ຂປລ
ຂປລ. ທ່ານ ດຣ. ສຸລິອຸດົງ ສູນດາລາ ລັດຖະມົນຕີຊ່ວຍວ່າການກະຊວງວິທະຍາສາດ ແລະ ເຕັກໂນໂລຊີ ແຫ່ງ ສປປ ລາວ ພ້ອມຄະນະ ໄດ້ພົບປະສອງຝ່າຍກັບ ທ່ານ ລົງຈ່ຽງ ຫົວໜ້າພະແນກວິທະຍາສາດ ແລະ ເຕັກໂນໂລຊີ ແຂວງຢຸນນານ ສປ ຈີນ ພ້ອມຄະນະ ໃນວັນທີ 11 ທັນວາ 2014
ຂປລ. ທ່ານ ດຣ. ສຸລິອຸດົງ ສູນດາລາ ລັດຖະມົນຕີຊ່ວຍວ່າການກະຊວງວິທະຍາສາດ ແລະ ເຕັກໂນໂລຊີ ແຫ່ງ ສປປ ລາວ ພ້ອມຄະນະ ໄດ້ພົບປະສອງຝ່າຍກັບ ທ່ານ ລົງຈ່ຽງ ຫົວໜ້າພະແນກວິທະຍາສາດ ແລະ ເຕັກໂນໂລຊີ ແຂວງຢຸນນານ ສປ ຈີນ ພ້ອມຄະນະ ໃນວັນທີ 11 ທັນວາ 2014 ຢູ່ກະຊວງວິທະຍາສາດ ແລະ ເຕັກໂນໂລຊີ ນະຄອນຫລວງວຽງຈັນ ເພື່ອປຶກສາຫາລືກ່ຽວກັບການພົວພັນຮ່ວມມືດ້ານວິທະຍາສາດ ແລະ ເຕັກໂນໂລຊີ.
ການພົບປະໃນຄັ້ງນີ້ ຄະນະຜູ້ເທນທັງສອງຝ່າຍໄດ້ພ້ອມກັນຕີລາຄາ ແລະ ທົບທວນຄືນກ່ຽວກັບການຮ່ວມມືວຽກງານດ້ານວິທະຍາສາດໃນໄລຍະຜ່ານມາ ເປັນຕົ້ນແມ່ນ ການທົດລອງປູກ ແລະ ປັບປຸງພັນເຂົ້າພື້ນເມືອງ ສປປ ລາວ ເພື່ອຄັດເລືອກໃຫ້ໄດ້ສາຍພັນທີ່ມີປະສິດທິຜົນ ແລະ ເໝາະສົມກັບສະພາບເງື່ອນໄຂສິ່ງແວດລ້ອມ, ທົດລອງປູກໝາກນ້ຳມັນ ທີ່ເປັນເປົ້າໝາຍສົ່ງເສີມໃຫ້ປະຊາຊົນປູກເປັນສິນຄ້າ ແລະ ຄົ້ນຄວ້າວິທີການເພີ່ມມູນຄ່າຜະລິດຕະພັນ, ປະກອບເຄື່ອງມືການຄົ້ນຄ້ວາທົດລອງວິໄຈທາງດ້ານວິທະຍາສາດຈຳນວນໜຶ່ງ ເພື່ອກວດສອບຊະນິດພັນເຂົ້າຂອງ ສປປ ລາວ ໂດຍສະເພາະ ແມ່ນເຂົ້າໄກ່ນ້ອຍ ທີ່ໄດ້ກຳເນີດຢູ່ແຂວງຊຽງຂວາງ ແລະ ແຂວງຫົວພັນ, ສົ່ງພະນັກງານວິຊາການຈຳນວນ 4 ຄົນໄປຝຶກອົບຮົມໄລຍະສັ້ນຢູ່ແຂວງເຊີນເຈີນ ສປ ຈີນ, ສອງຝ່າຍຍັງໄດ້ປຶກສາຫາລືຮ່ວມກັນ ເພື່ອກຳນົດໂຄງສ້າງພື້ນຖານໂຄງລ່າງໃນການສ້າງຫ້ອງທົດລອງ ເພື່ອພັດທະນາ ແລະ ນຳໃຊ້ຊັບພະຍາກອນຊີວະພາບ,.
ພ້ອມດຽວກັນນີ້ ສອງຝ່າຍຍັງໄດ້ເປັນເອກະພາບກັນ ຕໍ່ກັບທິດທາງແຜນການຮ່ວມມືສຳລັບປີ 2015 ໂດຍສະເພາະແມ່ນການສືບຕໍ່ຊຸກຍູ້ການຈັດຕັ້ງປະຕິບັດວຽກງານຈຳນວນໜຶ່ງ ເປັນຕົ້ນ ການຈັດ ຕັ້ງປະຕິບັດໂຄງການສ້າງຫ້ອງທົດລອງ ເພື່ອພັດທະນາ ແລະ ນຳໃຊ້ຊັບພະຍາກອນຊິວະພາບໃນເຂດຮ້ອນຊຸ່ມຢູ່ ສປປ ລາວ, ຊຸກຍູ້ການຈັດຕັ້ງປະຕິບັດໂຄງສ້າງສວນສາທິດວິທະຍາສາດ ແລະ ເຕັກໂນໂລຊີທາງດ້ານກະສິກຳ ລາວ-ຢຸນນານ ຢູ່ພາກເໜືອຂອງລາວ, ຊຸກຍູ້ໃຫ້ມີການພັດທະນາຊັບພະຍາກອນມະນຸດຂອງລາວຜ່ານຫລາຍຮູບແບບ ແລະ ການແລກປ່ຽນຊ່ຽວຊານສະເພາະດ້ານ, ຊຸກຍູ້ການປະ ຕິບັດໂຄງສ້າງຫ້ອງທົດລອງ ເພື່ອພັດທະນາ ແລະ ນຳໃຊ້ພະລັງງານທົດແທນ, ເລັ່ງກໍ່ສ້າງສູນກວດ ກາ ແລະ ຢັ້ງຢືນຄຸນນະພາບການກໍ່ສ້າງ, ຮ່ວມມືທາງດ້ານວິທະຍາສາດ ແລະ ເຕັກໂນໂລຊີ ເປັນວຽກງານປົກກະຕິ ແລະ ຄົ້ນຄວ້າສ້າງກົນໄກຕິດຕາມ ແລະ ຊຸກຍູ້ການຈັດຕັ້ງປະຕິບັດໃຫ້ມີປະສິດທິຜົນ.
KPL
