ຂປລ
ຂປລ.ໃນວັນທີ 9 ມັງກອນ 2015 ພິທີມອບໃບຍ້ອງຍໍ ໄດ້ຈັດຂຶ້ນທີ່ບ້ານພັກ ທ່ານເອກອັກຄະ ຣາຊະທູດຍີ່ປຸ່ນ ປະຈຳ ສປປ ລາວ, ນະຄອນຫລວງວຽງຈັນ ເຊິ່ງເປັນໃບຍ້ອງຍໍຂອງລັດຖະມົນຕີ ກະຊວງການຕ່າງປະເທດຍີ່ປຸ່ນມອບ ໃຫ້ແກ່ສະມາຄົມ ອະດີດນັກສຶກສາລາວ ທີ່ຈົບຈາກປະເທດຍີ່ປຸ່ນ (JAOL)
ຂປລ.ໃນວັນທີ 9 ມັງກອນ 2015 ພິທີມອບໃບຍ້ອງຍໍ ໄດ້ຈັດຂຶ້ນທີ່ບ້ານພັກ ທ່ານເອກອັກຄະ ຣາຊະທູດຍີ່ປຸ່ນ ປະຈຳ ສປປ ລາວ, ນະຄອນຫລວງວຽງຈັນ ເຊິ່ງເປັນໃບຍ້ອງຍໍຂອງລັດຖະມົນຕີ ກະຊວງການຕ່າງປະເທດຍີ່ປຸ່ນມອບ ໃຫ້ແກ່ສະມາຄົມ ອະດີດນັກສຶກສາລາວ ທີ່ຈົບຈາກປະເທດຍີ່ປຸ່ນ (JAOL) ເພື່ອຢັ້ງຢືນ ແລະ ຍ້ອງຍໍຜົນງານທີ່ສະມາຄົມ ໄດ້ປະກອບສ່ວນສົ່ງເສີມ ສາຍພົວພັນ ມິດຕະ ພາບ ແລະ ຄວາມເຂົ້າໃຈເຊິ່ງກັນ ແລະ ກັນ ລະຫວ່າງ ປະຊາຊົນ ລາວ-ຍີ່ປຸ່ນ. ໃນພິທີດັ່ງກ່າວ ທ່ານ ຄິຊິໂນະ ຮິໂຣະຢູກິ, ເອກອັກຄະຣາຊະທູດຍີ່ປຸ່ນ ປະຈຳ ສປປ ລາວ ໄດ້ມອບໃບຍ້ອງຍໍໃຫ້ແກ່ ທ່ານ ນາງ ບົວສອນ ວົງຖາວອນ, ປະທານສະມາຄົມອະດີດນັກສຶກສາລາວ ທີ່ຈົບຈາກປະເທດຍີ່ປຸ່ນ (JAOL) ເຊິ່ງມີ ທ່ານ ດຣ ປອນເມກ ດາລາລອຍ, ປະທານສະມາຄົມມິດຕະພາບ ລາວ-ຍີ່ປຸ່ນ, ສະ ມາຊິກຂອງສະມາຄົມອະດີດນັກສຶກສາລາວທີ່ຈົບຈາກປະເທດຍີ່ປຸ່ນ (JAOL), ແລະ ອົງການ ຈັດຕັ້ງ ທີ່ກ່ຽວຂ້ອງພາກລັດຕ່າງໆເຂົ້າຮ່ວມເປັນສັກຂີພະຍານ.
ໃນພິທີດັ່ງກ່າວ ທ່ານ ຄິຊິໂນະ ຮິໂຣະຢູກິ, ເອກອັກຄະຣາຊະທູດຍີ່ປຸ່ນ ປະຈຳ ສປປ ລາວ ໄດ້ສະແດງ ຄວາມຍິນດີ ແລະ ຍ້ອງຍໍຕໍ່ກັບຜົນງານຂອງສະມາຄົມທີ່ໄດ້ປະກອບສ່ວນ ໃນການສົ່ງເສີມການແລກປ່ຽນລະຫວ່າງ ຄົນກັບຄົນ ໂດຍຜ່ານການ ມີສ່ວນຮ່ວມໃນໂຄງການ ການແລກປ່ຽນ ແລະ ວັດທະນາທຳຕ່າງໆ, ນອກຈາກນັ້ນ ພວກເຂົາກໍຍັງປະກອບສ່ວນອຳນວຍ ຄວາມສະດວກ ໃນການເປັນ ຄູ່ຮ່ວມ ທຸລະກິດລະຫວ່າງ ລາວ-ຍີ່ປຸ່ນ ໂດຍຜ່ານ ເຄືອຂ່າຍອັນກວ້າງຂວາງຂອງພວກເຂົາ.
JAOL ແມ່ນສະມາຄົມອະດີດນັກສຶກສາ ທີ່ປະກອບດ້ວຍນັກສຶກສາລາວທີ່ຮຽນ ຈົບມາຈາກປະເທດຍີ່ປຸ່ນ, ໂດຍສະມາຊິກ ສ່ວນຫລາຍແມ່ນນັກສຶກສາ ທີ່ໄດ້ຮັບທຶນການສຶກສາ. ສະມາຄົມ ດັ່ງກ່າວໄດ້ສ້າງຕັ້ງຂຶ້ນໃນປີ 2001 ເຊິ່ງ ເປັນສະມາຄົມ ທີ່ບໍ່ໄດ້ສະແຫວງ ຫາກຳໄລພາຍໃຕ້ການ ຊີ້ນຳຂອງສະມາຄົມ ມິດຕະພາບ ລາວ-ຍີ່ປຸ່ນ. ປັດຈຸບັນ JAOL ມີສະມາຊິກຫລາຍກວ່າ 250 ຄົນ ແລະ ພວກເຂົາມີບົດບາດສໍາຄັນໃນຫລາຍໆຂະແໜງການວຽກງານຕ່າງໆ ໃນປະເທດ ລາວ, ບໍ່ ວ່າຈະແມ່ນພາກລັດ ຫລື ອົງການຈັດຕັ້ງສາກົນ, ວຽກງານການສຶກສາ ແລະ ພາກສ່ວນເອກະ ຊົນຕ່າງໆ.
ມອບໃບຍ້ອງຍໍຄັ້ງນີ້ແມ່ນເປັນຄັ້ງທີ 2 ໃນປີ 2014 ທີ່ຈັດຂຶ້ນໂດຍ ທ່ານເອກອັກຄະ ຣາຊະ ທູດຍີ່ປຸ່ນ ປະຈຳ ສປປ ລາວ.
KPL
