ຂປລ
ຂປລ. ໃນໂອກາດເຂົ້າຮ່ວມກອງປະຊຸມ ສຸດຍອດລັດຖະບານທົ່ວໂລກ ປະຈໍາປີ 2025 ທີ່ຈັດ ໃນລະຫວ່າງວັນທີ 11-13 ກຸມພາ 2025 ທີ່ນະຄອນດູໄບ, ສະຫະນະຄອນເອເມຣັດອາຣັບ, ໃນວັນທີ12 ກຸມພາ 2025 ທ່ານ ສອນໄຊ ສີພັນດອນ ນາຍົກລັດຖະມົນຕີແຫ່ງ ສປປ ລາວ ໄດ້ພົບປະສອງຝ່າຍກັບ ສົມເດັດ ເຊກຄ໌ ໂມຮາເມັດ ບິນ ຣາຊິດ ອາລ ມາກຕຸມ ຮອງປະທານາທິບໍດີ, ນາຍົກລັດຖະ ມົນຕີ, ເຈົ້າຄອງນະຄອນດູໄບ.
ຂປລ. ໃນໂອກາດເຂົ້າຮ່ວມກອງປະຊຸມ ສຸດຍອດລັດຖະບານທົ່ວໂລກ ປະຈໍາປີ 2025 ທີ່ຈັດ ໃນລະຫວ່າງວັນທີ 11-13 ກຸມພາ 2025 ທີ່ນະຄອນດູໄບ, ສະຫະນະຄອນເອເມຣັດອາຣັບ, ໃນວັນທີ12 ກຸມພາ 2025 ທ່ານ ສອນໄຊ ສີພັນດອນ ນາຍົກລັດຖະມົນຕີແຫ່ງ ສປປ ລາວ ໄດ້ພົບປະສອງຝ່າຍກັບ ສົມເດັດ ເຊກຄ໌ ໂມຮາເມັດ ບິນ ຣາຊິດ ອາລ ມາກຕຸມ ຮອງປະທານາທິບໍດີ, ນາຍົກລັດຖະມົນຕີ, ເຈົ້າຄອງນະຄອນດູໄບ.
ໃນການພົບປະຄັ້ງນີ້, ທ່ານ ນາຍົກລັດຖະມົນຕີ ສອນໄຊ ສີພັນດອນ ໄດ້ກ່າວຂອບໃຈຕໍ່ການເຊື້ອເຊີນ ແລະ ການຕ້ອນຮັບທີ່ຢ່າງອົບອຸ່ນ, ພ້ອມທັງໃຫ້ຄວາມສະດວກສະບາຍທຸກຢ່າງ ໃນການເຂົ້າຮ່ວມກອງປະຊຸມ ທີ່ມີຄວາມໝາຍສໍາຄັນຄັ້ງນີ້, ສອງຝ່າຍໄດ້ຕີລາຄາສູງ ແລະ ສະແດງຄວາມຍິນດີທີ່ເຫັນວ່າ ນັບແຕ່ ສປປ ລາວ ແລະ ສະຫະນະຄອນ ເອເມຣັດ ອາຣັບ ໄດ້ສ້າງຕັ້ງສາຍພົວພັນການທູດນໍາກັນໃນວັນທີ 15 ຕຸລາ 1996 ເປັນຕົ້ນມາ, ສະຫະນະຄອນ ເອເມຣັດ ອາຣັບ ໃຫ້ຄວາມສໍາຄັນໃນການເສີມ ຂະຫຍາຍສາຍພົວພັນຮ່ວມມືກັບ ສປປ ລາວ ດ້ວຍດີຕະຫລອດໄລຍະຫລາຍຜ່ານມາ ແລະ ປີ 2026 ນີ້ ກໍພໍດີຄົບຮອບ 30 ປີ ເຕັມໄປດ້ວຍຂີດໝາຍສໍາຄັນ ທີ່ສອງຜູ້ນໍາໄດ້ພົບປະກັນ ໃນລະຫວ່າງການເຂົ້າຮ່ວມ ກອງປະຊຸມສຸດຍອດລັດຖະບານທົ່ວໂລກ ປະຈໍາປີ2025ແລະ ທີ່ຜ່ານມາກໍເຫັນວ່ານັກທຸລະກິດຂອງ ຢູເອອີ ຈໍານວນໜຶ່ງໄດ້ໄປລົງທຶນຢູ່ ສປປ ລາວ ໃນຂະແໜງການທ່າບົກ ທີ່ເຂດເສດຖະກິດພິເສດສະຫວັນ-ເຊໂນ ແລະ ນັກທຸລະກິດລາວ ກໍໄດ້ມີການນໍາເຂົ້າວັດຖຸພັນຈາກ ຢູເອອີ ອີກດ້ວຍ, ເຫັນດີສືບຕໍ່ຊຸກຍູ້ພາກທຸລະກິດ ແລະ ນັກລົງທຶນ ເດີນທາງໄປສຶກສາຄວາມເປັນໄປໄດ້ ໃນການລົງທຶນຢູ່ສປປລາວ ໃນຂະແໜງການທີ່ມີທ່າແຮງສູງເປັນຕົ້ນ ກະສິກໍາ, ອຸດສາຫະກໍາ, ທ່ອງທ່ຽວ, ພະລັງງານ-ໄຟຟ້າ, ບໍ່ແຮ່ ແລະ ອື່ນໆ ໃຫ້ສອງຝ່າຍມີການຮ່ວມມືກັນ ຕື່ມອີກ.
ໃນໂອກາດນີ້, ທ່ານ ສອນໄຊ ສີພັນດອນ ນາຍົກລັດຖະມົນຕີແຫ່ງ ສປປ ລາວ ໄດ້ເຊື້ອເຊີນສົມເດັດ ເຊກຄ໌ ໂມຮາເມັດ ບິນ ຣາຊິດ ອາລ ມາກຕຸມ ຮອງປະທານາທິບໍດີ, ນາຍົກລັດຖະມົນຕີ, ເຈົ້າຄອງນະຄອນດູໄບ, ເດີນທາງມາຢ້ຽມຢາມ ສປປ ລາວ ໃນເວລາທີ່ເໝາະສົມ ເພື່ອເປັນໜຶ່ງໃນກິດຈະກໍາ ຂອງການສະເຫລີມສະຫລອງ ຄົບຮອບ 30 ປີ ແຫ່ງການສ້າງຕັ້ງສາຍພົວພັນການທູດ ລະຫວ່າງ ສອງປະເທດເພື່ອນມິດພວກເຮົາ ໃນປີ 2026 ທີ່ຈະມາເຖິງນີ້.
ພ້ອມດຽວກັນ,ໃນຕອນເຊົ້າຂອງວັນທີ11ກຸມພາ 2025 ຜ່ານມາ, ທ່ານ ທານິ ບິນ ອາເມັດ ອາລ ເຊຢູດິ ລັດຖະມົນຕີ ແຫ່ງລັດ ຮັບຜິດຊອບດ້ານການຄ້າຕ່າງປະເທດ ແຫ່ງ ສະຫະນະຄອນ ເອເມຣັດ ອາຣັບ ໄດ້ເຂົ້າພົບຢ້ຽມຂໍ່ານັບ ທ່ານ ນາຍົກລັດຖະມົນຕີ ສອນໄຊ ສີພັນດອນ ເພື່ອປຶກສາຫາລືການຮ່ວມມື ເພື່ອສົ່ງເສີມດ້ານການຄ້າ ແລະ ການລົງທຶນທີ່ທັງສອງຝ່າຍມີທ່າແຮງຮ່ວມກັນ.
KPL
