ຂປລ. ຕະຫລອດໄລຍະ 76 ປີຜ່ານມາ ສປ ຈີນ ໄດ້ນຳພາປະເທດຂອງຕົນກ້າວເປັນປະ​ເທດ​ໃຫຍ່ ​ດ້ານເສດຖະກິດອັນດັບຕົ້ນໆຂອງໂລກ, ນໍາພາປະຊາຊົນຈີນຫລຸດພົ້ນອອກຈາກຄວາມທຸກຍາກຫລາຍກວ່າ 800 ລ້ານຄົນ ແລະ ແບ່ງປັນການພັດທະນາສູ່ໂລກພາຍນອກ ກວມເອົາກວ່າ 150 ປະເທດ ໂດຍຜ່ານເສັ້ນທາງສາຍໄໝເອີ້ນວ່າ“ເສັ້ນເລືອດໃຫຍ່ຂອງເສດຖະກິດໂລກແຫ່ງສະຕະວັດທີ 21”, ຈາກເວລານັ້ນເຖິງປັດ​ຈຸ​ບັນ ພວກເຮົາໄດ້ຮຽນຮູ້ບົດຮຽນອັນລໍ້າຄ່າ ແລະ ໄດ້ຊົມໃຊ້ຜະລິດຕະພັນຈາກຈີນມີຫຍັງແນ່?.

ເມື່ອເວົ້າເຖິງປະເທດຈີນ, ບໍ່ມີທ່ານໃດ​ປະຕິເສດໄດ້ ວ່າບໍ່ໄດ້ຊົມໃຊ້ຜະລິດຕະພັນຈີນ ນັບແຕ່ລົດລາງພາຫະນະ, ເຄື່ອງກົນຈັກ, ເຄື່ອງໄຟຟ້າ, ເຄື່ອງໃຊ້ໃນເຮືອນ, ຈົນເຖິງໄມ້ຈິ້ມແຂ້ວ ແລະ ອື່ນໆ ໃນຊີວິດປະຈໍາວັນຄ້າຍຄື
“ລົມຫາຍໃຈເຂົ້າອອກກໍວ່າໄດ້”. ຖ້າຢາກຮູ້ຄວາມຈິງຄວນເບິ່ງຄືນຫລັງ 10 ປີຜ່ານມາຢ່າງສັດຈະວິພາກ. ຕະຫລອດໄລຍະຜ່ານມາຊາວນາ ແລະ ກຸ່ມຄົນທຸກຍາກທົ່ວໂລກໄດ້ຄ່ອຍໆປົດແອກອອກຈາກການຄອບງໍາສິນຄ້າລາຄາແພງ ຂອງທຶນນິຍົມຜູກຂາດ, ໂດຍເລີ່ມຕົ້ນເຄື່ອງກົນຈັກ, ລົດໄຖນາ, ລົດຈັກ, ລົດເກງ, ລົດບັນທຸກ, ເຄື່ອງໃຊ້ໄຟຟ້າ, ໂທລະສັບມືຖື ແລະ ອື່ນໆ ທີ່ຜະລິດໃນປະເທດທຶນນິຍົມຜູກຂາດເຕັກໂນໂລຊີກັບການຕັ້ງລາຄາຂ້ອນຂ້າງແພງເຮັດໃຫ້ຊາວນາ ແລະ ກຸ່ມຄົນມີລາຍໄດ້ຕໍ່າບໍ່ສາມາດຊື້ ຫລື ເຂົ້າເຖິງສິ່ງເຫລົ່ານັ້ນໄດ້ຢ່າງເຕັມສ່ວນ, ແຕ່ປັດຈຸບັນນີ້ທຸກຊັ້ນຄົນທົ່ວໂລກ ສາມາດເຂົ້າເຖິງສິນຄ້າຂອງຈີນ ຜະລິດ ແລະ ສະໜອງໃຫ້ດ້ວຍລາຄາສົມເຫດສົມຜົນ ແຕກຕ່າງກັນໄປເພີ່ມຂຶ້ນຢ່າງກວ້າງຂວາງ ເຊິ່ງໄດ້ສະແດງໃຫ້ເຫັນການເປີດກວ້າງ ແລະ ການກະຈາຍການພັດທະນາ ຂອງຈີນໃຫ້ມວນມະນຸດ.

ຕະຫລອດຫລາຍທົດສະວັດຜ່ານມາ, ດັ່ງທີ່ຮູ້ນໍາກັນເຖິງແມ່ນວ່າບາງຊາດຕາເວັນຕົກ ໄດ້ກີດກັ້ນ ແລະ ປິດລ້ອມດ້ວຍວິທີຕ່າງໆນາໆ ເພື່ອຮີບຮັດຈີນໂດຍບໍ່ແບ່ງປັນເຕັກໂນໂລຊີທັນສະໄໝ, ບໍ່ຂາຍອຸປະກອນຊິບ, ຕັ້ງກໍາແພງພາສີກີດກັ້ນສິນຄ້າຈີນ ແລະ ການໃສ່ຮ້າຍປ້າຍສີຕ່າງໆນາໆ ແຕ່ດ້ວຍມູນເຊື້ອບັນພະບຸລຸດອັນດີງາມ, ບວກກັບຄວາມດຸໝັ່ນ ອົດທົນ, ການຮັກຫອມສັນຕິພາບ ແລະ ມີນໍ້າໃຈແບ່ງປັນຊ່ວຍເຫລືອ ເພື່ອນມິດສາກົນຮອບດ້ານ ເຮັດໃຫ້ ສປ ຈີນ ຜ່ານຜ່າສິ່ງຫຍຸ້ງຍາກເຫລົ່ານັ້ນ ໄດ້ຢ່າງໂດດເດັ່ນ ແລະ ກາຍເປັນປະເທດ​ໃຫຍ່​ດ້ານເສດຖະກິດໂລກ ເປັນຕົ້ນແບບໃນການນໍາພາ ການພັດທະນາແບບຍືນຍົງຂອງໂລກ, ເປັນຜູ້ເຕົ້າໂຮມຄວາມສາມັກຄີປອງດອງ, ເປັນຜູ້ປົດແອກອອກຈາກການຄອບງໍາຜູກຂາດເຕັກໂນໂລຊີຂອງຊາດຕາເວັນຕົກໄດ້ຢ່າງໜ້າຊົມເຊີຍ.

ບັນດານັກວິເຄາະໃຫ້ທັດສະນະວ່າ: ຖ້າໂລກນີ້ບໍ່ມີ ປະເທດຈີນ ແນ່ນອນພວກເຮົາອາດຕົກເປັນທາດ ບໍລິໂພກວັດຖຸທີ່ຜະລິດ ຈາກບາງຊາດຕາເວັນຕົກ ດ້ວຍເງື່ອນໄຂລາຄາແພງ ແລະ ບໍ່ມີທາງເລືອກສະແຫວງຫາສິ່ງແຕກຕ່າງອື່ນ ເຊິ່ງຈະເຮັດໃຫ້ກຸ່ມຄົນຊັ້ນກາງ ແລະ ທຸກຍາກຫາເຊົ້າກິນຄໍ່າອາດ ຈະບໍ່ມີໂອກາດເຂົ້າເຖິງສິນຄ້າທີ່ຫລາກຫລາຍ ແລະ ບໍ່ສາມາດແກ້ໄຂຄວາມທຸກຍາກ ທີ່ແຕກໂຕນກັນໄດ້ ຕົວຢ່າງນ້ອຍໆ: ພຽງໂທລະສັບມືຖືທີ່ໃຊ້ໃນຊີວິດປະຈໍາວັນ, ກັບຫຍີ່ຫໍ້ໄອໂຟນກໍມີຄາລາສູງເຖິງ 10-50 ລ້ານກີບຕໍ່ໜ່ວຍແລ້ວ ເມື່ອທຽບກັບໂທລະສັບມືຖືຂອງຈີນຫຍີ່ຫໍ້ຫົວເຫວີຍ, ເຊວມີ້ ມີລາຄາພຽງແຕ່ 3-10 ລ້ານກວ່າກີບເທົ່ານັ້ນ ເຫັນວ່າແຕກຕ່າງກັນປານ “ ຟ້າກັບເຫວ”, ນີ້ຍັງບໍ່ນັບພາຫະນະ, ເຄື່ອງກົນຈັກ ແລະ ວັດຖຸສິ່ງຂອງອື່ນໆທີ່ຈໍາເປັນ. ຍິ່ງກວ່ານັ້ນ ຍັງມີຕົວຢ່າງໜຶ່ງອີກທີ່ເປັນປະຫວັດສາດໂດຍທະນາຄານໂລກ ແລະ ອົງການສະຫະປະຊາ​ຊາດກໍຍອມຮັບຄື: ເສັ້ນທາງສາຍໄໝສະຕະວັດທີ 21, ພາຍໃຕ້ຂໍ້ລິເລີ່ມ“ ໜຶ່ງແລວໜຶ່ງເສັ້ນທາງ” ໄດ້ປະຕິບັດແຕ່ປີ 2013 ເຖິງປັດຈຸບັນນີ້ມີບັນດາສະມາຊິກຕ່າງໆເຂົ້າຮ່ວມກວ່າ 150 ປະເທດທົ່ວໂລກ ແລະ ກາຍເປັນເສັ້ນເລືອດໃຫຍ່ເອື້ອອໍານວຍຄວາມສະດວກໃຫ້ແກ່ການຄ້າ, ການບໍລິການຂົນສົ່ງ, ການລົງທຶນ ແລະ ການໄປມາຫາສູ່ກັນແບບບໍ່ມີຮອຍຕໍ່ຄວບຄຸມເກືອບທົ່ວໂລກ, ໄດ້ປະກອບສ່ວນເຂົ້າໃນ ການພັດທະນາເສດຖະກິດ-ສັງຄົມ,  ສ້າງວຽກເຮັດງານທໍາ ແລະ ແກ້ໄຂຄວາມທຸກຍາກແບບກວມລວມແທ້ໆ,ໃນນັ້ນອີກເລື່ອງທີ່ສໍາຄັນຍັງໄດ້ປ່ຽນສະຖານະພາບຂອງ ສປປ ລາວ ຈາກປະເທດທີ່ບໍ່ມີຊາຍແດນຕິດຈອດກັບທະເລກາຍເປັນປະເທດເຊື່ອມໂຍງເຊື່ອມຈອດກັບພາກພື້ນ-ສາກົນຄັ້ງປະຫວັດສາດ, ໂດຍສະເພາະເສັ້ນທາງລົດໄຟ ລາວ-ຈີນ ກາຍເປັນກຸນແຈເປີດປະຕູ ສປປ ລາວ ສູ່ໂລກພາຍນອກຢ່າງ​ເຕັມສ່ວນ ຜ່ານການເຊື່ອມໂຍງກັບຊາດອາຊຽນທີ່ມີປະຊາກອນ 600 ລ້ານ, ເຂົ້າຫາຈີນທີ່ມີປະຊາກອນ 1,4 ຕື້ຄົນ, ໄປຫາເສັ້ນທາງຢູຣາເຊຍ (ອາຊີ-ເອີຣົບ) ທີ່ມີປະຊາກອນກວ່າ 500 ລ້ານຄົນ ເຊິ່ງການເຊື່ອມໂຍງດັ່ງກ່າວຈະບໍ່ພຽງກໍໃຫ້ເກີດລະບຽງເສດຖະກິດໃຫຍ່ທີ່ສຸດຂອງໂລກ, ແຕ່ຫາກຍັງກໍໃຫ້ເກີດດິນແດນແຫ່ງສັນຕິພາບ, ຄວາມຈະເລີນຮຸ່ງ ແລະ ແລກ ປ່ຽນອະລິຍະທໍາທີ່ງົດງາມໃນອະນາຄົດ.

ບັນດານັກວິເຄາະຍັງໄດ້ຍົກໃຫ້ເຫັນຜົນສໍາເລັດຢ່າງມະຫັດສະຈັນຂອງຈີນທີ່ເປັນຮູບປະທໍາວ່າ: ແຕ່ລະໄລຍະໃນການພັດທະນາຂອງຈີນ ມີການວາງແຜນຢ່າງເປັນລະບົບຄົບຊຸດ ແລະ ຂັບເຄື່ອນດ້ວຍບາດກ້າວວ່ອງໄວຈົນເຮັດໃຫ້ຊາວໂລກຕ້ອງແນມເບິ່ງບໍ່ໜ້າເຊື່ອ. ໂດຍເລີ່ມຈາກນໍາເຂົ້າລົດລາງພາຫະນະກາຍເປັນຜູ້ຜະລິດ ແລະ ສົ່ງອອກລົດໄຟຟ້າອັນ​ດັບ 1 ຂອງໂລກ; ຈາກການເພິ່ງພາເຕັກໂນໂລຊີສື່ສານ ແລະ ໂທລະສັບມືຖືຂອງຕາເວັນຕົກ ກາຍເປັນຜູ້ຜະລິດອຸປະກອນໂທລະຄົມ ແລະ ໂທລະສັບມືຖືເປັນຂອງຕົນເອງໃນແຖວໜ້າໂລກ;ຈາກການເພິ່ງພາຊິບຂອງຕາເວັນຕົກເພື່ອໃຊ້ໃນອຸປະກອນເຄື່ອງໄຟຟ້າຕ່າງໆກາຍເປັນຜູ້ຜະລິດຊິບເອງ; ຈາກທີ່ເຄີຍນໍາໃຊ້ເຕັກໂນໂລຊີລົດໄຟຂອງຕາເວັນຕົກກາຍເປັນຜູ້ມີເສັ້ນທາງລົດໄຟຍາວທີ່ສຸດຂອງໂລກ ແລະ ເປັນຜູ້ຜະລິດ-ສົ່ງອອກລົດໄຟອັນດັບ 1 ຂອງໂລກ; ຈາກອະດີດເຄີຍແນມເບິ່ງຊາດຕາເວັນຕົກພາກັນສົ່ງຍານອະວະກາດຂຶ້ນສູ່ດວງຈັນ ກາຍເປັນຜູ້ຜະລິດເຕັກໂນໂລຊີອະວະກາດທັນສະໄໝສຸດ ແລະ ສົ່ງຍານອະວະກາດຂຶ້ນສູ່ວົງໂຄຈອນພິພົມໃໝ່ອັນດັບ 1 ຂອງໂລກ ແລະ ອື່ນໆ ເຊິ່ງທັງໝົດທີ່ວ່ານັ້ນ ບໍ່ແມ່ນເລື່ອງນຶກຄິດ ແລະ ຝັນເອົາເອງໂດຍບໍ່ໄດ້ລົງມືທໍາ, ແຕ່ເກີດຂຶ້ນຈາກມູນເຊື້ອອັນດີງາມຂອງບັນພະ​ບຸລຸດ, ຄວາມສາມັກຄີອັນເປັນປຶກແຜ່ນ, ຄວາມຮັກຊາດ, ຄວາມດຸໝັ່ນອົດທົນ ແລະ ການເບິ່ງກວ້າງແນມໄກຂອງຈີນຢ່າງສະຫລາດສ່ອງໄສ. ນອກຈາກນັ້ນ, ວິທີການພັດທະນາແຕ່ລະໄລຍະຂອງຈີນບໍ່ໄດ້ເດີນທາງຢ່າງໂດດເດັ່ນແຕ່ຕົນເອງໂດຍລໍາພັງເທົ່ານັ້ນ ຫາກຍັງຈັບມືຖືແຂນເພື່ອນມິດວົງຄະນະຍາດສາກົນ ແລະ ຊ່ວຍເຫລືອປະເທດດ້ອຍພັດທະນາໄປຄຽງຄູ່ກັນ ເພື່ອໄປຫາຈຸດ
ໝາຍປາຍທາງຂອງຄວາມຈະເລີນຮຸ່ງເຮືອງ, ກິນອີ່ມນຸ່ງອຸ່ນ, ມີສັນຕິພາບ, ມີຄວາມສະຫງົບສຸກ ແລະ ບໍ່ຖິ້ມໃຜໄວ້ເບື້ອງຫລັງ.

ດັ່ງທີ່ ທ່ານ ສະເຫລີມໄຊ ກົມມະສິດ ຮອງນາຍົກລັດຖະມົນຕີ ແຫ່ງ ສປປ ລາວ ໄດ້ໃຫ້ສໍາພາດຕໍ່ CMG ໃນໂອກາດເຂົ້າຮ່ວມງານລ້ຽງສະເຫລີມສະຫລອງວັນສະຖາປະນາ ສປ ຈີນ ຄົບຮອບ 76 ປີ (1/10/1949-1/10/2025)ທີ່ນະຄອນຫລວງວຽງຈັນ ໃນວັນທີ 22 ກັນຍາ 2025 ນີ້ວ່າ: ການຮ່ວມມືລາວ-ຈີນໄດ້ນໍາຜົນປະໂຫຍດສູງສຸດມາສູ່ປະຊາຊົນສອງຊາດແທ້ໆ. ຄືຮູ້ນໍາກັນ, ລາວ ແລະ ຈີນ ເປັນປະເທດເພື່ອນມິດຍຸດທະສາດຄູ່ຮ່ວມຊາຕາກໍາ ລາວ-ຈີນ. ຕະຫລອດໄລຍະຜ່ານມາການພົວພັນ ລາວ-ຈີນ ໄດ້ກ້າວຂຶ້ນສູ່ຈຸດສູງສຸດແຕ່ລະໄລຍະ ໃນນັ້ນບັນດາໂຄງການໃຫຍ່ໆທີ່ເປັນໝາກຜົນຂອງການຮ່ວມມືລາວ-ຈີນ ໄດ້ກາຍເປັນໂຄງການຕົວແບບທີ່ຫລາຍປະເທດໄດ້ເອົາເປັນບົດຮຽນໃນການພົວພັນຮ່ວມມືກັບຈີນ. ທ່ານຮອງນາຍົກກ່າວຕື່ມວ່າ: ໝາກຜົນອັນໃໝ່ໆໃນການພົວພັນຮ່ວມມືສອງຝ່າຍລາວ-ຈີນໃນຊຸມປີຕໍ່ໜ້າ ໂດຍສະເພາະໃນການຈັດຕັ້ງປະຕິບັດແຜນແມ່ບົດວ່າດ້ວຍຄູ່ຮ່ວມຊາຕາກໍາ ລາວ-ຈີນ ເຊິ່ງຈະເປັນບ່ອນອີງໃຫ້ແກ່ການຂະຫຍາຍການພົວພັນຮ່ວມມື ແລະ ນໍາຜົນປະໂຫຍດຕົວຈິງ​ມາສູ່ປະຊາຊົນສອງຊາດ.

ພ້ອມດຽວກັນນີ້, ທ່ານ ນາງ ຟ່າງຮົງ  ເອກອັກຄະລັດຖະທູດ ສປ ຈີນ ປະຈຳ ສປປ ລາວ ຍັງໄດ້ຍົກໃຫ້ເຫັນບາງເນື້ອໃນສໍາຄັນຢູ່ໃນງານສະຫລອງວັນຊາດວ່າ:  76 ປີຜ່ານມາ, ພາຍໃຕ້ການນຳພາອັນແຂງແຮງຂອງພັກກອມມູນິດຈີນ, ໄດ້ນໍາພາປະຊາຊົນຈີນກ້າວເຂົ້າສູ່ຂະບວນວິວັດອັນໃໝ່ຫັນເປັນທັນສະໄໝແບບຈີນຊຸກຍູ້ການກໍ່ສ້າງປະເທດມັ່ງຄັ່ງເຂັ້ມແຂງ ແລະ ຟື້ນຟູຄວາມຈະເລີນຮຸ່ງເຮືອງຂອງຊົນຊາດຈີນຢ່າງຮອບດ້ານ ເຊິ່ງໄດ້ກ້າວເດີນຢູ່ໃນແຖວໜ້າແຫ່ງຍຸກສະໄໝຢ່າງສະຫງ່າຜ່າເຜີຍ. ປີນີ້ເປັນປີມ້ວນທ້າຍແຫ່ງການຈັດຕັ້ງຜັນຂະຫຍາຍແຜນການພັດທະນາ 5 ປີ ຄັ້ງທີ 14 (2021-2025), ຈີນໄດ້ສຸມໃສ່ຊຸກຍູ້ການພັດທະນາຢ່າງມີຄຸນນະພາບສູງ, ດ້ວຍຄວາມເປັນເຈົ້າຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງໃນດ້ານເຕັກນິກວິທະຍາສາດລະດັບສູງຂອງຈີນໄດ້ບັນລຸເປັນຈິງໄວຂຶ້ນ.

ທ່ານເອກອັກຄະລັດຖະທູດ ສປ ຈີນ ປະຈໍາ ສປປ ລາວ ຍັງກ່າວຕື່ມວ່າ, ການຮ່ວມມືຢ່າງເປັນຮູບປະທຳຂອງສອງປະເທດຈີນ ແລະ ລາວ ສືບຕໍ່ໄດ້ຮັບຜົນສໍາເລັດໃໝ່ໃນການເຊື່ອມໂຍງກັບພາກພື້ນ ແລະ ສາກົນ. ຈີນ ຈະສືບຕໍ່ຮ່ວມມືກັບຝ່າຍລາວ, ຈັດຕັ້ງປະຕິບັດແຜນແມ່ບົດການສ້າງຄູ່ຮ່ວມຊາຕາກຳຈີນ-ລາວ ໃຫ້ດີ ເພື່ອສ້າງຄວາມຜາສຸກໃຫ້ປະຊາຊົນສອງປະເທດ, ປະກອບສ່ວນເຂົ້າໃນສັນຕິພາບ, ສະຖຽນລະພາບ, ການພັດທະນາ ແລະ ຄວາມຈະເລີນຮຸ່ງເຮືອງຂອງພາກພື້ນ ແລະ ສາກົນ.

ເຖິງແນວໃດກໍດີ,  ປີນີ້ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດຂອງຈີນ 5 ປີ ຄັ້ງທີ 14 (2021-2025)ໄກ້ຈະສິ້ນສຸດລົງທ້າຍປີ 2025 ເຊິ່ງແຜນດັ່ງກ່າວໄດ້ສະທ້ອນໃຫ້ເຫັນຄວາມສໍາເລັດສໍາຄັນຫລາຍດ້ານເປັນຮູບປະທໍາ ແລະ ຜ່ານສາຍຕາໂລກຢ່າງພາກພູມໃຈເຊັ່ນ: ເສດຖະກິດທີ່ມີຄວາມຍືນຍົງ, ການປ່ຽນແປງໄປສູ່ທິດສີຂຽວ, ການເປີດປະເທດຢ່າງຕໍ່ເນື່ອງ,  ການເພິ່ງພາຕົນເອງດ້ານເຕັກໂນໂລຊີເພີ່ມຂຶ້ນແບບກ້າວກະໂດດ, ການແບ່ງປັນອັດຕາສ່ວນ ການພັດທະນາໃຫ້ປະຊາຄົມໂລກກວ້າງຂວາງເພີ່ມຂຶ້ນ ແລະ ປັບປຸງຄຸນນະພາບຊີວິດຂອງປະຊາຊົນຈີນດີຂຶ້ນກວ່າເກົ່າ. ໂດຍ:ເກີດຂວັນໃຈ ມາລີຈັນສີ

KPL