ຂປລ. ໃນວັນທີ 9 ເມສາ 2025 ນີ້, ລັດວິສາຫະກິດໂຮງພິມແຫ່ງລັດ ຈັດກິດຈະກຳ ບາສີ ສູ່ຂວັນ ສະເຫລີມສະຫລອງປີໃໝ່ລາວ ພສ 2568 ຕາມຮີດຄອງປະເພນີ້ອັນດີງາມ ຂອງຊາດລາວເຮົາ ໂດຍມີບັນດາຮອງລັດຖະມົນຕີ, ຫົວໜ້າກົມ, ຮອງກົມ ອ້ອມຂ້າງກະຊວງ ຖະແຫລງຂ່າວ, ວັດທະນະ ທຳ ແລະ ທ່ອງທ່ຽວ, ພ້ອມດ້ວຍພະນັກງານ-ລັດຖະກອນ ພາຍໃນໂຮງພິມແຫ່ງລັດ, ກຸ່ມລູກຄ້າ ​ແລະ ແຂກຖືກເຊີນ ເຂົ້າຮ່ວມ ຢ່າງຄຶກຄື້ນມ່ວນ​ຊີ່​ນ. 

ທ່ານ ໄມອອນ ທຳມະວົງ ຜູ້ອຳນວຍການລັດວິສາຫະກິດໂຮງພິມແຫ່ງລັດ ໃຫ້ຮູ້ວ່າ: ການຈັດກິດຈະກຳບາສີສູ່ຂວັນ ສະເຫລີມສະຫລອງປີໃໝ່ລາວ ພສ 2568 ໃນຄັ້ງນີ້, ເພື່ອປົກປັກຮັກສາ ວັດທະນະທຳ, ຮີດຄອງປະເພນີອັນດີງາມ ຂອງຊາດລາວເຮົາ ໃຫ້ໝັ້ນຄົງ, ຢືນຍົງ-ຄົງຢູ່ຕະຫລອດໄປ, ທັງເປັນການອວຍພອນໃຫ້ ກຸ່ມລູກຄ້າ ທັງພາກລັດ ແລະ ເອກະຊົນ ທີ່ໄດ້ເຂົ້າມາໃຊ້ ບໍລິການຢູ່ໂຮງພິມແຫ່ງລັດ, ຕະຫລອດຮອດ ພະນັກງານ-ລັດຖະກອນ ພາຍໃນໂຮງພິມແຫ່ງລັດ ທີ່ໄດ້ມີຄວາມຫ້າວຫັນ ໃຫ້ການຮ່ວມມື, ມີຄວາມສາມັກຄີເປັນເອກະພາບ, ຈັດຕັ້ງນໍາພາ ແລະ ໃກ້ຊິດຕິດແທດ ເຂົ້າໃນວຽກງານຕົວຈິງ ເຮັດໃຫ້ການປະຕິບັດແຜນວຽກໃນແຕ່ລະມື້-ແຕ່ລະອາທິດ, ແຕ່ລະໜ້າວຽກ ສໍາເລັດຕາມກຳນົດເວລາ, ຮັບປະກັນດ້ານປະລິມານ ແລະ ຄຸນນະພາບ, ເຮັດໃຫ້ສາມາດເກັບລາຍຮັບໄດ້ລື່ນແຜນ ການ ເຊິ່ງໃນປີ 2024 ຜ່ານມາ ສາມາດຜະລິດສິ່ງພິມ ຮັບໃຊ້ສັງຄົມ ໄດ້ທັງໝົດ 316 ລ້ານກວ່າໜ້າ, ສ້າງລາຍຮັບໄດ້ 45,8 ຕື້ກວ່າກີບ ແລະ ສາມາດມອບພັດທະໃຫ້ລັດຖະບານ 3,8 ຕື້ກວ່າກີບ. ສະ​ເພາະ 3 ເດືອນຕົ້ນປີ 2025 ນີ້, ສາມາດສ້າງລາຍຮັບໄດ້ 6,6 ຕື້ກວ່າກີບ, ຄາດວ່າໝົດປີ 2025 ຈະຜະລິດສິ່ງພິມ ໃຫ້ໄດ້ 309 ລ້ານກວ່າໜ້າ, ສ້າງລາຍຮັບ ໄດ້ປະມານ 25,6 ຕື້ກວ່າກີບ, ມອບພັດທະໃຫ້ລັດຖະບານ ໃຫ້ໄດ້ 1,8 ຕື້ກວ່າກີບ.

ໃນໂອກາດ ປີໃໝ່ລາວທີ່ຈະມາເຖິງນີ້, ທ່ານ ໄມອອນ ທຳມະວົງ ກໍໄດ້ຝາກຄຳອວຍພອນໄຊອັນປະເສີີດ ເຖິງການນຳ ພັກ, ລັດ ຕະຫລອດຮອດ ກຸ່ມລູກຄ້າ ຜູ້ມາໃຊ້ບໍລິການ ຢູ່ໂຮງພິມແຫ່ງລັດ ຈົ່ງມີສຸຂະພາບເຂັ້ມແຂງ, ມີພາລານາໄມສົມບູນ, ປະສົບຜົນສຳເລັດ ໃນໜ້າທີ່ການງານ ທັງຊີວິດສ່ວນຕົວ ແລະ ຄອບຄົວ ຕະຫລອດໄປ.

ຂ່າວ-ພາບ: ທະນູທອງ

KPL