ຂປລ
ປັດຈຸບັນ ປະຊາຊົນລາວຫັນມາເຮັດອາຊີບກະສິກໍາປູກຝັງ -ລ້ຽງສັດ ຄຽງຄູ່ກັບການບໍລິການຮ້ານ ອາຫານຫລາຍຂຶ້ນ ເນື່ອງຈາກວ່າທໍາ ມະຊາດແມ່ນບ່ອນບໍາບັດຈິດໃຈຜູ້ຄົນໃຫ້ຜ່ອນຄາຍຄວາມອິດເມື່ອຍຈາກວຽກງານ.
*ປັດຈຸບັນ ປະຊາຊົນລາວຫັນມາເຮັດການເຮັດອາຊີບກະສິກໍາປູກຝັງ-ລ້ຽງສັດ ຄຽງຄູ່ກັບການບໍລິການຮ້ານອາຫານຫລາຍຂຶ້ນ ເນື່ອງຈາກວ່າທໍາມະຊາດແມ່ນບ່ອນບໍາບັດຈິດໃຈຜູ້ຄົນໃຫ້ຜ່ອນຄ້າຍຄວາມອິດເມື້ອຍຈາກວຽກງານ, ສະນັ້ນ, ເຮົາຈຶ່ງເຫັນວ່າບັນດາທຸລະກິດຮ້ານອາຫານ ຈະມີການຕົບແຕ່ງລັກສະນະເປັນຕູບ, ກິນປາທໍາມະຊາດທີ່ສົດໃໝ່ໃນແຕ່ລະມື້ເຊິ່ງເປັນການດຶງດູດຜູ້ຄົນໄດ້ຈໍານວນຫລາຍ ດັ່ງນັ້ນ, ຈຶ່ງເປັນຜົນດີໃຫ້ຜູ້ປະກອບການທີ່ເຮັດອາຊີບນີ້ສາມາດລາຍຮັບໄດ້ຫລາຍລ້ານກີບຕໍ່ປີ ເໝືອນທ່ານ ສີສຸ້ຍ ພັດທະນາ ທີ່ປະສົບຜົນສໍາເລັດເຮັດອາຊີບກະສິກໍາປູກຝັງ-ລ້ຽງສັດ ຄຽງຄູ່ກັບການບໍລິການຮ້ານອາຫານ.
ທ່ານ ສີສຸ້ຍ ພັດທະນາ ບ້ານອຸດົມສຸກ ເມືອງເຊໂປນ ແຂວງສະຫວັນນະເຂດ ເປັນອີກໜຶ່ງຄອບຄົວຕົວແບບໃນການລ້ຽງປາ ຕິດພັນກັບການບໍລິການຮ້ານອາຫານ ເພື່ອເປັນການບໍລິການນັກທ່ອງທ່ຽວ ເປັນການສ້າງລາຍຮັບໃຫ້ແກ່ຄອບຄົວ ເຊິ່ງທ່ານໄດ້ຍົກໃຫ້ເຫັນວ່າ: ໂດຍກໍາແໜ້ນ ແລະ ເຊື່ອມຊຶມຕໍ່ແນວທາງປ່ຽນແປງໃໝ່ຂອງພັກ-ລັດເຮົາ, ຕໍ່ກັບການສ້າງເສດຖະກິດຄອບຄົວເພື່ອຫລຸດພົ້ນອອກຈາກຄວາມທຸກຍາກ, ໂດຍຕິດພັນກັບທ່າແຮງຂອງຄອບຄົວກໍ່ໄດ້ຊອກທຸກເງື່ອນໄຂໃນການສ້າງແຫລ່ງລາຍຮັບ ເພື່ອພັດທະນາເສດຖະກິດຄອບຄົວຂອງຕົນໃຫ້ມີຢູ່ມີກິນ ພາຍໃນຄອບຄົວມີສຳມະຊິກ 6 ຄົນ ຍິງ 2 ຄົນ ແຮງງານຕົ້ນຕໍ 4 ຄົນ, ຍິງ 2 ຄົນ ໃນໄລຍະແຕ່ປີ 2011-2015 ໄດ້ເລີ່ມບຸກເບີກເນື້ອທີ່ດິນເພື່ອສ້າງໜອງສະລ້ຽງປາຈຳນວນ 3 ໜອງ, ຕູບບໍລິການ 3 ຫລັງ, ໂດຍນຳໃຊ້ທຶນຕົນເອງປະກອບກັບແນວຄິດຈິດໃຈທີ່ມັກອາຊີບດ້ານກະສິກຳ ແລະ ສະແຫວງຫາທາງດ້ານເຕັກນິກວິຊາການ, ໂດຍລົງທຶນເບື້ອງຕົ້ນແມ່ນ 20 ລ້ານກີບ, ຜົນລາຍຮັບສະເລ່ຍປະມານ 50 ລ້ານກີບຕໍ່ປີ ແລະ ມາຮອດປີ 2019 ເຫັນວ່າກິດຈະການດ້ານນີ້ໄປໄດ້ດີມີລາຍຮັບເພີ່ມຂຶ້ນ ເຮັດໃຫ້ມີແນວຄິດຢາກຂະຫຍາຍ ສ້າງໜອງສະຕື່ມຈໍານວນ 2 ໜອງລວມເປັນ 5 ໜອງ ແລະ ສ້າງຕູບບໍລິການເພີີ່ມຂຶ້ນອີກ 11 ຫລັງລວມທັງໝົດ 14 ຫລັງ. ນອກນັ້ນ, ກໍ່ຍັງໄດ້ລ້ຽງສັດປະເພດ: ງົວ, ແບ້ເປັດ, ໄກ່ ເພື່ອຮອງຮັບໃຫ້ລູກຄ້າເຂົ້າມາບໍລິການແບບຄົບວົງຈອນ.
ນອກຈາກນັ້ນ, ກໍໄດ້ ປູກກ້ວຍເຄິ່ງເຮັກຕາ, ມັນຕົ້ນ 2 ເຮັກຕາໂດຍໃຊ້ທຶນທັງໝົດ 200 ລ້ານ; ໃນນັ້ນທຶນກູ້ຢືມຈາກທະນາຄານນະໂຍບາຍ 30 ລ້ານກີບ ຊຶ່ງທັງໝົດນີ້ແມ່ນວຽກໜຶ່ງທີ່ມີຄວາມພາກພູມໃຈໃນການຜະລິດກະສິກຳໃຫ້ກາຍເປັນສິນຄ້າ, ພາຍໃຕ້ຄຳຂວັນທີ່ວ່າ: ເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງໄປເທື່ອລະກ້າວ ໂດຍສະເລ່ຍແລ້ວ ປີໜຶ່ງສ້າງລາຍຮັບຈາກການປູກຝັງ-ລ້ຽງສັດໄດ້ 200 ລ້ານກີບຕໍ່ປີ, ນອກນັ້ນ ຍັງມີລາຍຮັບຈາກການບໍລິການກິນດື່ມປະມານ 100 ລ້ານກວ່າກີບຕໍ່ປີ, ສັງລວມແລ້ວໃນປີຈະມີລາຍຮັບປະມານ 300 ລ້ານກວ່າກີບ, ບັນດາລາຍຮັບເຫລົ່ານີ້ແມ່ນໄດ້ນໍາໃຊ້ເຂົ້າໃນການປັບປຸງຍົກລະດັບຊີວິດການເປັນຢູ່ໃນຄອບຄົວຂອງຕົນໃຫ້ດີຂຶ້ນເທື່ອລະກ້າວ; ໃນນັ້ນໄດ້ສົ່ງລູກຮຽນ 2 ຄົນຈົບວິຊາສະເພາະ, ສ້າງເຮືອນ 2 ຫລັງ, ລົດຈັກ 4 ຄັນ, ລົດໃຫຍ່ 1 ຄັນ ແລະ ແຜນໃນຕໍ່ໜ້າກໍຈະບຸກເບີກເນື້ອທີ່ປູກຢາງພາລາ 2 ເຮັກຕາ, ປັບປຸງສະຖານທີ່ບໍລິການ, ສ້າງບ່ອນຫລິ້ນສໍາລັບເດັກນ້ອຍຕື່ມອີກ.
KPL
