ຂປລ
ຂປລ. ໃນວັນທີ 21 ມັງກອນ 2015 ໄດ້ຈັດບັ້ນຝຶກອົບຮົມ ໃຫ້ຄວາມຮູ້ແກ່ຄູຝຶກ ທີ່ຈະລົງສຳຫລວດພົນລະເມືອງ ແລະ ທີ່ຢູ່ອາໄສ ຄັ້ງທີ IV ປີ 2015 ໃຫ້ແກ່ບັນດາຕົວແທນ ຈາກ ກຳລັງຫລວງ ແລະ ກຳລັງທ້ອງຖິ່ນ ກະຊວງປ້ອງກັນປະເທດ ຢູ່ວິທະຍາຄານ ໄກສອນພົມວິຫານ ນະຄອນຫລວງວຽງຈັນ,
ຂປລ. ໃນວັນທີ 21 ມັງກອນ 2015 ໄດ້ຈັດບັ້ນຝຶກອົບຮົມໃຫ້ຄວາມຮູ້ແກ່ຄູຝຶກ ທີ່ຈະລົງສຳຫລວດພົນລະເມືອງ ແລະ ທີ່ຢູ່ອາໄສ ຄັ້ງທີ IV ປີ 2015 ໃຫ້ແກ່ບັນດາຕົວແທນຈາກ ກຳລັງຫລວງ ແລະ ກຳລັງທ້ອງຖິ່ນ ກະຊວງປ້ອງກັນປະເທດ ຢູ່ວິທະຍາຄານ ໄກສອນພົມວິຫານ ນະຄອນຫລວງວຽງຈັນ, ເພື່ອເປັນການສ້າງຄວາມພ້ອມ ໃນການລົງສຳຫລວດຕົວຈິງ ເຊິ່ງຈະເລີ່ມຂຶ້ນໃນວັນທີ 1-7 ມີນາ ປີນີ້.
ທ່ານ ພົນໂທ ຈັນສະໝອນ ຈັນຍາລາດ ລັດຖະມົນຕີຊ່ວຍວ່າການ ກະຊວງປ້ອງກັນປະເທດ, ຄະນະຊີ້ນຳວຽກງານສຳຫລວດພົນລະເມືອງ ແລະ ທີ່ຢູ່ອາໄສ ຄັ້ງທີ IV ແລະ ທ່ານ ດຣ ສະໄໝຈັນ ບຸບຜາ ຫົວໜ້າສູນສະຖິຕິແຫ່ງຊາດ ຄະນະຊີ້ນຳວຽກງານສຳຫລວດພົນລະເມືອງ ແລະ ທີ່ຢູ່ອາໄສ ຄັ້ງທີ IV, ຜູ້ປະຈຳການ ເຊິ່ງໃຫ້ກຽດເຂົ້າຮ່ວມເປັນປະທານ ບັ້ນຝຶກອົບຮົມ ແລະ ໄດ້ຜັດປ່ຽນກັນໃຫ້ທິດຊີ້ນຳ ແລະ ຍົກໃຫ້ເຫັນຄວາມໝາຍສຳຄັນຂອງ ການສຳຫລວດພົນລະເມືອງ ແລະ ທີ່ຢູ່ອາໄສ ເຊິ່ງລັດຖະບານໄດ້ໃຫ້ຄວາມສຳຄັນ ເພື່ອໃຫ້ເກັບກຳໄດ້ຂໍ້ມູນຮອບດ້ານ ຕອບສະໜອງໃຫ້ແກ່ການປະເມີນຜົນມ້ວນທ້າຍ ການຈັດຕັ້ງປະຕິບັດເປົ້າໝາຍສະຫັດສະວັດ ແລະ ປີມ້ວນທ້າຍຂອງການຈັດຕັ້ງປະຕິບັດ ແຜນພັດທະນາເສດຖະກິດ-ສັງ 5 ປີ ຄັ້ງທີ VII.
ທ່ານ ລັດຖະມົນຕີຊ່ວຍວ່າການ ກະຊວງປ້ອງກັນປະເທດ ໃຫ້ຮູ້ຕື່ມວ່າ: ຜົນໄດ້ຮັບຈາກການສຳຫລວດຄັ້ງນີ້ ຍັງຈະເປັນບ່ອນອີງທີ່ໜັກແໜ້ນໃຫ້ແກ່ລັດຖະບານ ໃນການສ້າງແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII ນຳອີກ ເພາະເປັນແຫລ່ງຂໍ້ມູນທີ່ສຳຄັນ ສຳລັບການວາງແຜນ, ການຕິດຕາມ, ການຕັດສິນໃຈ, ການວາງນະໂຍບາຍ ແລະ ການຄົ້ນຄວ້າປະຊາກອນ, ການດຳເນີນທຸລະກິດ, ການຕະຫລາດ, ການພັດທະນາກຳລັງແຮງງານ ແລະ ອື່ນໆ. ສິ່ງສຳຄັນຍັງເປັນພື້ນຖານ ໃຫ້ແກ່ການເຂົ້າຮ່ວມປະຊາຄົມເສດຖະກິດອາຊຽນ ແລະ ການຫລຸດພົ້ນອອກຈາກຄວາມດ້ອຍພັດທະ ນາໃນປີ 2020. ການສຳຫລວດດັ່ງກ່າວ ຍັງເປັນການສະໜອງຂໍ້ມູນທີ່ຈຳເປັນ ທາງດ້ານປະຊາກອນສາດ ທັງສະແດງໃຫ້ເຫັນການເພີ່ມຂຶ້ນຂອງປະຊາກອນ ແລະ ການເຕີບໂຕຂອງເສດຖະກິດ.
ຜົນການສຳຫລວດພົນລະເມືອງໃນ 3 ຄັ້ງຜ່ານມາ ຊີ້ໃຫ້ເຫັນວ່າ: ໃນໄລຍະ 10 ປີໃດ ປະຊາ ກອນລາວເພີ່ມຂຶ້ນປະມານ 1 ແສນກວ່າຄົນ ແລະ ການສຳຫລວດໃນຄັ້ງທີ 3 ປີ 2005 ມີປະຊາກອນທັງໝົດປະມານ 6 ລ້ານກວ່າຄົນ. ການເພີ່ມຂຶ້ນຢ່າງວ່ອງໄວຂອງປະຊາກອນ ອາດເຮັດໃຫ້ລັດຖະ ບານພົບຄວາມຫຍຸ້ງຍາກ ໃນການວາງແຜນພັດທະນາໃນຫລາຍດ້ານ ເປັນຕົ້ນການພັດທະນາຊັບພະ ຍາກອນມະນຸດ, ການແກ້ໄຂຄວາມທຸກຍາກ, ການພັດທະນາການສຶກສາ, ການມີວຽກເຮັດງານທຳ ກໍຄື ອັດຕາຫວ່າງງານ, ການຍົກຍ້າຍຂອງປະຊາກອນ, ລວມທັງບັນຫາດ້ານສຸຂະພາບ, ນອກນີ້ຍັງເຮັດໃຫ້ພາຫະນະເພີ່ມຂຶ້ນ, ລວມທັງບັນຫາມົນລະພິດ, ບັນຫາດ້ານສິ່ງແວດລ້ອມ ແລະ ອື່ນໆ ເຊິ່ງການສຳຫລວດໃນຄັ້ງນີ້ ລັດຖະ ບານຈະຕ້ອງໄດ້ຂໍ້ມູນທີ່ຊັດເຈນ ໃນການວາງແຜນພັດທະນາໃຫ້ສອດຄ່ອງກັບຕົວຈິງ.
ໃນວັນດຽວກັນ ຢູ່ທີ່ສູນຄົ້ນຄວ້າເສດຖະກິດແຫ່ງຊາດ ກໍໄດ້ຈັດບັ້ນຝຶກອົບຮົບແກ່ຄູຝຶກຈາກ 3 ພາກສ່ວນຄື: ກະຊວງປ້ອງກັນຄວາມສະຫງົບ, ກະຊວງການຕ່າງປະເທດ ແລະ ສູນສະຖິຕິແຫ່ງຊາດ ກະຊວງແຜນການ ແລະ ການລົງທຶນ./.
KPL
