ຂປລ
ຂປລ. ກອງກວດ-ກູ້ລະເບີດ 58 ເພື່ອມະນຸດສະທຳ ໄດ້ຕັ້ງໜ້າປະຕິບັດໜ້າທີ່ ສຳຫລວດ ກວດ-ກູ້ ລະເບີດບໍ່ທັນແຕກທີ່ຕົກຄ້າງຈາກສົງຄາມ ໃຫ້ໝົດຈາກຜືນແຜ່ນດິນລາວ ແນໃສ່ຮັບປະກັນເຮັດໃຫ້ ການດຳລົງຊີວິດ-ທຳມາຫາກິນຂອງປະຊາຊົນ ທີ່ໄດ້ຮັບຜົນກະທົບ ມີຄວາມປອດໄພ ແລະ ມີຄວາມສະດວກສະບາຍຫລາຍຂຶ້ນ.
ຂປລ. ກອງກວດ-ກູ້ລະເບີດ 58 ເພື່ອມະນຸດສະທຳ ໄດ້ຕັ້ງໜ້າປະຕິບັດໜ້າທີ່ ສຳຫລວດ ກວດ-ກູ້ ລະເບີດບໍ່ທັນແຕກທີ່ຕົກຄ້າງຈາກສົງຄາມ ໃຫ້ໝົດຈາກຜືນແຜ່ນດິນລາວ ແນໃສ່ຮັບປະກັນເຮັດໃຫ້ ການດຳລົງຊີວິດ-ທຳມາຫາກິນຂອງປະຊາຊົນ ທີ່ໄດ້ຮັບຜົນກະທົບ ມີຄວາມປອດໄພ ແລະ ມີຄວາມສະດວກສະບາຍຫລາຍຂຶ້ນ. ປັດຈຸບັນ, ກອງກວດ-ກູ້ລະເບີດ 58 ເພື່ອມະນຸດສະທຳ ໄດ້ເຂົ້າສະໜາມກວດກູ້ສະໜາມທີ 5 ເມືອງວຽງໄຊ ແຂວງຫົວພັນ ເຊິ່ງມີເນື້ອທີ່ທັງໝົດ 6.700 ຕາແມັດ, ກວດກູ້ສຳເລັດແລ້ວ 3.800 ກວ່າຕາແມັດ, ພົບລະເບີດ ຈໍຳນວນ 9 ລູກ, ສໍຳພາວຸດ 3 ລູກ, ໂບມບີບູລູ 26 ປະເພດ, ລະເບີດລູກຫວ່ານ 6 ລູກ.
ສະຫາຍ ພັນໂທ ພູວຽງ ວັນນະສອນ ຮອງຫົວໜ້າການທະຫານ ກອງກວດກູ້ລະເບີດເພື່ອມະນຸດສະທຳກອງທັບ, ຮັບຜິດຊອບດ້ານວິຊາການ ເກັບກູ້ລະເບີດຮ່ວມມື ລາວ-ຣັດເຊຍ ປະຈຳເມືອງວຽງໄຊ ແຂວງຫົວພັນ ໄດ້ໃຫ້ຮູ້ວ່າ: ປັດຈຸບັນ, ທີມງານຂອງພວກເຮົາ ໄດ້ເຂົ້າສະໜາມກວດກູ້ສະໜາມທີ 5 ໂຮງຮຽນ ມສ ວຽງໄຊ ໂດຍໄດ້ລົງມືຈັດຕັ້ງປະຕິບັດກວດກູ້ແຕ່ວັນທີ 23 ມັງກອນ 2025 ເປັນຕົ້ນມາ ເຊິ່ງມີຂໍ້ສະດວກ ແລະ ຂໍ້ຫຍຸ້ງຍາກຫລາຍດ້ານ ເປັນຕົ້ນ ຂໍ້ສະດວກ ແມ່ນຂັ້ນເທິງໄດ້ລົງເລິກໃກ້ຊິດຕິດແທດ ແລະ ຕອບສະໜອງດ້ານອຸປະກອນການຮັບໃຊ້ຕ່າງໆ, ຕະຫລອດຮອດອຳນາດການປົກຄອງ, ຄະນະອຳນວຍການ ແລະ ນັກຮຽນໃຫ້ການຮ່ວມມືເປັນຢ່າງດີ. ສ່ວນຂໍ້ຫຍຸ້ງຍາກ ແມ່ນສະຖານທີ່ດັ່ງກ່າວ ເປັນຂອບເຂດຖົມດິນ, ດິນແຂງຜ່ານການໂລມາກ່ອນ ເຮັດໃຫ້ພົບຄວາມຫຍຸ້ງຍາກໃນການຂຸດ. ໃນນັ້ນ, ຍັງພົບເສດສະເກັດ ແລະ ຊິ້ນສ່ວນລະເບີດເປັນຈຳນວນຫລວງຫລາຍ. ເຖິງຢ່າງໃດກໍຕາມ, ຄະນະຮັບຜິດຊອບດ້ານວິຊາການ ເກັບກູ້ລະເບີດ ຮ່ວມມື ລາວ-ຣັດເຊຍ ກໍໄດ້ຂຸ້ນ ຂ້ຽວກວດກູ້ ແລະ ທຳລາຍລະເບີດບໍ່ທັນແຕກຢູ່ ເມືອງວຽງໄຊ ແຂວງຫົວພັນ ໃຫ້ສຳເລັດກ່ອນວັນທີ 8 ກຸມພາ 2025 ນີ້.
ໃນປັດຈຸບັນ ລະເບີດທີ່ຍັງບໍ່ທັນແຕກ(ລບຕ) ຍັງສືບຕໍ່ສົ່ງຜົນກະທົບຢູ່ບໍລິເວນກວ້າງຂວາງຂອງ ປະເທດເຮົາເຊັ່ນ: ໃນປ່າດົງ, ທົ່ງໄຮ່-ທົ່ງນາ, ບ້ານ, ໂຮງຮຽນ, ຖະໜົນຫົນທາງ ແລະ ເຂດທີ່ຢູ່ອາໄສ ຂອງປະຊາຊົນ ຢ່າງຫລວງຫລາຍ. ສະນັ້ນ ກອງກວດ-ກູ້ລະເບີດ ເພື່ອມະນຸດສະທຳ 58 ຜູ້ທີ່ປະຕິບັດໜ້າທີ່ຕົວຈິງ ໄດ້ສູ້ຊົນປະຕິບັດໜ້າ ທີ່ດ້ວຍຄວາມຮັບຜິດຊອບສູງ ເພື່ອຮັບປະກັນເຮັດໃຫ້ປະຊາຊົນ ໄດ້ຮັບຄວາມປອດໄພສູງສຸດ ຈາກລູກລະເບີດບໍ່ທັນແຕກທີ່ຕົກຄ້າງຈາກສົງຄາມ.
ພາບ-ຂ່າວ: ອາໄຊ
KPL
