ຂປລ
ຂປລ. ຄະນະຜູ້ແທນລາວນໍາໂດຍ ທ່ານ ພົງສະຫວັດ ບຸບຜາ ລັດຖະມົນຕີ, ຫົວໜ້າຫ້ອງວ່າການປະທານປະເທດ, ຜູ້ຕາງໜ້າພິເສດຂອງປະທານປະເທດ ແຫ່ງ ສປປ ລາວ ໄດ້ນໍາພາຄະນະຜູ້ແທນເຂົ້າຮ່ວມກອງ ປະຊຸມສຸດຍອດສະໄໝ ພິເສດຂອງປະມຸກລັດ
ຂປລ. ຄະນະຜູ້ແທນລາວນໍາໂດຍ ທ່ານ ພົງສະຫວັດ
ບຸບຜາ ລັດຖະມົນຕີ, ຫົວໜ້າຫ້ອງວ່າການປະທານປະເທດ,
ຜູ້ຕາງໜ້າພິເສດຂອງປະທານປະ ເທດ ແຫ່ງ ສປປ ລາວ
ໄດ້ນໍາພາຄະນະຜູ້ແທນເຂົ້າຮ່ວມກອງປະຊຸມສຸດຍອດສະໄໝພິເສດຂອງ
ປະມຸກລັດ ແລະ ຫົວໜ້າລັດຖະບານຂອງກຸ່ມ 77 ແລະ ສປ ຈີນ,
ເພື່ອສະເຫລີມສະຫລອງ ຄົບຮອບ 50 ປີ ແຫ່ງການກໍ່ຕັ້ງກຸ່ມ 77 ແລະ ສປ ຈີນ
ເຊິ່ງໄດ້ຈັດຂຶ້ນແຕ່ວັນທີ 14-15 ມິຖຸນາ 2014 ທີ່ ຊານຕາ ຄຣຸສ,
ປະເທດໂບລີວີ ພາຍໃຕ້ຫົວຂໍ້
"ເພື່ອລະບຽບການໃໝ່ຂອງໂລກເພື່ອໃຫ້ມີຊິວິດການເປັນຢູ່ທີ່ດີ".
ກອງປະຊຸມຄັ້ງນີ້ ຈັດຂຶ້ນພາຍໃຕ້ການ ເປັນປະທານຂອງ ທ່ານ ເອໂວ ໂມຣາເລສ
ໄອມາ Evo Morales Ayma, ປະທານາທິບໍດີ ໂບລີວີ ໂດຍມີ ທ່ານ ບັນກິມູນ
ເລຂາທິການໃຫຍ່ອົງການ ສປຊ, ບັນດາປະມຸກລັດ, ຫົວໜ້າລັດຖະບານ ແລະ
ຜູ້ແທນຂັ້ນສູງຂອງປະເທດສະມາຊິກ ເຂົ້າຮ່ວມຢ່າງຫລວງຫລາຍ.
ໃນວັນທີ 15 ມິຖຸນາ 1964 ປະເທດພວມພັດທະນາ
77 ປະເທດ ໄດ້ຮັບຮອງເອົາຖະແຫລງການຮ່ວມ
ໃນກອງປະຊຸມອົງການສະຫະປະຊາຊາດ ວ່າດ້ວຍການຄ້າ ແລະ
ການພັດທະນາເພື່ອກໍ່ຕັ້ງກຸ່ມ 77 ແລະ ສປ ຈີນ ຂຶ້ນ ໂດຍມີເປົ້າໝາຍ
ໃນການເຕົ້າໂຮມກຳລັງແຮງເປັນອັນໜຶ່ງອັນດຽວ ພ້ອມກັນຕໍ່ສູ້ ແລະ
ປົກປ້ອງຜົນປະໂຫຍດຂອງປະເທດພວມພັດທະນາໃນດ້ານເສດຖະກິດ ແລະ
ສົ່ງເສີມການຮ່ວມມືໃຕ້-ໃຕ້ຢູ່ໃນເວທີ ສະຫະປະຊາຊາດ.
ເນື່ອງຈາກເຫັນໄດ້ເຖິງຄວາມສຳຄັນຂອງກຸ່ມ, ບັນດາປະເທດພວມພັດທະນາ
ໄດ້ສະໝັກເຂົ້າເປັນສະມາຊິກຂອງກຸ່ມນັບມື້ນັບເພີ່ມຂຶ້ນ ແລະ
ໃນປັດຈຸບັນ ມີສະມາຊິກເຖິງ 133 ປະເທດ.
ເຖິງວ່າຈຳນວນປະເທດສະມາຊິກໄດ້ເພີ່ມຂຶ້ນ
ແຕ່ຊື່ເດີມໃນເວລາກໍ່ຕັ້ງກຸ່ມຍັງຖືກຮັກສາໄວ້ຄືເກົ່າ ຄື ກຸ່ມ 77
ແລະ ສປ ຈີນ. ກອງປະຊຸມຄັ້ງນີ້ ໄດ້ຮັບຮອງເອົາຖະແຫລງການຊານຕາຄຣຸສ
(Santa Cruz Declaration) ເຊິ່ງເປັນເອກະສານທີ່ສໍາຄັນຂອງກຸ່ມ
ໂດຍໄດ້ສັງ ລວມເອົາບັນດາທັດສະນະຂອງກຸ່ມຕໍ່ບັນຫາຕ່າງໆທີ່ສຳຄັນ
ໃນດ້ານການພັດທະນາໃນຂອບ ສປຊ, ເປັນຕົ້ນ
ໄດ້ສືບຕໍ່ຮຽກຮ້ອງໃຫ້ວົງຄະນາຍາດສາກົນ
ໃຫ້ການຊ່ວຍເຫລືອແກ່ປະເທດດ້ອຍພັດທະນາ ແລະ
ປະເທດພວມພັດທະນາທີ່ບໍ່ມີຊາຍແດນຕິດທະເລ
ຜ່ານຜ່າສິ່ງທ້າທາຍຕ່າງໆ ເພື່ອເຮັດໃຫ້ເສດ ຖະກິດຂະຫຍາຍຕົວ ແລະ
ມີຄວາມຍືນຍົງ.
ໃນໂອກາດເຂົ້າຮ່ວມກອງປະຊຸມດັ່ງກ່າວ, ທ່ານ ພົງສະຫວັດ ບຸບຜາ
ໄດ້ຂຶ້ນກ່າວຄໍາປາໄສຕໍ່ກອງປະຊຸມສຸດຍອດດັ່ງກ່າວ
ໂດຍໄດ້ຢໍ້າຄືນເຖິງຄວາມສຳຄັນ ແລະ ຜົນສຳເລັດຂອງກຸ່ມ ໃນໄລຍະ 5
ທົດສະວັດຜ່ານມາ ແລະ ໄດ້ຮຽກຮ້ອງໃຫ້ບັນດາປະເທດສະມາຊິກຂອງກຸ່ມ
ເພີ່ມຄວາມເປັນປຶກແຜ່ນ ແໜ້ນໜາພາຍໃນກຸ່ມ ໃນການຕໍ່ສູ້ ແລະ
ປົກປ້ອງຜົນປະໂຫຍດຂອງບັນດາປະເທດພວມພັດທະນາ ໂດຍສະເພາະ
ຢູ່ໃນການເຈລະຈາກ່ຽວກັບ ຮ່າງວາລະການພັດທະນາ ຫລັງປີ 2015,
ລວມທັງການແກ້ໄຂບັນຫາສິ່ງທ້າທາຍຕ່າງໆ
ທີ່ບັນດາປະເທດດ້ອຍພັດທະນາ ແລະ ປະເທດພວມພັດທະນາ
ທີ່ບໍ່ມີຊາຍແດນຕິດທະເລ ຍັງຄົງປະເຊີນໜ້າໃນປັດຈຸບັນ.
KPL
