ຂປລ. ໃນໂອກາດເຂົ້າຮ່ວມພິທີປິດ ກອງປະຊຸມສະໄໝສາມັນ ຄົບຄະນະບໍລິຫານງານ ສະຫະພັນນັກຮົບເກົ່າແຫ່ງຊາດລາວ ຄັ້ງ ທີ 3 ສະໄໝທີ IV ໃນວັນທີ 12 ກຸມພາ 2025 ນີ້, ສະຫາຍ ພົນເອກ ຈັນສະໝອນ ຈັນຍາລາດ ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ ໄດ້ໂອ້ລົມຕໍ່ກອງປະຊຸມດັ່ງກ່າວ ໂດຍໄດ້ເນັ້ນຫລາຍບັນຫາສໍາຄັນ ຕໍ່ຄະນະພັກ, ຄະນະບໍລິຫານງານ ສະຫະພັນນັກຮົບເກົ່າແຫ່ງຊາດລາວ.

ສະຫາຍ ພົນເອກ ຈັນສະໜອນ ຈັນຍາລາດ ໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນສຳເລັດຂອງຄະນະພັກ, ຄະນະບໍລິຫານງານ ສະຫະພັນນັກຮົບເກົ່າແຫ່ງຊາດລາວ ທີ່ສ້າງມາໄດ້ ເຊິ່ງສະແດງໃຫ້ເຫັນມີຫລາຍອັນທີ່ພົ້ນເດັ່ນ ພ້ອມທັງ ໃຫ້ທິດເຍືອງທາງຕໍ່ຄະນະພັກ, ຄະນະບໍລິຫານງານ ສະຫະພັນນັກຮົບເກົ່າແຕ່ລະຂັ້ນ ຄວນເອົາໃຈໃສ່ຄົ້ນຄວ້າ ຮູບແບບໂຄສະນາ-ສຶກສາອົບຮົບ ການເມືອງ-ນຳພາແນວຄິດ ຕໍ່ສະມາຊິກນັກຮົບເກົ່າ ໃຫ້ແທດເໝາະ ແລະ ສອດຄ່ອງແຕ່ລະເປົ້າໝາຍ ໃນແຕ່ລະໄລຍະ ເພື່ອໃຫ້ເຂົ້າເຈົ້າກໍາໄດ້ ແລະ ເຂົ້າຮ່ວມການຈັດຕັ້ງປະຕິບັດຕົວຈິງ ໂດຍຖືເອົາ 3 ວັນປະຫວັດສາດ ສຳຄັນຂອງຊາດ, ການດຳເນີນກອງປະຊຸມໃຫຍ່ 3 ຂັ້ນຂອງພັກ ໃນປີ 2025 ນີ້ ເປັນການໂຄສະນາປຸກ ລະດົມນັກຮົບເກົ່າ ກໍຄື ປະຊາຊົນລາວບັນດາເຜົ່າໃຫ້ເລິກເຊິ່ງ ແລະ ກວ້າງຂວາງ.

ພ້ອມນີ້, ສະຫະພັນນັກຮົບເກົ່າແຫ່ງຊາດລາວ ຕ້ອງໄດ້ເພີ່ມທະວີ ເອົາໃຈໃສ່ແກ້ໄຂບັນດາຂໍ້ ຄົງຄ້າງໃນປີຜ່ານມາ ໃນຂັ້ນຮາກຖານພັກ ເພື່ອຂົນຂວາຍປຸກລະດົມປະຊາຊົນ ເຮັດວຽກງານຮາກຖານ ຊ່ວຍຄະນະພັກຂັ້ນເທິງ; ປັບປຸງເນື້ອໃນ ແລະ ຮູບແບບເຄື່ອນໄຫວນຳພາ ໃຫ້ສອດຄ່ອງກັບ ຄວາມຮຽກຮ້ອງຕ້ອງການ ຂອງໜ້າທີ່ການເມືອງໃນໄລຍະໃໝ່ ເພື່ອຍົກສູງບົດບາດ ແລະ ໜ້າທີ່ ຂອງສະຫະພັນນັກຮົບເກົ່າ; ເອົາໃຈໃສ່ປະສານສົມທົບແໜ້ນກັບ ບັນດາກະຊວງ, ອົງການຂັ້ນສູນກາງ ກໍຄື ຄະນະພັກອົງການປົກຄອງທ້ອງຖິ່ນ ເພື່ອເຮັດໜ້າທີ່ໃນການຄຸ້ມຄອງ, ເບິ່ງແຍງດູແລ ແລະ ປະຕິບັດນະໂຍບາຍ ຕໍ່ສະມາຊິກນັກຮົບເກົ່າ; ເອົາໃຈໃສ່ໃນການກະກຽມ ແລະ ຈັດຕັ້ງດຳເນີນກອງປະຊຸມໃຫຍ່ 3 ຂັ້ນ ຂອງພັກ ໃຫ້ມີເນື້ອໃນເລິກເຊິ່ງ, ສອດຄ່ອງ, ຮັບປະກັນເລືອກໄດ້ບຸກຄະລາກອນ ຜູ້ທີ່ມີມາດຖານເງື່ອນໄຂຖືກຕ້ອງ, ມີຄວາມຮູ້ຄວາມສາມາດ ໃນການນໍາພາ-ຊີ້ນຳວຽກງານ; ຊຸກຍູ້ຂະບວນການແຂ່ງຂັນ ຂອງສະຫະພັນນັກຮົບເກົ່າ ຕິດພັນກັບຂະບວນ ການຮັກຊາດ ແລະ ພັດທະນາ ໃຫ້ເຂົ້າສູ່ລວງເລິກ ຕ້ອງສຸມໃສ່ພ້ອມກັນປະຕິບັດ ຂໍ້ແຂ່ງຂັນຂອງນັກຮົບເກົ່າ ໃຫ້ແຂ່ງແຮງ ແລະ ເປັນຂະບວນຟົດຟື້ນ; ເອົາໃຈໃສ່ບຳລຸງ, ຍົກລະດັບ, ກໍ່ສ້າງພະນັກງານ ແລະ ປັບປຸງບູລະນະການຈັດຕັ້ງ ໃຫ້ມີຄວາມເຂັ້ມແຂງ ແລະ ປະກອບມີພະນັກງານ-ລັດຖະກອນ ຜູ້ທີ່ມີຄວາມຮູ້ ຄວາມສາມາດ, ມີຄວາມຮັບຜິດຊອບສູງ ແລະ ເຮັດສຳເລັດໜ້າທີ່ວຽກງານ ທີ່ໄດ້ຮັບມອບໝາຍ; ເພີ່ມທະວີວຽກງານກໍ່ສ້າງຄະນະພັກ, ໜ່ວຍພັກ ແລະ ສະມາຊິກພັກ ໃຫ້ມີຄວາມປອດໃສ ເຂັ້ມແຂງ ແລະ ໜັກແໜ້ນ; ເອົາໃຈ ໃສ່ເສີມຂະຫຍາຍສາຍພົວພັນ ຮ່ວມມືທີ່ເປັນມູນເຊື້ອ ກັບສະມາຄົມນັກຮົບເກົ່າຫວຽດນາມ ແລະ ບັນ ດາປະເທດເພື່ອນມິດ ພາກພື້ນ ແລະ ສາກົນ ບົນພື້ນຖານແນວທາງ ການຕ່າງປະເທດ ຂອງພັກ-ລັດ ເພື່ອຍົກສູງບົດບາດ ຂອງນັກຮົບເກົ່າລາວ ໃນເວທີພາກພື້ນ ແລະ ສາກົນໃຫ້ສູງຂຶ້ນ, ທັງຮັບປະກັນນຳຜົນປະໂຫຍດຕົວຈິງ ໃນການພັດທະນາວຽກງານ ຂອງນັກຮົບເກົ່າ ໃຫ້ມີບາດກ້າວຫັນປ່ຽນດີຂຶ້ນ.

ຂ່າວ: ສຸເວດ ສີດາຄໍາ

KPL