ໂອກາດດັ່ງກ່າວ, ສະຫາຍ ນາງ ແສງເດືອນ ອ່າງຄຳນາກສະຫວັດ ໄດ້ຍົກໃຫ້ເຫັນການຈັດຕັ້ງປະຕິບັດວຽກງານຮອບດ້ານຂອງ ສະຫະພັນແມ່ຍິງຮາກຖານນັກທຸລະກິດຍິງ ນະຄອນຫລວງວຽງຈັນ ໃນໄລຍະ 5 ປີ ຜ່ານມາ (2020-2024) ເຊິ່ງສະຫະພັນແມ່ຍິງຮາກຖານນັກທຸລະກິດຍິງ ນວ ແມ່ນກົງຈັກໜຶ່ງທີ່ໄດ້ຈັດຕັ້ງ ແລະ ເຄື່ອນໄຫວວຽກງານ ຕາມພາລະບົດບາດ ພາຍໃຕ້ການນໍາພາ-ຊີ້ນໍາ ຂອງສະຫະພັນແມ່ຍິງ ນະຄອນຫລວງວຽງຈັນ, ເປັນອົງການຈັດຕັ້ງໜຶ່ງ ທີ່ເປັນຕົວແທນໃຫ້ແກ່ແມ່ຍິງ ທີ່ປະກອບການດ້ານທຸລະກົດທຸກລະດັບ ພາຍໃນນະຄອນຫລວງວຽງຈັນ ທີ່ມີຄວາມຕື່ນຕົວດ້ວຍຄວາມສະໝັກໃຈ ໃນການຊ່ວຍເຫລືອສັງຄົມ. ຜ່ານການຈັດຕັ້ງປະຕິບັດວຽກງານຮອບດ້ານ ໃນໄລຍະ 5 ປີ ຜ່ານມາ ສາມາດຍາດໄດ້ຜົນສຳເລັດຫລາຍດ້ານ ເປັນຕົ້ນ ວຽກງານສຶກສາອົບຮົມການເມືອງແນວຄິດ, ວຽກງານປັບປຸງ ແລະ ຂະຫຍາຍການຈັດຕັ້ງ ສະຫະພັນແມ່ຍິງ, ວຽກກໍ່ສ້າງພະນັກງານເພດຍິງ, ສະມາ ຊິກສະຫະພັນແມ່ຍິງ, ວຽກງານນະໂຍບາຍຍ້ອງຍໍ, ວຽກງານໃຫ້ຄຳປຶກສາປົກປ້ອງສິດຜົນປະໂຫຍດຂອງແມ່ຍິງ ແລະ ເດັກ, ສົ່ງເສີມຄວາມກ້າວໜ້າຂອງແມ່ຍິງ ແລະ ຄວາມສະເໝີພາບ ຍິງ-ຊາຍ, ແມ່-ເດັກ, ວຽກງານພັດທະນາຊີວິດການເປັນຢູ່ ເພື່ອແກ້ໄຂຄວາມທຸກຍາກໃຫ້ແມ່ຍິງ ແລະ ຄອບຄົວ, ການ ຈັດຕັ້ງປະຕິບັດຂໍ້ແຂ່ງຂັນ 3 ດີ ຂອງສະຫະພັນແມ່ຍິງລາວ, ວຽກງປຸກລະດົມແມ່ຍິງ ເຂົ້າຮ່ວມພາລະ ກິດປົກປັກຮັກສາ ແລະ ສ້າງສາພັດທະນາປະເທດຊາດ ແລະ ວຽກງານພົວພັນຮ່ວມມືກັບຕ່າງປະເທດ. ອັນພົ້ນເດັນ ແມ່ນໄດ້ຊຸກຍູ້ ແລະ ອຳນວຍຄວາມສະດວກ ໃຫ້ສະມາຊິກສະຫະພັນແມ່ຍິງຮາກຖານນັກທຸລະກິດຍິງ ນວ ໄດ້ໄປຝຶກອົບຮົມວິຊາຊີບ, ຖອດຖອນບົດຮຽນ ເພື່ອຮຽນຮູ້ບົດຮຽນໃນການພັດທະນາທຸລະກິດ ເປັນຄູ່ຮ່ວມໃນການລົງທຶນທຸລະກິດຂະໜາດນ້ອຍ, ຂະໜາດກາງ ເພື່ອສ້າງໃຫ້ເປັນເຈົ້າ ຂອງທຸລະກິດ, ພ້ອມທັງໄດ້ຊຸກຍູ້ ແລະ ອໍານວຍຄວາມສະດວກ ໃຫ້ນັກທຸລະກິດຍິງ ໄປຖອດຖອນບົດຮຽນ ເພື່ອຮຽນຮູ້ບົດຮຽນໃນການພັດທະນາຢູ່ຕ່າງປະເທດ ດ້ວຍທຶນຕົນເອງຕາມເງື່ອນໄຂຕົວຈິງ ຕື່ມອີກ.
ພ້ອມນີ້, ສະຫາຍ ນາງ ແສງເດືອນ ອ່າງຄຳນາກສະຫວັດ ຍັງໄດ້ຕີລາຄາດ້ານດີ, ຂໍ້ຄົງຄ້າງ, ສາເຫດ ແລະ ບົດຮຽນທີ່ຖອດຖອນໄດ້ ໃນໄລຍະຜ່ານມາ, ພ້ອມທັງຍົກໃຫ້ເຫັນທິດທາງແຜນການ ຈັດຕັ້ງປະຕິບັດວຽກງານດ້ານຕ່າງໆ ໃນຕໍ່ໜ້າ.ໃນກອງປະຊຸມ ຍັງໄດ້ ຜ່ານຂໍ້ຕົກລົງ ວ່າດ້ວຍການບົ່ງຕົວແຕ່ງຕັ້ງ ຄະນະສະຫະພັນແມ່ຍິງຮາກຖານນັກທຸລະກິດຍິງ ນະຄອນຫລວງວຽງຈັນ ໂດຍແຕ່ງຕັ້ງ ສະຫາຍ ນາງ ອິນທະຣົງຈິດ ແສງສະຫວັນ ເປັນປະທານສະຫະພັນແມ່ຍິງຮາກຖານນັກທຸລະກິດຍິງ ນະຄອນຫລວງວຽງຈັນ, ສະຫາຍ ນາງ ແສງເດືອນ ອ່າງຄຳນາກສະຫວັດ ເປັນຮອງປະທານ, ທັງເປັນປະທານກວດກາ, ສະຫາຍ ນາງ ອິນທະຫວາ ຈັນທະລາວົງ ເປັນຮອງປະທານ, ທັງເປັນຮອງປະທານກວດກາ. ພ້ອມນີ້, ຍັງໄດ້ແຕ່ງຕັ້ງ ຄະນະ ອີກ 4 ສະຫາຍ.
ໂອກາດນີ້, ສະຫາຍ ນາງ ຫລຽນຄຳ ວິລະພັນ ໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນສຳເລັດທີ່ສະມາຊິກສະຫະພັນແມ່ຍິງຮາກຖານນັກທຸລະກິດຍິງ ນະຄອນຫລວງວຽງຈັນ ຍາດມາໄດ້ໃນໄລຍະຜ່ານມາ ເຊິ່ງເປັນການປະກອບສ່ວນເຮັດໃຫ້ນັກທຸລະກິດຍິງ ຢູ່ ນວ ກໍຄື ນັກທຸລະກິດຍິງ ໃນຂອບເຂດທົ່ວປະເທດ ມີຄວາມເຂັ້ມແຂງ ແລະ ເຕີບໃຫຍ່ຂະຫຍາຍຕົວ, ພ້ອມທັງເນັ້ນໃຫ້ຄະນະສະຫະພັນແມ່ ຍິງຮາກຖານນັກທຸລະກິດຍິງ ນະຄອນຫລວງວຽງຈັນ ຊຸດໃໝ່ ສືບຕໍ່ເອົາໃຈໃສ່ນຳພາ-ຊີ້ນຳ ສະມາຊິກ ຈັດຕັ້ງປະຕິບັດວຽກງານຂອງຕົນ ໃຫ້ສຳເລັດຕາມເປົ້າໝາຍທີ່ວາງໄວ້; ໃຫ້ນັກທຸລະກິດຍິງຮ່ວມກັນ ລົງ ມືເຮັດທຸລະກິດໃດໜຶ່ງຮ່ວມກັນ ເພື່ອສ້າງລາຍຮັບ ແລະ ສ້າງວຽກງານງານທຳ ໃຫ້ກັບປະຊາຊົນລາວ ບັນດາເຜົ່າ ຕື່ມອີກ.
ຂ່າວ: ທະນູທອງ
ພາບ: ເກດສະໜາ
