ຂປລ
ຂປລ. ຄະນະຜູ້ແທນກະຊວງ ວິທະຍາສາດ ແລະ ເຕັກໂນໂລຊີ (ກວຕ) ແຫ່ງ ສປປ ລາວ ນໍາ ໂດຍທ່ານ ສຈ. ດຣ. ບໍ່ວຽງຄຳ ວົງດາລາ, ລັດຖະມົນຕີວ່າການ ກວຕ ພ້ອມດ້ວຍຄະນະ ໄດ້ສຳເລັດການ ໄປທັດສະນະສຶກສາ ກ່ຽວກັບວຽກງານ ວິທະຍາສາດ ແລະ ເຕັກໂນໂລຊີ
ຂປລ. ຄະນະຜູ້ແທນກະຊວງ ວິທະຍາສາດ ແລະ ເຕັກໂນໂລຊີ (ກວຕ) ແຫ່ງ ສປປ ລາວ ນໍາ ໂດຍທ່ານ ສຈ. ດຣ. ບໍ່ວຽງຄຳ ວົງດາລາ, ລັດຖະມົນຕີວ່າການ ກວຕ ພ້ອມດ້ວຍຄະນະ ໄດ້ສຳເລັດການ ໄປທັດສະນະສຶກສາ ກ່ຽວກັບວຽກງານວິທະຍາສາດ ແລະ ເຕັກໂນໂລຊີ ທີ່ຣາຊະອານາຈັກໄທ ໃນວັນທີ 18 ມັງກອນ 2015 ນີ້ ພາຍຫລັງທີ່ໄດ້ດຳເນີນມາ 6 ວັນ ຕາມການເຊື້ອເຊີນ ແລະ ໄດ້ຮັບກຽດຕ້ອນຮັບ ຂອງ ທ່ານ ດຣ. ພິເຊດ ດຸຣົງຄະວິໂຣດ, ລັດຖະມົນຕີວ່າການ ກະຊວງວິທະຍາສາດ ແລະ ເຕັກໂນໂລຊີ ແຫ່ງ ຣາຊະອານາຈັກໄທ ພ້ອມດ້ວຍຄະນະ.
ການເດີນທາງໄປຣາຊະອານາຈັກໄທຂອງຄະນະຜູ້ແທນກະຊວງ ກວຕ ແຫ່ງ ສປປ ລາວ ໃນຄັ້ງນີ້ ກໍເພື່ອທັດສະນະສຶກສາ, ແລກປ່ຽນ ບົດຮຽນ, ປະສົບການ ແລະ ສຶກສາຄວາມເປັນໄປໄດ້ ໃນການຮ່ວມມືສອງຝ່າຍ ໃນຂົງເຂດວຽກງານດັ່ງກ່າວ ເຊິ່ງຄະນະຜູ້ແທນລາວ ນອກຈາກໄດ້ພົບປະປຶກສາຫາລືສອງຝ່າຍ ກັບຄະນະຜູ້ແທນ ກະຊວງວິທະຍາສາດ ແລະ ເຕັກໂນໂລຊີ ແຫ່ງ ຣາຊະອານາຈັກໄທແລ້ວ ຍັງໄດ້ໄປທັດ ສະນະສຶກສາຢູ່ສວນອຸທິຍານວິທະຍາສາດ ແຫ່ງ ຣາຊະອານາຈັກໄທ, ສູນອີເລັກໂຕຣນິກ ແລະ ຄອມພິວເຕີ ແຫ່ງຊາດ, ສູນວິໄຈລະບົບນິເວດ ແລະ ຊີວະນາໆພັນ, ທັດສະນະສຶກສາຫໍເບິ່ງດາວ ແລະ ສະຖາບັນວິໄຈ ແສງຊິນ ໂຄຣຕອນ ຢູ່ແຂວງນະຄອນຣາຊະສີມາ, ທັດສະນະສຶກສາທີ່ພິພິຕະພັນວິທະຍາສາດແຫ່ງຊາດໄທ ຢູ່ບາງກອກ, ພິພິທະພັນທຳມະຊາດ ວິທະຍາ ແລະ ພິພິທະະພັນເຕັກໂນໂລຊີ ສາລະສົນເທດ ແລະ ຢ້ຽມ ຢາມສະຖາບັນດາລາສາດ ແຫ່ງ ຣາຊະອານາຈັກໄທ ທີ່ແຂວງຊຽງໃໝ່.
ທ່ານ ສຈ. ດຣ. ບໍ່ວຽງຄຳ ວົງດາລາ ໄດ້ກ່າວຕໍ່ສື່ມວນຊົນວ່າ: ຄະນະຜູ້ແທນ ກວຕ ແຫ່ງ ສປປ ລາວ ມີຄວາມຮູ້ສຶກດີໃຈ ແລະ ເປັນ ກຽດທີ່ໄດ້ມາຢ້ຽມ ຢາມຣາຊະອາຈັກໄທ ເຊິ່ງພວກຂ້າພະເຈົ້າໄດ້ຢ້ຽມຢາມ ບັນດາສູນຄົ້ນຄວ້າ ແລະ ພັດທະນາທາງດ້ານ ເອເລັກໂຕຣນິກ, ສູນຄົ້ນຄວ້າທາງດ້ານ ໄບໂອເຕັກໂນໂລຊີ, ໄບໂອເຕັກ ແລະ ສະຖາບັນຄົ້ນຄວ້າອື່ນໆ ເຊິ່ງເຫັນວ່າ ການຄົ້ນຄວ້າວິທະຍາສາດ ແລະ ເຕັກໂນໂລຊີ ຂອງ ປະເທດໄທ ແມ່ນຢູ່ໃນລະດັບສູງ. ສະນັ້ນ, ຂ້າພະເຈົ້າມີຄວາມຫວັງວ່າ: ໃນອະນາຄົດ ໂດຍພື້ນຖານການ ເຊັນສັນຍາໃນບົດບັນທຶກຊ່ວຍຈຳ ທີ່ທັງສອງກະຊວງ ວິທະຍາສາດ ແລະ ເຕັກໂນໂລຊີ ລາວ-ໄທ ໄດ້ເຊັນໄປ ແລ້ວນັ້ນ ຈະສາມາດຮ່ວມມືກັນໃນຫລາຍດ້ານ ເຊັ່ນ: ດ້ານຄອມພິວເຕີ ເອເລັກໂຕຣນິກ, ດ້ານຂໍ້ມູນສານ, ການຮ່ວມມືດ້ານ ໄບໂອເຕັກໂນໂລຊີ ແລະ ວຽກງານອື່ນໆອີກ./.
KPL
