ຂປລ
ຂປລ. ພິທີສະເຫລີມສະຫລອງ ວັນຜູ້ບໍລິຈາກເລຶອດໂລກ 14 ມິຖຸນາ ຄົບຮອບ 20 ປີ ຈັດຂຶ້ນທີ່ສູນການຄ້າລາວໄອເຕັກມໍ, ນະຄອນຫລວງວຽງຈັນ ເພື່ອລະນຶກ ແລະ ຍ້ອງຍໍສັນລະເສີນຜູ້ບໍລິຈາກເລືອດ. ພ້ອມນີ້, ຍັງເປັນການທົບທວນຜົນສໍາເລັດ ໃນການຈັດຕັ້ງ ປະຕິບັດວຽກງານດັ່ງກ່າວ, ຊອກໃຫ້ເຫັນໄດ້ດ້ານຕັ້ງໜ້າ, ສິ່ງທ້າທາຍ ເພື່ອແກ້ໄຂກັບບັນດາສິ່ງທ້າທາຍຕ່າງໆ ແລະ ພ້ອມກັນກຳນົດຍຸດທະສາດ ທິດທາງແຜນການໃນອະນາຄົດ
ຂປລ. ພິທີສະເຫລີມສະຫລອງ ວັນຜູ້ບໍລິຈາກເລຶອດໂລກ 14 ມິຖຸນາ ຄົບຮອບ 20 ປີ ຈັດຂຶ້ນທີ່ສູນການຄ້າລາວໄອເຕັກມໍ, ນະຄອນຫລວງວຽງຈັນ ເພື່ອລະນຶກ ແລະ ຍ້ອງຍໍສັນລະເສີນຜູ້ບໍລິຈາກເລືອດ. ພ້ອມນີ້, ຍັງເປັນການທົບທວນຜົນສໍາເລັດ ໃນການຈັດຕັ້ງ ປະຕິບັດວຽກງານດັ່ງກ່າວ, ຊອກໃຫ້ເຫັນໄດ້ດ້ານຕັ້ງໜ້າ, ສິ່ງທ້າທາຍ ເພື່ອແກ້ໄຂກັບບັນດາສິ່ງທ້າທາຍຕ່າງໆ ແລະ ພ້ອມກັນກຳນົດຍຸດທະສາດ ທິດທາງແຜນການໃນອະນາຄົດ ແນໃສ່ໃຫ້ທຸກຄົນສາມາດເຂົ້າເຖິງ ການບໍລິການເລືອດທີ່ປອດໄພ ໃນທຸກບ່ອນ ເຊິ່ງການສະເຫລີມສະຫລອງ ວັນຜູ້ບໍລິຈາກເລຶອດໂລກ ກໍຄື ການຈັດງານໃນມື້ນີ້ ຄາດວ່າຈະໄດ້ຮັບບໍລິຈາກເລືອດ ຫລາຍກວ່າ 500 ຖົງ.
ໃນໂອກາດນີ້, ທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີ, ຜູ້ຊີ້ນໍາຂົງເຂດວຽກງານ ວັດທະນະທຳ-ສັງຄົມ ໄດ້ກ່າວວ່າ: ການບໍລິຈາກເລືອດມີບົດບາດສໍາຄັນ ໃນການປະກອບສວ່ນ ເຂົ້າໃນການວຽກງານການປີ່ນປົວສຸຂະພາບ, ເປັນປະໂຫຍດຕໍ່ຄົນເຈັບ ແລະ ສາມາດຊ່ວຍກອບກູ້ເອົາຊີວິດຄົນເຈັບ ທີ່ຈໍາເປັນຕ້ອງການສົ່ງເລືອດ ແລະ ສ່ວນປະກອບຂອງເລືອດ ນໍາໃຊ້ເຂົ້າໃນການປີ່ນປົວພະຍາດຕ່າງໆ ທີ່ເປັນອັນຕະລາຍຕໍ່ຊີວິດຂອງຄົນເຈັບ, ການສົ່ງເລືອດ ແລະ ຜະລິດຕະພັນເລືອດ ຊ່ວຍຄົນເຈັບໃຫ້ມີຊີວິດສືບຕໍ່ ແລະ ມີຄຸນນະພາບຊີວິດທີ່ດີຂຶ້ນ, ການສົ່ງເລືອດຍັງສະໜັບສະໜູນ ຂັ້ນຕອນປີ່ນປົວທາງດ້ານການແພດ ແລະ ການຜ່າຕັດທີ່ສັບສົນ. ນອກຈາກນັ້ນ, ການສົ່ງເລືອດຍັງເປັນການຊ່ວຍຊີວິດ ຂອງແມ່ທີ່ສູນເສຍເລືອດໃນເວລາເກີດລູກຫລື ຍ້ອນໄພທາງທຳມະຊາດ. ເຖິງຢ່າງໃດກໍຕາມ, ຍັງມີຫລາຍປະເທດ ທີ່ຄວາມຕ້ອງການເລືອດຫລາຍກວ່າ ຄວາມສາມາດໃນການຕອບສະໜອງ. ການປຸກລະ ດົມບໍລິຈາກເລືອດ ແລະ ຕອບສະໜອງເລືອດທີ່ປອດໄພ ຍັງຜະເຊີນໜ້າກັບສິ່ງທ້າທາຍຫລາຍຢ່າງ ທີ່ຈະສາມາດບັນລຸການ ຕອບສະໜອງເລືອດໃຫ້ມີຄວາມພຽງພໍ, ປອດໄພ ແລະ ທັນເວລາ, ພ້ອມທັງຮັບປະກັນທາງດ້ານຄຸນນະພາບ. ການບໍລິຈາກເລືອດແບບສະມັກໃຈ ບໍ່ຮຽກຮ້ອງສີ່ງຕອບແທນ ຖືວ່າແມ່ນ ພື້ນຖານຂອງການຕອບສະໜອງເລືອດທີ່ພຽງພໍ ແລະ ປອດໄພ.
ສຳລັບ ສປປ ລາວ, ການປຸກລະດົມຂົນຂວາຍບໍລິຈາກເລືອດ ແມ່ນໄດ້ຮັບການສະໜັບສະໜູນ ແລະ ເຂົ້າຮ່ວມຈາກສັງຄົມ ທຸກຂະແໜງການຢ່າງກວ້າງຂວາງ ແຕ່ສູນກາງຮອດທ້ອງຖິ່ນ ເຫັນວ່າມີລັກສະນະພົ້ນເດັ່ນ, ມີຜູ້ບໍລິຈາກເລືອດແບບ ປະຈຳຫລາຍຄັ້ງກວມ ເອົາ 60% ຂອງຈໍານວນຜູ້ບໍລິຈາກເລືອດທັງໝົດ ເດັ່ນກວ່າແມ່ນມີຜູ້ບໍລິຈາກເລືອດສະສົມໄດ້ 70-80 ກວ່າຄັ້ງແລ້ວ. ໃນປີ 2023, ແຜນການຄາດໝາຍສູ້ຊົນ ໃນການປຸກລະດົມຮັບບໍລິຈາກເລືອດໃນທົ່ວປະເທດ ຕ້ອງໃຫ້ບັນລຸ 73.000 ຖົງ, ແຕ່ພາກປະຕິບັດຕົວຈິງ ໄດ້ເລືອດທັງໝົດ 73.023 ຖົງ. ໃນປີ 2024 ນີ້, ສະພາແຫ່ງຊາດ ໄດ້ມີມະຕິຕົກລົງຮັບຮອງເອົາ ແຜນການຄາດໝາຍສູ້ຊົນ ໃນການປຸກລະດົມຮັບບໍລິຈາກເລືອດໃນທົ່ວປະເທດ ຕ້ອງໃຫ້ບັນລຸ 78.000 ຖົງ. ໃນນີ້, ສູນກາງຕ້ອງໃຫ້ບັນລຸ 33.300 ຖົງ ແລະ ທ້ອງຖິ່ນໃຫ້ບັນລຸ 44.700 ຖົງ ໂດຍໄດ້ແບ່ງຕົວເລກໃຫ້ແຕ່ລະແຂວງ ນໍາໄປຈັດຕັ້ງປະຕິບັດ. ໃນປີ ຕໍ່ໆປີ ກໍຈະມີການເພີ່ມຂຶ້ນໃນແຕ່ລະປີ ຮອດປີ 2030 ຕ້ອງໃຫ້ບັນລຸ 120.000 ຖົງ ແລະ ການບໍລິຈາກເລືອດ ແບບສະໝັກໃຈ ບໍ່ຮຽກຮ້ອງສິ່ງຕອບແທນ ໃຫ້ກວມເອົາ ເປັນສ່ວນໃຫຍ່.
ການທີ່ຈະບັນລຸຕົວເລກຄາດໝາຍສູ້ຊົນດັ່ງກ່າວ, ຈຶ່ງມີຄວາມຈໍາເປັນໃນການເພີ່ມທະວີ ການປຸກລະດົມຂົນ ຂວາຍ ການບໍລິຈາກເລືອດແບບສະໝັກໃຈ ບໍ່ຮຽກຮ້ອງສິ່ງຕອບແທນ, ການຕອບສະໜອງງົບປະມານທີ່ຈໍາເປັນ, ການປະກອບວັດຖຸອຸບປະກອນ ທາງດ້ານເຕັກນິກ, ການເພີ່ມທະວີຄວາມຮັບຜິດຊອບຂອງວິຊາການ ແລະ ອື່ນໆ ເພື່ອໃຫ້ວຽກງານ ອັນມີຄວາມໝາຍຕໍ່ຊີວິດ ແລະ ຂາດບໍ່ໄດ້ນີ້ ສາມາດບັນລຸຕາມຄາດໝາຍ ແລະ ສາມາດຕອບສະໜອງເລືອດໃຫ້ ຄົນເຈັບ ຢ່າງພຽງພໍ, ປອດໄພ ແລະ ທັນເວລາ ໃນຂອບເຂດທົ່ວປະເທດ ເຊິ່ງເປັນສິ່ງທ້າທາຍ ຕໍ່ການຈັດຕັ້ງປະຕິບັດວຽກງານດັ່ງກ່າວນີ້ ພໍສົມຄວນ.
ຂ່າວ: ກິດຕາ
ພາບ: ອ່າຍຄຳ
KPL