*ໃນວັນທີ 16 ມັງກອນ 2025, ທ່ີໂຮງແຮມຄຣາວພລາຊາ ນະຄອນຫລວງວຽງຈັນ ໄດ້ມີກອງປະຊຸມຄະນະຊີ້ນໍາໂຄງການສະໜອງທຶນໃນການຫລຸດຜ່ອນ ແລະ ການຄຸ້ມຄອງຢາປາບສັດຕູພືດ ທ່ີເປັນອັນຕະລາຍ ໃນ ສປປ ລາວ ຂຶ້ນ ໂດຍການເປັນປະທານຂອງທ່ານ ບຸນຊູ ສຸດມາລີ ຮອງຫົວໜ້າກົມປູກຝັງກະຊວງກະສິກໍາ ແລະ ປ່າໄມ້ ແລະ  ທ່ານ ດາວຊວນລາຍ (Dao Xuan  Lai) ຮອງຜູ້ຕາງໜ້າຈາກອົງການ ສະຫະປະຊາຊົນເພື່ອການພັດທະນາປະຈໍາລາວ, ເຂົ້າຮ່ວມມີຕາງໜ້າຈາກກົມກ່ຽວຂ້ອງ, ພະແນກກະສິກໍາ ແລະ ປ່າໄມ້ແຂວງ, ຂະແໜງປູກຝັງ, ອົງການຈັດຕັ້ງສາກົນ ແລະ ຂະແໜງການອ້ອມຂ້າງເຂົ້າຮ່ວມ.

     ທ່ານ ບຸນຊູ ສຸດມາລີ ຮອງຫົວ ໜ້າກົມປູກຝັງໄດ້ກ່າວວ່າ: ກອງປະຊຸມຄັ້ງນີ້ ແມ່ນມີຄວາມໝາຍສໍາຄັນໃນຂະແໜງການກະສິກໍາ ແລະ ປ່າໄມ້ ໂດຍສະເພາະແມ່ນການພັດທະນາລະບົບກົນໄກການຄຸ້ມຄອງສິນຄ້າເປັນຕົ້ນແມ່ນຢາປາບສັດຕູພືດຢູ່ພາຍໃນປະເທດ ເຊິ່ງຕິດພັນກັບການອໍານວຍຄວາມສະດວກທາງດ້ານການນໍາເຂົ້າ, ການກວດກາຕິດຕາມ ແລະ ປະເມີນຜົນເພື່ອໃຫ້ສອດຄ່ອງກັບນະໂຍບາຍປ່ຽນແປງໃໝ່ຂອງພັກ ແລະ ລັດຖະບານ ໃນການເຊື່ອມໂຍງເສດຖະກິດກັບພາກພື້ນ ແລະ ສາກົນການ ອໍານວຍທາງດ້ານການຄ້າ ໂດຍສະເພາະການສ້າງຄວາມຍືນຍົງສະອາດສີຂຽວປອດໄພ. ພ້ອມທັງຮັບຟັງການລາຍງານຜົນສໍາເລັດ ຂອງການຈັດຕັ້ງປະຕິບັດກິດຈະກໍາຂອງໂຄງການໃນໄລຍະຜ່ານມາ ແລະ  ແຜນກິດຈະກໍາຂອງໂຄງການປະຈໍາປີ 2025.

    ກອງປະຊຸມຄັ້ງນີ້ ນອກຈາກໄດ້ຮັບຟັງບົດລາຍງານຜົນສໍາເລັດ ແລະ ການກວດກາໂຄງການໄລຍະຜ່ານມາ ຜູ້ເຂົ້າຮ່ວມຍັງໄດ້ພ້ອມກັນປະກອບຄໍາຄິດຄໍາເຫັນຮ່ວມກັນຢ່າງກົງໄປກົງມາຕໍ່ກັບແຜນກິດຈະກໍາຂອງໂຄງການໃນປີ 2025 ເພື່ອຄວາມເປັນເອກະພາບ ກ່ອນການສະເໜີຜູ້ໃຫ້ທຶນ ເພ່ືອການຈັດຕັ້ງປະຕິບັດໃນຕໍ່ໜ້າ. 

KPL