ຂປລ
ຂປລ. ພິທີເປີດຊຸດຝຶກອົບຮົມ ຍົກລະດັບຄວາມຮູ້ວຽກງານ ບັນຊີວິສາຫະກິດ ຊຸດທີ II ປະຈໍາປີ 2025 ໃຫ້ພະນັກງານ-ລັດຖະກອນ ຂະແໜງການເງິນ ຈັດຂຶ້ນໃນວັນທີ 21 ເມສາ 2025 ຢູ່ສະຖາບັນການເງິນ-ການບັນຊີ ໂດຍການເປັນປະທານຂອງ ທ່ານ ຟອງສີສຸພັນ ພົມມະວົງ ຫົວໜ້າສະຖາບັນການເງິນ-ການບັນຊີ, ມີຕາງໜ້າຈາກກົມຄຸ້ມຄອງການບັນຊີ, ພ້ອມດ້ວຍວິທະຍາກອນ ແລະ ສໍາມະນາກອນ ຈາກ 5 ແຂວງພາກກາງ ເຂົ້າຮ່ວມ.
ຂປລ. ພິທີເປີດຊຸດຝຶກອົບຮົມ ຍົກລະດັບຄວາມຮູ້ວຽກງານ ບັນຊີວິສາຫະກິດ ຊຸດທີ II ປະຈໍາປີ 2025 ໃຫ້ພະນັກງານ-ລັດຖະກອນ ຂະແໜງການເງິນ ຈັດຂຶ້ນໃນວັນທີ 21 ເມສາ 2025 ຢູ່ສະຖາບັນການເງິນ-ການບັນຊີ ໂດຍການເປັນປະທານຂອງ ທ່ານ ຟອງສີສຸພັນ ພົມມະວົງ ຫົວໜ້າສະຖາບັນການເງິນ-ການບັນຊີ, ມີຕາງໜ້າຈາກກົມຄຸ້ມຄອງການບັນຊີ, ພ້ອມດ້ວຍວິທະຍາກອນ ແລະ ສໍາມະນາກອນ ຈາກ 5 ແຂວງພາກກາງ ເຂົ້າຮ່ວມ.
ທ່ານ ຟອງສີສຸພັນ ພົມມະວົງ ໄດ້ໃຫ້ຮູ້ວ່າ: ວຽກງານຄຸ້ມຄອງການບັນຊີ ເປັນວຽກງານໜຶ່ງ ໄດ້ປະກອບສ່ວນອັນສຳຄັນ ເຂົ້າໃນການຍົກສູງປະສິດທິພາບ ຂອງການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍ, ເປັນເຄື່ອງມືໃຫ້ອົງການຈັດຕັ້ງພັກ-ລັດ ໂດຍສະເພາະ ຂະແໜງການເງິນ ນຳໃຊ້ເປັນບ່ອນອີງໃນການນຳພາ-ຊີ້ນຳ ຄຸ້ມຄອງວຽກງານບັນຊີ, ກວດສອບອິດສະລະ, ມາດຕະຖານການບັນຊີ, ມາດຕະຖານການລາຍງານການເງິນ ແລະ ມາດຕະຖານວິຊາຊີບ ດ້ານການກວດສອບຢ່າງລວມສູນ ແລະ ເປັນເອກະພາບໃນຂອບເຂດທົ່ວປະເທດ ໃຫ້ມີປະສິດທິພາບ ແລະ ປະສິີດທິຜົນ; ທັງເປັນການປະກອບສ່ວນເຂົ້າໃນ ການພັດທະນາເສດຖະກິດ-ສັງຄົມ ຂອງປະເທດ ແລະ ຂອງແຂວງນັບມື້ເພີ່ມຂຶ້ນ. ການຄຸ້ມຄອງ, ຕິດຕາມກວດກາວຽກງານບັນຊີ ເພື່ອເຮັດໃຫ້ວຽກງານດັ່ງກ່າວ ຖືກຕ້ອງ, ເປັນເອກະພາບ, ເຂັ້ມແຂງ, ໂປ່ງໃສ ແລະ ທັນສະໄໝ ແນໃສ່ຮັບປະກັນການຄຸ້ມຄອງ ການເງິນແຫ່ງລັດ ແລະ ການບໍລິຫານທຸລະກິດ ມີປະສິດທິພາບ, ປະສິດທິຜົນ ປະກອບສ່ວນເຂົ້າໃນ ການພັດທະນາເສດຖະກິດ-ສັງຄົມຂອງຊາດ. ສະນັ້ນ, ກະຊວງການເງິນ ກໍຄື ສະຖາບັນການເງິນ-ການບັນຊີ ຈຶ່ງໄດ້ຈັດຊຸດຝຶກອົບຮົມຄັ້ງນີ້, ແນໃສ່ເຮັດໃຫ້ ພະນັກງານການເງິນ ມີຄວາຮັບຮູ ແລະ ເຂົ້າໃຈຕໍ່ວຽກງານບັນຊີ ໃຫ້ໜັກ ແໜ້ນຂຶ້ນຕຶ່ມ, ສາມາດເຜີຍແຜ່, ແນະນໍາ, ຊຸກຍູ້, ຕິດຕາມ ກວດກາວຽກງານບັນຊີ, ຊຸກຍູ້ຫົວໜ່ວຍທຸລະກິດປະຕິບັດລະບົບການຖືກບັນຊີ, ການສະຫລຸບລາຍງານປະຕິບັດລະບົບບັນຊີດຽວ ໂດຍຜູ້ເຂົ້າຮ່ວມໄດ້ຮຽນຮູ້ກ່ຽວກັບ ລະບົບການຖືບັນຊີ ຈຸນລະວິສາຫະກິດ; ຫລັກການບັນຊີວິສາຫະກິດ; ບັນດາລາຍການເກີດຂຶ້ນໃນສະໄໝ; ການສ້າງເອກະສານບັນຊີ ແລະ ການສ້າງເອກະສານລາຍງານການເງິນ.
ທ່ານຫົວໜ້າສະຖາບັນ ຍັງໄດ້ເນັ້ນຕື່ມວ່າ: ນອກຈາກບັນຍາຍດ້ານທິດສະດີ ແມ່ນໃຫ້ເນັ້ນພຶດຕິກໍາຕົວຈິງ ເປັນກໍລະນີສຶກສາ ທີ່ເກີດຂຶ້ນໃນຕົວຈິງ ໂດຍເອົາຜູ້ຮຽນເປັນໃຈກາງ, ສົມທົບກັບຄະນະຮັບຜິດຊອບ ເພື່ອຈັດຕັ້ງການສອບເສັງທົດສອບຄວາມຮັບຮູ້ຂອງຜູ້ຮຽນ ເພື່ອພິຈາລະນາ ອອກໃບຢັ້ງຢືນ ແລະ ຄະນະຮັບຜິດຊອບ ຕ້ອງເອົາໃຈໃສ່ຕິດຕາມ ການຂຶ້ນຫ້ອງ-ລົງຫ້ອງ ຂອງສໍາມະກອນ, ອໍານວຍຄວາມສະດວກໃຫ້ແກ່ຊຸດຝຶກອົບຮົມ, ພ້ອມທັງສົມທົບກັບວິທະຍາກອນ ເພື່ອປະເມີນຜົນຊຸດຝຶກອົບຮົມ ແລະ ຈັດຕັ້ງການສອບເສັງທົດສອບ ແລະ ສະຫລຸບລາຍງານ ຜົນສໍາຂອງການຝຶກອົບຮົມ ໃຫ້ຄະນະນໍາກະຊວງການເງິນ ຕາມລະບຽບການ.
ຂ່າວ: ກະຊວງການເງິນ
KPL
