ຂປລ
ຂປລ. ພິທີເຊັນສັນຍາ ສ້າງຕັ້ງບໍລິສັດລັດຮຸ້ນສ່ວນອຸດສະຫະກຳທ່ອງທ່ຽວລາວ ລະຫວ່າງ ກະຊວງການເງິນ ຕາງໜ້າໂດຍທ່ານ ໄພທູນ ທ່ຽງລະໄມ ວ່າການຫົວໜ້າ ກົມປະຕິຮູບລັດວິສາຫະກິດ ແລະ ການປະກັນໄພ ແລະ ທ່ານ ພັນຊີຫລິວ ປະທານບໍລິສັດພັດທະນາ ອຸດສາຫະກຳ ທ່ອງທ່ຽວລາວ ຈໍາກັດ ຈັດຂຶ້ນໃນວັນທີ 14 ມິຖຸນາ 2024 ໂດຍມີ ທ່ານ ພູທະນູເພັດ ໄຊສົມບັດ ຮອງລັດຖະມົນຕີກະຊວງການເງິນ, ທ່ານ ນາງ ດາລານີ ພົມມະວົງສາ ຮອງລັດຖະມົນຕີກະຊວງ ຖະແຫລງຂ່າວ, ວັດທະນະທຳ ແລະ ທ່ອງທ່ຽວ ແລະ ພາກສ່ວນກ່ຽວຂ້ອງ ເຂົ້າຮ່ວມ.
![](https://kpl.gov.la/Media/Upload/News/Thumb/2024/06/15/13.jpg)
ຂປລ. ພິທີເຊັນສັນຍາ ສ້າງຕັ້ງບໍລິສັດລັດຮຸ້ນສ່ວນອຸດສະຫະກຳທ່ອງທ່ຽວລາວ ລະຫວ່າງ ກະຊວງການເງິນ ຕາງໜ້າໂດຍທ່ານ ໄພທູນ ທ່ຽງລະໄມ ວ່າການຫົວໜ້າ ກົມປະຕິຮູບລັດວິສາຫະກິດ ແລະ ການປະກັນໄພ ແລະ ທ່ານ ພັນຊີຫລິວ ປະທານບໍລິສັດພັດທະນາ ອຸດສາຫະກຳ ທ່ອງທ່ຽວລາວ ຈໍາກັດ ຈັດຂຶ້ນໃນວັນທີ 14 ມິຖຸນາ 2024 ໂດຍມີ ທ່ານ ພູທະນູເພັດ ໄຊສົມບັດ ຮອງລັດຖະມົນຕີກະຊວງການເງິນ, ທ່ານ ນາງ ດາລານີ ພົມມະວົງສາ ຮອງລັດຖະມົນຕີກະຊວງ ຖະແຫລງຂ່າວ, ວັດທະນະທຳ ແລະ ທ່ອງທ່ຽວ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ທ່ານ ໄພທູນ ທ່ຽງລະໄມ ໄດ້ໃຫ້ຮູ້ວ່າ: ວັນທີ 08 ພະຈິກ 2023 ຫ້ອງການກະຊວງກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ໄດ້ເຊັນບົດບັນທຶກຄວາມເຂົ້າໃຈ (MOU) ກັບ ບໍລິສັດ ພັດທະນາອຸດສາຫະກໍາທ່ອງທ່ຽວລາວ ຈໍາກັດ ທີ່ມີສໍານັກງານ ຕັ້ງຢູ່ບ້ານອຸບມຸງ ເມືອງສີໂຄດຕະບອງ ນະຄອນຫລວງວຽງຈັນ ທີ່ສ້າງຕັ້ງຂຶ້ນພາຍໃຕ້ກົດໝາຍຂອງ ສປປ ລາວ ຈຸດປະສົງແມ່ນຢາກສ້າງຕັ້ງບໍລິສັດ ລັດຮຸ້ນສ່ວນອຸດສາຫະກຳທ່ອງທ່ຽວລາວ ຈໍາກັດ. ເພື່ອພັດທະນາການທ່ອງທ່ຽວ ຢູ່ ສປປ ລາວ ໃຫ້ກາຍເປັນ ອຸດສາຫະກຳການທ່ອງທ່ຽວ ທີ່ທັນສະໄໝ ແນ ໃສ່ອະນຸລັກ, ປົກປັກຮັກສາຊັບພະຍາກອນການທ່ອງທ່ຽວ ທຳມະຊາດ, ວັດທະນະທຳ ແລະ ປະຫວັດສາດ ໃຫ້ຄົງຄຸນຄ່າ, ເປັນທ່າແຮງໃນການດຶງດູດນັກທ່ອງທ່ຽວ, ນັກລົງທຶນພາຍໃນ ແລະ ຕ່າງປະເທດ, ສ້າງລາຍຮັບ ໃຫ້ລັດຖະບານ, ສ້າງວຽກເຮັດງານທຳ ໃຫ້ປະຊາຊົນລາວ, ໃຫ້ນັກສຶກສາທີ່ຈົບຈາກມະຫາວິທະຍາໄລ ແຫ່ງຕ່າງໆ ໃນ ສປປ ລາວ ແລະ ຕ່າງປະເທດ, ກະຈາຍລາຍໄດ້ສູ່ສັງຄົມ ແລະ ຊຸມຊົນ, ປະກອບສ່ວນພັດທະນາເສດຖະກິດ-ສັງຄົມ ຕາມທິດສີຂຽວ ແລະ ຍືນຍົງ. ສະນັ້ນ, ໂດຍປະຕິບັດຕາມແຈ້ງການ ຂອງຫ້ອງວ່າການສຳນັກງານນາຍົກລັດຖະມົນ ຕີ ສະບັບເລກທີ 694/ຫສນຍ, ລົງວັນທີ 03 ເມສາ 2024, ໃນການສ້າງຕັ້ງບໍລິສັດ ລັດຮຸ້ນສ່ວນອຸດສາຫະກໍາທ່ອງທ່ຽວລາວ ຈໍາກັດ ລະຫວ່າງ ລັດຖະບານ ຕາງໜ້າໂດຍ ກະຊວງການເງິນ (ກົມປະຕິຮູບລັດວິສາຫະກິດ ແລະ ການປະກັນໄພ) ຮ່ວມກັບ ບໍລິສັດ ພັດທະນາອຸດສາຫະກຳທ່ອງທ່ຽວລາວ ຈຳກັດ, (ໃນນາມຜູ້ພັດທະນາໂຄງການ ແລະ ເປັນຜູ້ລົງທຶນທັງໝົດ) ແລະ ອີງຕາມຂໍ້ຕົກລົງຂອງທ່ານ ລັດຖະມົນຕີກະຊວງການເງິນ ສະບັບເລກທີ 1659/ກງ, ລົງວັນທີ 13 ພຶດສະພາ 2024, ວ່າດ້ວຍການແຕ່ງຕັ້ງຄະນະ ກຳມະການຄົ້ນຄວ້າສັນຍາຮ່ວມທຶນ.
![](https://kpl.gov.la/Media/Upload/News/Thumb/2024/06/15/14.jpg)
ທ່ານ ໄພທູນ ທ່ຽງລະໄມ ຍັງໃຫ້ຮູ້ອີກວ່າ: ປະເທດລາວ ມີແຫລ່ງທ່ອງທ່ຽວທີ່ອຸດົມສົມບູນ, ປັດຈຸບັນມີແຫລ່ງທ່ອງທ່ຽວຫລາຍກວ່າ 1.900 ແຫ່ງ. ໃນນັ້ນ, ມີແຫລ່ງທ່ອງທ່ຽວທຳມະຊາດ 1.116 ແຫ່ງ ແລະ ສະຖານທີ່ທ່ອງທ່ຽວທາງປະຫວັດສາດ ແລະ ວັດທະນະທຳ 764 ແຫ່ງ ທີ່ຕັ້ງຢູ່ບັນດາແຂວງຂອງລາວ ແຕ່ເໜືອຮອດໃຕ້, ແຕ່ລະແຫ່ງມີສະຖານທີ່ທ່ອງທ່ຽວທີ່ເປັນເອກະລັກສະເພາະ ແລະ ປະກອບມີສະຖານທີ່ ທີ່ເປັນແຫລ່ງທ່ອງທ່ຽວມໍລະ ດົກໂລກທີມີຊື່ສຽງ ແລະ ມີທິວທັດທຳມະຊາດ ທີ່ໜ້າອັດສະຈັນຫລາຍແຫ່ງ ເປັນຕົ້ນ ພູຜາປ່າດົງ, ມີແມ່ນໍ້າ ແລະ ນໍ້າຕົກຕາດທີ່ງົດງາມ, ມີສູນວັດທະນາທຳ, ວັດວາອາຣາບທີ່ເກົ່າແກ່ຫລາກຫລາຍ ແລະ ມີວັດທະນາທຳພື້ນເມືອງລາວທີ່ອຸດົມສົມບູນ ເຊັ່ນ: ດົນຕີ, ການເຕັ້ນລຳທີ່ເປັນເອກະລັັກ, ບຸນປະເພນີ ແລະ ອື່ນໆ, ນັກທ່ອງທ່ຽວສາມາດ ໄປຢ້ຽມຢາມບ້ານທ້ອງຖິ່ນ ເພື່ອຮຽນຮູ້ກ່ຽວກັບວິຖີຊີວິດປະຈຳວັນ, ວັດທະນະທຳພື້ນເມືອງຂອງຊາວລາວ ແລະ ໃນປັດຈຸບັນ ສປປ ລາວ ແມ່ນມີທາງລົດໄຟ ອັນທີ່ເປັນທ່າແຮງ ໃນການນຳນັກທ່ອງທ່ຽວເຂົ້າມາໃນລາວ.
ຂ່າວ: ສົມຫວັງ
ພາບ: ຂັນໄຊ
KPL