ຂປລ. ໃນຕອນບ່າຍວັນທີ 30 ມີຖຸນາ 2014 ທີ່ຫ້ອງວ່າການສູນກາງພັກ, ສະຫາຍ ບຸນຍັງ ວໍລະຈິດ ຜູ້ປະຈຳການຄະນະເລຂາທິການສູນກາງພັກ ປປ ລາວ ໄດ້ຕ້ອນຮັບການເຂົ້າຢ້ຽມຂ່ຳນັບຂອງຄະນະຜູ້ແທນສູນກາງພັກກອມມູນິດຈີນ ນຳໂດຍ ສະຫາຍ ໂກເຢໂຈ ຮອງຄະນະພົວພັນຕ່າງປະເທດ ສູນ ກາງພັກກອມມູນິດຈີນ ໃນໂອກາດມາຢ້ຽມຢາມ ແລະ ເຮັດວຽກ ຢູ່ ສປປ ລາວ ແຕ່ວັນທີ 28 ມິຖຸນາ ຫາວັນທີ 1 ກໍລະກົດ 2014 ຕາມແຜນ ການແລກປ່ຽນຄະນະຜູ້ແທນ ລະຫວ່າງ ພັກ ປປ ລາວ ແລະ ພັກກອມມູນິດຈີນ ປະຈຳປີ 2014.

ສະຫາຍ ບຸນຍັງ ວໍລະຈິດ ໄດ້ສະແດງຄວາມຊົມເຊີຍຕໍ່ການມາຢ້ຽມຢາມລາວ ຂອງຄະນະຜູ້ແທນສູນກາງພັກ ກອມມູນິດຈີນ ຄັ້ງນີ້ ເຊິ່ງເປັນການ ປະກອບສ່ວນອັນສຳຄັນເຂົ້າໃຈການເພີ່ມທະວີສາຍພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຈີນ ໃຫ້ນັບມື້ແຕກດອກອອກຜົນຍິ່ງໆຂຶ້ນ; ພ້ອມທັງຕີລາຄາສູງຕໍ່ການພົວພັນຮ່ວມມືສອງຝ່າຍໃນໄລຍະຜ່ານມາ ໂດຍສະ ເພາະແມ່ນພາຍຫລັງ ມີການແລກປ່ຽນຄະນະຜູ້ແທນຂັ້ນສູງນຳກັນ ການພົວພັນຮ່ວມມືສອງຝ່າຍໄດ້ຂະຫຍາຍຕົວເຂົ້າສູ່ລວງເລິກໃນທຸກຂົງເຂດ. ພິເສດ ແມ່ນການກໍ່ສ້າງພະນັກງານ ແລະ ແລກປ່ຽນບົດຮຽນດ້ານທິດສະດີ-ພຶດຕິກຳໄດ້ຮັບການເສີມຂະຫຍາຍ ແລະ ໜັກແໜ້ນຂຶ້ນເປັນກ້າວໆ, ພ້ອມນີ້ ສະຫາຍຍັງໄດ້ຕີລາຄາສູງຕໍ່ຜົນສຳເລັດໃນການພັດທະນາ ເສດຖະກິດ-ສັງຄົມ ຂອງ ສປ ຈີນ ໃນໄລຍະຜ່ານມາ ແລະ ສະແດງຄວາມເປັນເອກະ ພາບກັບທິດທາງຮ່ວມມື ລະຫວ່າງ ສອງພັກ ລາວ-ຈີນ ໃນຕໍ່ໜ້າ ແລະ ໃນໂອກາດດຽວກັນນີ້, ສະຫາຍຍັງໄດ້ແຈ້ງສະພາບການພົ້ນເດັ່ນຂອງ ສປປ ລາວ ໃນໄລຍະມໍ່ໆມານີ້ ໃຫ້ຄະນະຜູ້ແທນໄດ້ຮັບຊາບ ໂດຍສະເພາະແມ່ນ ສະພາບການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ IX ຂອງພັກ ແລະ ກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 8 ສະໄໝທີ 9 ໃນຕົ້ນເດືອນ ມິຖຸນາ 2014, ອັນພົ້ນເດັ່ນແມ່ນຂະບວນການຊຸກຍູ້ວຽກງານ 3 ສ້າງ, ຂະບວນການແຂ່ງຂັນຮັກຊາດ-ສ້າງບ້ານພັດທະນາ ແລະ ການດຳເນີນກອງປະຊຸມໃຫຍ່ 3 ຂັ້ນ ເພື່ອກຽມກອງປະຊຸມໃຫຍ່ຄັ້ງທີ  X ຂອງພັກ.

ສະຫາຍ ໂກເຢໂຈ ໄດ້ສະແດງຄວາມຂອບໃຈຕໍ່ສະຫາຍ ບຸນຍັງ ວໍລະຈິດ ທີ່ໄດ້ສະຫລະເວລາໃຫ້ການຕ້ອນຮັບອັນອົບອຸ່ນ ພ້ອມທັງໄດ້ແຈ້ງສະພາບ ການພົ້ນເດັ່ນ ຂອງ ສປ ຈີນ, ຜົນສຳເລັດໃນການຈັດຕັ້ງຜັນຂະຫຍາຍມະຕິກອງປະຊຸມຄົບຄະນະ ຄັ້ງທີ 3 ສະໄໝທີ 18 ຂອງສູນກາງພັກກອມມູນິດ ຈີນກໍຄືຜົນສຳເລັດໃນການພັດທະນາເສດຖະກິດ-ສັງຄົມ ຂອງ ສປ ຈີນ ໃນໄລຍະຜ່ານມາ ແລະ ຕີລາຄາສູງຕໍ່ການພົວພັນຮ່ວມມືສອງຝ່າຍໃນໄລຍະ ຜ່ານມາ ກໍຄືປັດຈຸບັນ, ພ້ອມນີ້ຍັງໄດ້ແຈ້ງຜົນການພົບປະເຮັດວຽກກັບ ຄະນະພົວພັນຕ່າງປະເທດສູນກາງພັກ ແລະ ພາກສ່ວນກ່ຽວຂ້ອງຂອງລາວ ໂດຍສະເພາະແມ່ນການພົບປະກັບ ສະຫາຍ ທອງສະຫວັນ ພົມວິຫານ ຮອງຫົວໜ້າຄະນະພົວພັນຕ່າງປະເທດສູນກາງພັກ ພ້ອມຄະນະ ເຊິ່ງສອງ ຝ່າຍ ໄດ້ແລກປ່ຽນຄຳຄິດຄຳເຫັນນຳກັນກ່ຽວກັບການພົວພັນຮ່ວມມື ລະຫວ່າງສອງພັກ ໂດຍສະເພາະ ລະຫວ່າງ ສອງຄະນະພົວພັນຕ່າງປະເທດສູນ ກາງພັກ ລາວ-ຈີນ ໃນໄລຍະຜ່ານມາ ແລະ ວາງທິດທາງຮ່ວມມືໃນຕໍ່ໜ້າ.

ໃນໄລຍະຢ້ຽມຢາມ ສປປ ລາວ ນີ້, ສະຫາຍ ໂກເຢໂຈ ພ້ອມດ້ວຍຄະນະ ຍັງໄດ້ພົບປະເຮັດວຽກກັບບັນດາສະຫາຍຜູ້ຕາງໜ້າຈາກຄະນະຈັດຕັ້ງ ສູນກາງພັກ, ຄະນະໂຄສະນາອົບຮົມສູນກາງພັກ, ສະຖາບັນວິທະຍາສາດສັງຄົມແຫ່ງຊາດ, ກະຊວງການຕ່າງປະເທດ ແລະ ກະຊວງປ້ອງກັນ ຄວາມສະຫງົບ, ພ້ອມກັນນີ້ ຍັງໄດ້ໄປຢ້ຽມຊົມສະຖານທີ່ປະຫວັດສາດ ແລະ ວັດທະນະທຳຂອງລາວ ຈຳນວນໜຶ່ງຢູ່ພາຍນະຄອນຫລວງວຽງຈັນ ແລະ ແຂວງຫລວງພະບາງ./.

KPL