່​ແສນ​ເຄົາ​ລົບ​ຮັກ ຂອງ​ປະ​ຊາ​ຊົນ​ລາວ ແລະ ສະ​ຫາຍ ກິມ ອິນ ຊຸງ ຜູ້​ນຳ​ທີ່ຍິ່ງ​ໃຫຍ່ ຂອງ​ປະ​ຊາ​ຊົນ ສປປ ເກົາ​ຫລີ ແລະ ໄດ້​ຮັບ​ການເສີມຂະ​ຫຍາຍ ແລະ ​ເພີ່ມ​ພູນ​ຄູນ​ສ້າງໃຫ້ນັບມື້ກ້າວເຂົ້າສູ່ລວງເລິກ ໂດຍການນໍາແຕ່ລະຮຸ່ນ ຂອງສອງພັກ, ສອງລັດ ແລະ ປະຊາຊົນຂອງສອງປະເທດ ການນໍາຂອງສອງປະເທດໄດ້ມີການໄປມາຫາສູ່, ພົບປະແລກປ່ຽນຮ່ວມມື ແລະ ຊ່ວຍເຫລືອເຊິ່ງກັນ ແລະ ກັນ ເພື່ອນໍາເອົາຜົນປະໂຫຍດ ມາສູ່ປະຊາຊົນສອງປະເທດ ກໍຄື ເພື່ອພາລະກິດປົກປັກຮັກສາ ແລະ ສ້າງສາພັດທະນາ ຂອງ ແຕ່ລະປະເທດ.

ໂອກາດນີ້, ສະຫາຍ ອາດສະພັງທອງ ສີພັນດອນ ໄດ້ຕາງໜ້າໃຫ້ ສະມາຄົມມິດຕະພາບ ລາວ-ສປປ ເກົາຫລີ ມອບເງິນໃຫ້ແກ່ແຂວງຫົວພັນ ລວມມູນຄ່າທັງໝົດ 400 ລ້ານກີບ ຕາງໜ້າຮັບໂດຍ ສະຫາຍ ພຸດພັນ ແກ້ວວົງໄຊ ຮອງປະທານກຳມະທິການປົກຄອງແຂວງຫົວພັນ.

ຂ່າວ-ພາບ: ຄຕພ

KPL