ຂປລ. ຄະນະຜູ້ແທນລາວ ນໍາໂດຍ ທ່ານ ນາງ ດາລານີ ພົມມະວົງສາ ຮອງລັດຖະມົນຕີ ກະ ຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ແຫ່ງ ສປປ ລາວ ໄດ້ເຂົ້າຮ່ວມກອງປະຊຸມ ລະດັບລັດຖະມົນຕີ ການຮ່ວມມືທາງດ້ານວັດທະນະທໍາແຫ່ງອາຊີ ປະຈຳປີ 2025 ໃນວັນທີ 22 ເມສາ 2025 ຢູ່ຮົງກົງ ສປ ຈີນ ເຊິ່ງມີຄະນະຜູ້ແທນ ຈາກ 27 ປະເທດເຂົ້າຮ່ວມ.

ກອງປະຊຸມຄັ້ງ​ນີ້, ໄດ້ປຶກສາຫາລື ແລະ ແລກປ່ຽນທັດສະນະກ່ຽວກັບ ບົດບາດສໍາຄັນຂອງວັດທະນະທໍາ ໃນໄລຍະໃໝ່ ພາຍໃຕ້ຫົວຂໍ້ “Connect. Create. Engage: Bridging Cultural for All” ເພື່ອແລກປ່ຽນຂໍ້ມູນຂ່າວສານ, ແນວທາງການຮ່ວມມື ທາງດ້ານສິລະປະວັດທະ ນະທຳ ລວມທັງຜະລິດຕະພັນວັດທະນະທຳຕ່າງໆ, ບົດບາດຄວາມສຳຄັນຂອງວຽກງານວັດທະນະທຳ ຕໍ່ກັບການພັດທະນາເສດຖະກິດ-ສັງຄົມ, ການສ້າງຄວາມເຂັ້ມແຂງ, ການມີສ່ວນຮ່ວມ ແລະ ການພັດທະນາແບບຍືນຍົງ ກໍຄື ການຍົກລະດັບຂອບການຮ່ວມມື ລະຫວ່າງລັດຖະບານ, ແລກປ່ຽນຄວາມຄິດເຫັນກ່ຽວກັບ ນະໂຍບາຍການຮ່ວມມື ທາງດ້ານວັດທະນະທຳ ເພື່ອຊຸກຍູ້ສົ່ງເສີມການຮ່ວມມືລະ ຫວ່າງ ຮົງກົງ ກັບ ບັນດາປະເທດ ຄູ່ຮ່ວມມືຕ່າງໆ ໃຫ້ແໜ້ນແຟ້ນຍິ່ງຂຶ້ນ. 

ໃນໂອກາດນີ້, ທ່ານ ນາງ ດາລານີ ພົມມະວົງສາ  ກໍ​ໄດ້ມີຄຳເຫັນຕໍ່ກອງປະຊຸມ ໂດຍໄດ້ຍົກໃຫ້ເຫັນນະໂຍບາຍຂອງ ພັກ-ລັດຖະບານ ສປປ ລາວ ຕໍ່ວຽກງານການປົກປັກຮັກສາ ແລະ ພັດທະນາສົ່ງເສີມ ວັດທະນະທຳອັນດີງາມ ກໍຄື ການປົກປັກຮັກສາມໍລະດົກ ວັດທະນະທຳຂອງຊາດ. ນອກນັ້ນທ່ານຍັງໄດ້ ເນັ້ນເຖິງການຮ່ວມມື ກໍຄື ການແລກປ່ຽນວັດທະນະທຳ ກັບບັນດາປະເທດເພື່ອນມິດ ໃນພາກພື້ນ ແລະ ໃນໂລກ ຢູ່ໃນເວທີຕ່າງໆທີ່ມີຜົນປະໂຫຍດຮ່ວມກັນ. ຄຽງຄູ່ກັນນັ້ນ, ວັດທະນະທຳມີບົດບາດສຳຄັນ ຕໍ່ຂົງເຂດເສດຖະກິດ-ສັງຄົມ ເປັນຕົ້ນ ສ້າງວຽກເຮັດງານທຳ ທີ່ມີລາຍຮັບທີ່ໝັ້ນຄົງ ຕິດພັນກັບການສົ່ງເສີມຫົວຄິດປະດິດສ້າງ ແລະ ພູມປັນຍາທີ່ເປັນເອກະລັກ ຂອງປະຊາຊົນບັນດາເຜົ່າ, ຕໍ່ການພົວພັນລະຫວ່າງປະເທດ ແລະ ຊີວິດການເປັນຢູ່ຂອງມວນມະນຸດ. 

ນອກຈາກນີ້, ຄະນະຜູ້ແທນລາວ ຍັງໄດ້ນຳສະເໜີມໍລະດົກວັດທະນະທຳລາວ ເຊິ່ງປັດຈຸບັນ ມີມໍລະດົກໂລກ 3 ແຫ່ງ ຄື: ເມືອງຫລວງພະບາງ, ປາສາດຫີນວັດພູຈຳປາສັກ ແລະ ທົ່ງໄຫຫີນຊຽງຂວາງ. ຄຽງຄູ່ກັນນັ້ນ, ມໍລະດົກວັດທະນະທຳ ນາມມະທຳ ຂອງລາວ ກໍໄດ້ຖືກຮັບຮອງເຂົ້າໃນ ບັນຊີມໍລະດົກໂລກທາງດ້ານວັດທະນະທຳ ທີ່ບໍ່ເປັນວັດຖຸ ໂດຍອົງການອຸຍແນັສໂກ ເປັນຕົ້ນ ຮັບຮອງເອົາສຽງແຄນເຊື້ອຊາດລາວ ໃນປີ 2017, ພູມປັນຍາຕໍ່າລາຍນາກ ໃນປີ 2023 ແລະ ຟ້ອນລໍາວົງລາວ ໃນປີ 2024. ໃນປີ 2025 ນີ້, ຈະສືບຕໍ່ກະກຽມເອກະສານນຳສະເໜີ ປ່າສະຫງວນແຫ່ງຊາດຫີນໜາມໜໍ່ ແຂວງຄຳມ່ວນ ເປັນມໍລະດົກໂລກ ທາງດ້ານທຳມະຊາດແຫ່ງທຳອິດຂອງ ສປປ ລາວ.

ການຈັດຕັ້ງປະຕິບັດຂໍ້ລິເລີ່ມ “ໜຶ່ງແລວ ໜຶ່ງເສັ້ນທາງ” ໄດ້ມີຜົນສຳເລັດທີ່ເປັນຮູບປະທຳຢ່າງເດັ່ນຊັດ ເປັນທີ່ຮັບຮູ້ຂອງທົ່ວໂລກ ໂດຍສະເພາະແມ່ນ ດ້ານການພັດທະນາພື້ນຖານໂຄງລ່າງ, ການເຊື່ອມໂຍງ-ເຊື່ອມຈອດ ແລະ ການສ້າງເງື່ອນໄຂທີ່ເອື້ອອຳນວຍ ເພື່ອຊຸກຍູ້, ສົ່ງເສີມ ແລະ ຂະຫຍາຍການຮ່ວມມື ດ້ານການແລກປ່ຽນວັດທະນະທຳ ແລະ ສົ່ງເສີມການທ່ອງທ່ຽວ, ການໄປມາຫາສູ່ກັນ ລະຫວ່າງ ປະຊາຊົນຂອງສອງປະເທດ ກໍຄື ບັນດາໂຄງການພັດທະນາ ດ້ານພື້ນຖານໂຄງລ່າງ ດ້ານວັດທະນະທຳ ແລະ ອື່ນໆ.

ລັດຖະບານ ແຫ່ງ ສປປ ລາວ ຖືສໍາຄັນ ແລະ ໃຫ້ການສະໜັບສະໜູນ ນະໂຍບາຍ “ໜຶ່ງແລວ ໜຶ່ງເສັ້ນທາງ” ຂອງ ສປ ຈີນ ເພື່ອເຊື່ອມໂຍງ ກັບຍຸດ​ທະ​ສາດ​ການຫັນ ສປປ ລາວ ຈາກປະເທດທີ່ບໍ່ມີຊາຍແດນຕິດກັບທະເລ ໃຫ້ກາຍເປັນປະເທດ ເຊື່ອມໂຍງເຊື່ອມຈອດກັບພາກພື້ນ. ພຶດຕະກຳຕົວຈິງ ໄດ້ພິສູດໃຫ້ເຫັນວ່າ ການຈັດຕັ້ງປະຕິບັດ ຂໍ້ລິເລີ່ມ “ໜຶ່ງແລວ ໜຶ່ງເສັ້ນທາງ” ໄດ້ນຳເອົາຜົນປະໂຫຍດເປັນຮູບປະທໍາ ມາສູ່ບັນດາປະເທດກໍາລັງພັດທະນານັບມື້້ນັບຫລາຍຂຶ້ນ, ລວມທັງ ສປປ ລາວ, ອັນພົ້ນເດັ່ນ ທີ່ສຸດແມ່ນຜົນສຳເລັດໂຄງການລົດໄຟຄວາມໄວສູງ ລາວ-ຈີນ ເປັນໂຄງການ ໄດ້ຮັບນາມມະຍົດແຫ່ງການຮ່ວມມື ລາວ-ຈີນ.

ໃນຕອນເຊົ້າວັນດຽວກັນ, ທ່ານ ນາງ ດາລານີ ພົມມະວົງສາ ພ້ອມຄະນະ ຍັງໄດ້ພົບປະສອງຝ່າຍ ກັບ ທ່ານ ນາງ ຊັມ ຟົງ ກວາງ (ວິວຽນ ຊຳ) ຮອງເລຂາທິການ ກະຊວງວັດທະນະທຳ,​ ກິລາ ແລະ ທ່ອງທ່ຽວ ຮົງກົງ ​ໂດຍສອງຝ່າຍໄດ້ແລກປ່ຽນຄໍາເຫັນກ່ຽວກັບ ຊ່ອງທາງການແລກປ່ຽນຮ່ວມມື ໃນຂົງເຂດວັດທະນະທຳ ແລະ ການທ່ອງທ່ຽວ ກໍຄື ການຜັນຂະຫຍາຍຜົນການຢ້ຽມຢາມ ທາງການ ທີ່ ສປປ ລາວ ຂອງ ທ່ານ ຈອນ ລີ ກາ ສຸຍ ຜູ້ວ່າການ ເຂດປົກຄອງພິເສດ ຮົງກົງ ໃນລະຫວ່າງວັນທີ 28-29 ກໍລະກົດ 2024 ທີ່ຜ່ານມາ ເປັນຕົ້ນ ການປົກປັກຮັກສາມໍລະດົກ ວັດທະນະທໍາໃນຍຸກດີຈິຕອນ, ການແລກປ່ຽນດ້ານຮູບເງົາ, ການແລກປ່ຽນສິລະປະ-ວັນນະຄະດີ ກໍຄື ການຮ່ວມມືສົ່ງເສີມການ ທ່ອງທ່ຽວຮ່ວມກັນ ໃນຕໍ່ໜ້າ. 

KPL