ຂປລ
ຂປລ. ສະມາຄົມມິດຕະພາບໄຊຕະມະ-ລາວ ຈະໃຫ້ທຶນ 200.000 ເຢັນ (ສະກຸນເງິນຍີ່ປຸ່ນ) ເພື່ອຊ່ວຍປັບປຸງລະບົບການສຶກສາແກ່ ສປປ ລາວ ເປັນຕົ້ນ ສືບຕໍ່ປັບປຸງໂຮງຮຽນປະຖົມ ແລະ ສ້ອມແປງຂົວທີ່ແຂວງຫົວພັນ,
ຂປລ. ສະມາຄົມມິດຕະພາບໄຊຕະມະ-ລາວ ຈະໃຫ້ທຶນ 200.000 ເຢັນ (ສະກຸນເງິນຍີ່ປຸ່ນ) ເພື່ອຊ່ວຍປັບປຸງລະບົບການສຶກສາແກ່ ສປປ ລາວ ເປັນຕົ້ນ ສືບຕໍ່ປັບປຸງໂຮງຮຽນປະຖົມ ແລະ ສ້ອມແປງຂົວທີ່ແຂວງຫົວພັນ, ມອບໃຫ້ໂຮງຮຽນປະຖົມສະພານທອງເໜືອ ແລະ ໂຮງຮຽນສີວັດທະນາ ນະຄອນຫລວງວຽງຈັນ ໃນໂອກາດທີ່ເດີນທາງມາຢ້ຽມຢາມ ສປປ ລາວ ແຕ່ວັນທີ 19-24 ເດືອນຕຸລາປີ 2014.
ໃນໂອກາດເຂົ້າຢ້ຽມຂ່ຳນັບ ທ່ານ ດຣ. ພັນຄຳ ວິພາວັນ ຮອງນາຍົກລັດຖະມົນຕີ, ລັດຖະມົນຕີ ວ່າການກະຊວງສຶກສາທິການ ແລະ ກິລາ ໃນວັນທີ 20 ເດືອນຕຸລາ ປີ 2014 ທີ່ຫ້ອງຮັບແຂກ ກະຊວງສຶກສາທິການ ແລະ ກິລາ ນະຄອນຫລວງວຽງຈັນ, ທ່ານ ທາກະຫະຊິ ຊູຊຸມູ (Takahashi SUSUMU) ປະທານສະມາຄົມໄຊຕະມະ-ລາວ ໄດ້ແຈ້ງຈຸດປະສົງໃນການມາຢ້ຽມຢາມ ສປປ ລາວ ຄັ້ງນີ້ ເພື່ອສືບຕໍ່ສະໜັບສະໜູນວຽກງານການສຶກສາຢູ່ ສປປ ລາວ ໃນນັ້ນ ຈະມອບເງິນຈຳນວນ 100.000 ເຢັນປະກອບສ່ວນປັບປຸງໂຮງຮຽນປະຖົມ ແລະ ສ້ອມແປງຂົວ ທີ່ແຂວງຫົວພັນ ແລະ ອີກ 100.000 ເຢັນ ມອບໃຫ້ໂຮງຮຽນປະຖົມສະພານທອງເໜືອ ແລະ ໂຮງຮຽນສີວັດທະນາ ນະຄອນຫລວງວຽງຈັນ.
ທ່ານ ດຣ. ພັນຄຳ ວິພາວັນ ໄດ້ສະແດງຄວາມຂອບໃຈຕໍ່ສະມາຄົມ ມິດຕະ ພາບໄຊຕະມະ-ລາວ ແລະ ປະຊາຊົນຍີ່ປຸ່ນ ໂດຍສະເພາະ ປະຊາຊົນແຂວງໄຊຕະມະ ທີ່ໄດ້ໃຫ້ການ ຊ່ວຍເຫລືອ ແກ່ ສປປ ລາວ ໃນຫລາຍດ້ານ ໂດຍສະເພາະດ້ານການສຶກສາ, ສາທາລະນະສຸກ ແລະ ອື່ນໆຕະຫລອດມາ ເຊິ່ງເປັນການປະກອບສ່ວນສຳຄັນເຂົ້າໃນການພັດທະນາລະບົບການສຶກສາຢູ່ ສປປ ລາວ ໃຫ້ໄດ້ຮັບການພັດ ທະນາຂຶ້ນໄປເລື້ອຍໆ. ພ້ອມນັ້ນ ທ່ານຍັງສະແດງຄວາມຫວັງວ່າຈະໄດ້ ຮັບການຊ່ວຍເຫລືອຈາກສະມາຄົມດັ່ງກ່າວອີກໃນອະນາຄົດຕາມຄວາມເໜາະສົມ./.
KPL
