ຂປລ. ກອງປະຊຸມລັດຖະມົນຕີອາຊຽນ+ ສ ເກົາຫລີ ວ່າດ້ວຍການຕ້ານອາຊະຍາກຳຂ້າມຊາດ ຄັ້ງທີ 5 ຈັດຂຶ້ນໃນວັນທີ 29 ສິງຫາ 2024 ຢູ່ນະຄອນຫລວງວຽງຈັນ ພາຍໃຕ້ການເປັນປະທານຮ່ວມຂອງ ທ່ານ ພັອ ທະວີ ໂຊດຊົງ ລັດຖະມົນຕີກະຊວງຍຸຕິທໍາ ແຫ່ງຣາຊະອານະຈັກໄທ ແລະ ທ່ານ ໂຣ ແມນຊົກ ຫົວໜ້າອົງການໄອຍະການ, ພະແນກຕ້ານຢາເສບຕິດ ແລະ ອາຊະຍາກໍາທີ່ມີການຈັດຕັ້ງ, ອົງການໄອຍະການສູງສຸດ ແຫ່ງ ສາທາລະນະລັດ ເກົາຫລີ ໂດຍມີ ທ່ານ ດຣ ກາວ ກິມ ຮຸນ ເລຂາທິການໃຫຍ່ອາຊຽນ, ມີລັດຖະມົນຕີບັນດາປະເທດສະມາຊິກອາ ຊຽນ ແລະ ຕີມໍແລັດສະເຕ ຮັບຜິດຊອບວຽກງານຕ້ານອາຊະຍາກໍາຂ້າມຊາດ, ພ້ອມດ້ວຍຄະນະຜູ້ແທນເຂົ້າຮ່ວມ.

ກອງປະຊຸມ ໄດ້ພ້ອມກັນຕີລາຄາຄືນຜົນຂອງການຈັດຕັ້ງປະຕິບັດ ບັນດາແຜນການຮ່ວມມືຕ້ານອາຊະຍາກໍາຂ້າມຊາດລະຫວ່າງອາຊຽນ ແລະ ສ ເກົາຫລີ ໃນໄລຍະຜ່ານມາພ້ອມທັງລາຍງານຜົນຂອງກອງປະຊຸມເຈົ້າໜ້າທີ່ອາວຸໂສອາຊຽນ+ ສ ເກົາຫລີ ວ່າດ້ວຍການຕ້ານອາຊະຍາກໍາຂ້າມຊາດ ຄັ້ງທີ 17, ຜົນຂອງກອງປະຊຸມເຈົ້າໜ້າທີ່ອາວຸໂສອາຊຽນ+ ສ ເກົາຫລີ ເພື່ອກະກຽມໃຫ້ແກ່ກອງປະຊຸມລັດຖະມົນຕີອາຊຽນ+ ສ ເກົາຫລີ ວ່າດ້ວຍການຕ້ານອາຊະຍາກຳຂ້າມຊາດ ຄັ້ງທີ 5.

ພ້ອມນີ້, ກອງປະຊຸມ ຍັງໄດ້ແລກປ່ຽນທັດສະນະກ່ຽວກັບ ການຈັດຕັ້ງປະຕິບັດແຜນງານ ໃນການຮ່ວມມືສະກັດກັ້ນ ແລະ ຕ້ານອາຊະຍາກໍາຂ້າມຊາດ ລະຫວ່າງອາຊຽນ ແລະ ສ ເກົາຫລີ ໃນໄລຍະປີ 2019-2025 ເປັນຕົ້ນແມ່ນການພົວພັນຮ່ວມມືໃນການຕ້ານ, ສະກັດກັ້ນ ແລະ ແກ້ໄຂບັນຫາຢາເສບຕິດ, ການກໍ່ການຮ້າຍ, ການຄ້າມະນຸດ, ການລັກລອບຄ້າຂາຍອາວຸດເສິກ, ອາຊະຍາກໍາທາງເສດຖະກິດ, ການຟອກເງິນ, ອາຊະຍາກໍາທາງຄອມພິວເຕີ, ການໂຈລະກໍາທາງທະເລ, ການຄ້າຂາຍສັດປ່າ, ໄມ້ຫວງຫ້າມ ແລະ ການລັກລອບນໍາຄົນເຂົ້າ-ອອກເມືອງ ແລະ ບັນຫາອື່ນໆທີ່ກ່ຽວຂ້ອງ. ພ້ອມນີ້, ກອງປະຊຸມຍັງໄດ້ກໍານົດວັນເວລາ ແລະ ສະຖານທີ່ຈັດກອງປະຊຸມລັດຖະມົນຕີອາຊຽນ+ ສ ເກົາຫລີ ວ່າດ້ວຍອາຊະຍາກໍາຂ້າມຊາດ ຄັ້ງທີ 6 ທີ່ປະເທດມາເລເຊຍ ຈະເປັນເຈົ້າພາບ, ກອງປະຊຸມ ໄດ້ຮັບຮອງເອົາຖະແຫລງການ ຮ່ວມຂອງກອງປະຊຸມ ລັດຖະມົນຕີອາຊຽນ+ສ ເກົາຫລີ ວ່າດ້ວຍການຕ້ານ ອາຊະຍາກໍາຂ້າມຊາດ ຄັ້ງທີ 5 ແລະ ບົດລາຍງານຜົນຂອງກອງປະຊຸມດັ່ງກ່າວ ເພື່ອເຮັດໃຫ້ການພົວພັນ ຮ່ວມມືຕ້ານອາຊະຍາກໍາຂ້າມຊາດ ລະຫວ່າງອາຊຽນ ແລະ ສ ເກົາຫລີ ມີປະສິດທິພາບ ແລະ ມີປະສິດທິຜົນສູງຂື້ນ.

ຂ່າວ: ສົມຫວັງ

ພາບ: ອ່າຍຄໍາ

KPL